Yasa‘iyáh 34
34
1Ai qaumo, nazdík ákar suno: ai ummato, kán lagáo: zamín aur us kí ma‘múrí, dunyá aur sab chízeṉ jo us meṉ haiṉ, suneṉ. 2Kyúṉki Ḳhudáwand ká qahr tamám qaumoṉ par aur us ká g̣azab un kí sab faujoṉ par hai: us ne un ko halák kar diyá, us ne un ko zabh hone ke liye hawála kiyá. 3Aur un ke maqtúl pheṉk diye jáeṉge, balki un kí láshoṉ se badbú uṭhegí, aur paháṛ un ke lahú se bah jáeṉge. 4Aur tamám ajrám i falak gudáz ho jáeṉge, aur ásmán túmár kí mánind lapeṭe jáeṉge: aur un kí tamám afwáj, ták aur anjír ke murjháe húe pattoṉ kí mánind, gir jáeṉgí. 5Kyúṉki merí talwár ásmán meṉ mast ho gayí hai: dekho, wuh Adom par, aur un logoṉ par, jin ko maiṉ ne mal‘ún kiyá hai, sazá dene ko názil hogí. 6Ḳhudáwand kí talwár ḳhúnálúda hai: wuh charbí aur barroṉ aur bakroṉ ke lahú se, aur meṉḍhoṉ ke gurdoṉ kí charbí se chikná gayí: kyúṉki Ḳhudáwand ke liye Busráh meṉ ek qurbání, aur Adom ke mulk meṉ baṛí ḳhúnrezí hai. 7Aur un ke sáth janglí sáṉḍ aur bachhṛe aur bail zabh hoṉge: aur un ká mulk ḳhún se seráb ho jáegá, aur un kí gard charbí se chikná jáegí. 8Kyúṉki yih Ḳhudáwand ká intiqám lene ká din aur badla lene ká sál hai, jis meṉ wuh Siyyún ká insáf karegá. 9Aur us kí nadiyáṉ rál ho jáeṉgí, aur us kí ḳhák gandhak aur us kí zamín jaltí húí rál hogí, 10jo shab o roz kabhí na bujhegí: us se abad tak dhuwáṉ uṭhtá rahegá: nasl dar nasl wuh ujáṛ rahegí, abadu’l ábád tak koí udhar se na guzregá. 11Lekin hawásil aur ḳhárpusht us ke málik hoṉge; ullú aur kauwe us meṉ baseṉge; aur us par wírání ká sút paṛegá, aur sunsání ká sáhúl ḍálá jáegá. 12Us ke ashráf meṉ se koí na hogá, jise wuh buláeṉ ki hukmrání kare; aur us ke sab sardár náchíz hoṉge. 13Aur us ke qasroṉ meṉ káṉṭe aur us ke qil‘oṉ meṉ bichchhúbúṭí aur úṉṭkaṭáre ugeṉge: aur wuh gídaṛoṉ kí máṉdeṉ aur shutrmurg̣oṉ ke rahne ká maqám hogá. 14Aur dashtí darande bheṛiyoṉ se muláqát kareṉge, aur chhagmánas apne sáthí ko pukáregá, háṉ, ‘afrít i shab waháṉ árám karegá, aur apne ṭikne ko jagah páegá. 15Waháṉ uṛnewále sáṉp ká áshiyána hogá, aur anḍe dená aur sená aur apne sáye meṉ jama‘ karná hogá: waháṉ giddh jama‘ hoṉge, aur har ek ke sáth us kí máda hogí. 16Tum Ḳhudáwand kí kitáb meṉ ḍhúṉḍho aur paṛho: in meṉ se ek bhí kam na hogá, aur koí bejuft na hogá; kyúṉki mere muṉh ne yihí hukm kiyá hai, aur us kí rúh ne in ko jama‘ kiyá hai. 17Aur us ne in ke liye qur‘a ḍálá, aur us ke háth ne in ke liye us ko jaríb se taqsím kiyá; so wuh abad tak us ke málik hoṉge, aur pusht dar pusht us meṉ baseṉge.
Currently Selected:
Yasa‘iyáh 34: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
