ROMAN 12
12
Ajiu Akimi Pen Arnam Asal Katiki
1Lasi, ei korte aro ingjirhel, Arnam ahuwit kajinso parasi ne naliyok chingduk bang, nali abithang abangpo akihreng, kangthir, aro Arnam kachideng buli karkli badi chipekngot; labangsi nali phan Jiulipen kachirdom nengpangsam man. 2Pirthepe badike chingbar dunek; la-apot dak bangposi Arnam ar-ih do nang archal langsi, lake potsi akime, aro kachideng ateng aro khanangpo pen neng akimine, angthin long neng chipharlep mot, 3piyok pu tene neyok kipi kajinso parasi ne nali abangten yok pubang, me-at kachiron aphel kaita anang thekchot puke chiron ponek; manta Arnam inghoyok jipe apun atengsi kikrol po pilo, anang latengne anang lamthe hel chiron pamenot. 4Piyok pu tene ili isi abangpo longsi, ili jibadi ako-ong prek-prek abang po arorem do, layongta labang ahuwit arorem isidet badi sal tikike, 5ladisi ilita, ako-ong yongta, Khristo longke isi abangpo chiplang do, aro abangten isi para isiyok abangpo arorem chiplangsi do. 6Manta iliyok kipi kajinso bor-eh pomar ke, ili prek-prek kajinso bor-eh hlong do apot, labang bor-eh hel ke lam katurki un abor-eh chiplang, tene kikrol apun ateng langsi bangpo than undo; 7labang helke Arnam asal katiki abang ke Arnam asal tikine donang; lale, kapaklang poke kapaklang asal along, 8nengkirung poke nengkirung asal long padonang; banta kipipo ke banta pajirlongne padonang; phu-phang po ke me-atsi palang ponnang; kajinso poke nengrong jinso dunnang.
Khanang Khristan Asinhel
9Nengdok ke khanang padonang; jipe kangho, bangpo simmot, akime poke enponnot; 10korte-nengdok ihut para ihut yok chingdom pon; aman kipado alam long, ihutpo para ihutpo yok mechotne aman paklang; 11mesone sal katiki amun kaselep wanek; ajiuli long chirdom pame not; Hemphu murkiya asal tikinot, 12kachiha long nengrong chipado; kiduk-hap amun chipaning dingot; pingkit jongne donot; 13kangthir adun helyok kanange amun banta rap dun, don kachingden pamepon. 14Inghosi naliyok honjat langman, analiyok bor-eh pajir; hao pipesi bor-eh batdun. 15Inghosi nengrong chipado do, analipen nengrong chipadodun; ingho si suruman, analipen surudun. 16Nali ihut para ihut chingbar si arjap-pachip. Kaborai alam chironek, manta akibek hel ateng kengkam chijordun. Abithang yok thekchot chipuyek. 17Akangho aholan kaiyok ta kangho tiki ponek; ahuwit arleng kithek ke jipe akime, bangpo chironot. 18Un putang tene, nali ki-un ateng ahuwit arleng pen ching barne donot. 19Ei nengdok hel, nali ka-ongnai hel paduk dun nek; manta Arnam akang ayok chipek ngot; piyok pu tene lo-kangthir long kiwi do, “Hemphu pudo, ne si ajar hule, ne si katiki angban ta piye.” 20Manta “Nang huturpo ingchir do, tene anang yok an-pacho pon; anang lang ikdo, tene anangyok lang pajunot; ladi tikilo apot, anang phulong kikar angkri kibat badi tharak nge.” 21Akangho asalpen remresi, akime asal pensi kangho asal poyok parem mot.
Currently Selected:
ROMAN 12: AMRI-BSI
Highlight
Copy
Compare
Share
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
