ROMAN 11
11
Israyel Aphuthak Arnam Kajinso
1Laparake, ne pudo, Arnam abithang arleng helyok ke selo ma? Ladi kalek; piyok pu tene nebithang ta Abraham po agijing, Benjamin akhel ihut Israyel arleng. 2Arnam aporong para kachini abithang arleng helyok anang sese yong. Lale, Elija po kipanir lo-kangthir long pot pudo: bangpo nali chithan un-eh yong ma? Anang Israyel arleng hel ado kolsi Arnam ango ladi kachingduk, 3“O Hemphu, arleng hel nang turki helyok marisi, nang athuli hel pangho lo, ne hudet si rikok do; aro anali neyok ta kamari yok chirondo.” 4Manta anangyok Arnam ke pot pudo? “Baal kipu arnam hel ango kachirdomde hajar thorok isi arleng nelong chiwansi bilo.” 5Ladisi minon hok ta kikrol kangthir, jinso si karwal tang abang beksodet si do. 6Manta labangso ta kajinso anatsi ri-do, apot sal katiki parake kalek; lale labang kajinso det ke aro khanang kajinso kaleknge. 7Lapara ke pot te? Israyel abang pot si bisardo, bangpo hlonghle yong. Karwaltang arleng helsi bangpo hlongo; manta kiri abang ke neng parthat no, 8labang alam lo-kangthir long kiwi do, “Arnam analiyok aphu karti ajiu pilo, aro jatsi thekthe ye, ladi amek, aro jatsi arjuje ye, ladi anoso pilo; mini hok labadisi do.” 9Dabhit po ta pudo, “Anali chojun ahong, analiyok pasulkango aro kachiwur apham chiplango, kapangho aro katiki angban pahlong nang; 10Anali thek hlonghle ayok, anali mek pangting nang, aro nang anali anung arni pachingkuk-rung ngo.”
Bang-Ajat hel Joktang Kihlong
11Lasi ne pu do, anali kijang ayok patukungo ma? Ladi kalek! Manta Israyel abang neng-pasojin hlong ayok anali ado parasi Bang-ajat hel aphan joktang pahlongo. 12Minon ke anali ado katiki parasi pirthepe apuru chokngo, aro anali akijol kichok parasi Bang-ajat hel aphan apuru hlongo, tene Jihudi hel joktang hlong phrot tene konbak ongchot apuru choknge. 13Manta Bang-ajat hel nalike, naliyok ne pudo. Ne Bang-ajat hel aphan kapachak adunpo chiplango apot, ne labang kapahar aphang ayok jortang pido. 14Un pu tene nibithang ajat hel yok neng pasohrim si, analiyok angkhan pajoktang un mene. 15Piyok pu tene analiyok katikang si pirthepe long Arnam pen pachilok un, pu tene analiyok kachideng ke kithi hel ajiu kihlong aparke prek pot doye? 16Aro him adumpo, ango kangtonso ke kangthir, tene ajal dung him adumpo ke kangthir; aro thengpepe angkur kangthir, tene arohel ta kangthir. 17Manta angkhan arorem hel panghlok detno, aro nang ingnam kido jolphai arong chiplang si, labang asitem jolphai arorem thuhletsi pachirhapmo, aro nang jolphai arong alang chilok duno. 18Arorem hel yok ado kolke aborai doyek. Kaborai do pu tene, layongta nang angkur long chirhapsi do ladi kalek, manta angkurposi nangyok chirhapsi do. 19Lalong nang pu do, neyok pachirhap yok arorem para panghlok tangdo.” 20Labang ke khanang, nang kikrolkre anatsi labang hel panghlok detno, manta nang kikrol anatsi arjap sido. Nang neng aborai chiplangek, la aniste Arnamyok pherene do. 21Piyok pu tene Arnam kidowen arorem helyok nengdokde tene, nali yokta nengdokde ye. 22Laparake si Arnam kajinso aro akang anengyok langot; inghosi pap long jango analiyok ke akang aneng do; manta naliyok ke Arnam kajinso do; nalike labang kajinso long donot; kangwe yok ke naliyok ta nali tikange. 23Aro Jihudi kikrolmo anengpo tikang pu tene, analiyok pachirhapme, piyok pu tene lahel yok pachirhap phakyok Arnam apharan do. 24Piyok pu tene nang ke ingnam kido jolphai arong para thuhletsi kiwang, nang kido alenta weyong ta akimepen jolphai arong long pachirhap mo, tene ango kidowen arohel, labang konbak me-atsi abithang jolphai arongpe long pachirhap unbo.
Ahuwit Aphuthak Arnam Kajinso
25Lasi, ei korte aro ingjirhel, nali abithang ayok agiyan dochot puke chironek, konam Bang-ajat arleng wang dun detde lengke, la-amunyok angkhan Israyel hel angthin karthat dolo, bangpo kabutisit agiyan alam nali chithan un-ehsi kido neneng long ingjong. 26Aro labadisi ahuwit Israyel hel joknge; lo-kangthir long kiwi do, “Jayonpe para Ral Hemphu wange; anang Jakup po agijing para akangho hel kol detne. 27Aro konam ne anali pap hel kole, la amun anangsi analipen ne niyom chiplange.” 28Kime-alamthe aphan Jihudi hel Arnam pen hutur dolo; manta sar-larhel anat karwalyok anali phan nengdok ke doman; 29piyok pu tene Arnam kajinso bor-eh aro kataram amun, lalong anali neng kachipharlep wepen. 30Jibadi nali angoke Arnam kimengme kido, manta minon nali kimengme kido anat kajinso hlongo, 31ladisi nali kajinso hlongsi paklango apot analita kajinso pahlongo, lasi anali minon kimengme chiplango, 32piyok pu tene Arnam ahuwit yok kajinso pahlongyok, ahuwit yokta kimengme along bengklak si bilo.
Arnamyok Kaparklam
33Arnam agiyan aro botsere apuru konbak akarnuk! Anang bisar-kangthir bomdun un-eh pho! Aro anangpen kidun aduwar kangthun dun un-eh pho! 34Piyok pu tene Hemphu aneng alam ingho than uno, lale anangpen kachirhep dunpo ingho chiplang uno? 35Lale ingho anangyok aporong banta pilo, tangsi anangyok wang piphak nange?” 36Piyok pu tene ahuwit abihini anang para, aro anang pensi, aro anang phansi chokman; anang jortang mo-mo yok padonang. Amen.
Currently Selected:
ROMAN 11: AMRI-BSI
Highlight
Copy
Compare
Share
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
