ROMAN 13
13
Phu-phang Aro kithehel Arlo Karjakdun
1Abangten arleng kapangdom apharan kido helyok mengdun nang; piyok pu tene Arnam parane pipe tene kaita apharan hlonghle tene jat apharan ingjong; aro jibak do, lamehel Arnam parasi honjok wendo. 2La-apotsi ingho labang apharan yok teng dunman, anangke Arnam kapachak poyok teng dun do; aro inghosi teng dun do, anali abithang yok ado chibatne. 3Piyok pu tene kilangpon phu-phang hel akime katiki yok kalek, akangho katiki hel yoksi kaphere doman. Nali apharan kidohel yok kaphere dode ma? Tene akime asal tiki not, tangsi nang anang para hawang hlonge. 4Piyok pu tene nang bor-eh kihlong aphansi, anang ihut Arnam murkiya chiplangdo. Manta nang kangho asal tiki, tene phere; piyok pu tene anang nokpo akijolsi otdo, ladi kalek; piyok pu tene anang Arnam amurkiya, kangho katiki arleng yok Arnam akang badi anang nang katiki angban piman. 5Lasi Arnam akang kaphere det ta kalek, ingthin kachiron anat ta chipabek dun nange. 6La-anatsi nali khajana ta pidun not; piyok pu tene anali Arnam asal aphu-phang chiplangsi, labang asal tiki si doman. 7Ingho bangpo kipi nange doman, bangpo anangyok pidun not; khajana kipi nange doman tene khajana pidun not; aro kaphere nange po yok pherenot; aman kipi nangepo yok aman pinot.
Ihut Para Ihutyok Katiki Nangehel
(Mrk. 12:31; Jem. 2:8)
8Ihut para ihutyok nengdok aparke, kamprek alam along nali jat kipi nange abam badi do yek; piyok pu tene inghosi bangyok nengdok doman, anang kanong yoksi pachokngo. 9Piyok pu tene kangho donerek, arleng mariyek, chunghuyek, bang abihini hel amek soyek, lamehel chengsi kamprek kithan alamdo, tene “Nang kung abangyok abithang yok badi nengdok ngot,” bangso lamthe hlongman. 10Nengdok ke nangkung abangyok panghohe; lasi nengdok si kanongpo pachokman.
Songkhansi Kachingduk
11Labang aparke, nali labang apor chithan undo ke, minon amek kijang para ahari kihlong apor chokngo; piyok pu tene konam ili krolo, la aporyok ke minon kijok ili adungo. 12Anuwe jarlo damtango; katha-ang adung hetno; lasi wangot, kangting asal tikangsi, katha-ang ape-rik chi-ik minang. 13Kangri-kangkrang aro jun-chopakner, kapamok-mok aro kapharlep-lep, ahul aro mek-thoro no-thoro, lamehel tikikesi, adap katha-ang kamichang ateng kengkam-chijor nang. 14Manta nalike Hemphu Jisu Khristo yok chingchol, aro kar-ih kapachok aphan abithang a-ok long isita chihonjok ngek.
Currently Selected:
ROMAN 13: AMRI-BSI
Highlight
Copy
Compare
Share
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
