ROMAN 1

Kardom Kipi

1Pol po Jisu Khristo murkiya, adun aphan kataram, kime-alamthe kapahar yok paprek tango. 2Labang aporong adaksi turkihel para lo-kangthir long anang phan seme tango. 3Lake kime-alamthe along Arnam Aso alamthe ateng anang a-ok badike Dabhit po agijing para wang plango; 4aro Jiuli-Kangthir apharan pensi, kithi para kibur apot, ili Hemphu ke Jisu Khristo pusi pangthekngo; 5anang parasi, ili anang amen anatsi ahuwit asonhel asitem kimeng arlo kachiwan ayok kajinso aro adun aphang pahlongo; 6labang ajat hel asitem nali ta Jisu Khristo kataram abang; Arnam nengdoksi konbak kataram kangthir arleng Rom along do, lahel ahuwit alongyok wido. 7Ili Apa Arnam aro Hemphu Jisu Khristo para naliyok kajinso aro nengsam pachoknang.

Kardom Kapajir Apingkit

8Angoke, ahuwit pirthepe adak nali kikrol apotsi, ne nali ahuwit aphan Jisu Khristo amen pensi Arnam yok kardom pajirdo. 9Piyok pu tene, Arnam ne hakhi do pusi ahuwit ne ingthin pen anang Aso kime-alamthe kapahar asal tikido, ne jutje lensi kapingkit amun nali men hel kar-ih chinengri do. 10lasi aporten pingkit do, Arnam ahisa tene minon ne nali dungyok kiwange anengdo. 11Piyok pu tene ne nali ajiuli abor-eh ajakong pen kapado aphan ne nali kaphochak yok aneng do. 12La-anat, nali pen ne adak ihut para ihutyok kikrol kachiha pi unyok pusi aneng wang long do. 13O korte hel, ne nalidung kidam aneng do, (manta labadi katiki chiteng klaksi do), tangsi ne nali aro Bang-ajat asitem kidam badi damsi sok rot une, labang nali than un-eh detke kapado aneng ingjong. 14Piyok pu tene Grik aro kithekthe ajat, agiyan kido aro kamango, la ahuwit abangyok ne kapahar tang nange do. 15Lasi Rom long kido abang aro nali ngota ne ki-un ateng kime-alamthe kapaharyok anengdet do.

Kime Alam Ajakong

16Piyok pu tene kime-alamthe pen ne tharakre; abangten kichengke Jihudi, la-aphel Grik hel yok, kikrol abangten ayok kakijok aphan Arnam ajakong do. 17Piyok pu tene Arnam dhorom kangthir kikrol para kikrolyok chiklang do; labang alam ladisi wido, “Dhorom kangthir po kikrol parasi hrenge.”

Munusi Dung Ado

18Piyok pu tene ahuwit pap tikisi, labang arleng hel khanang poyok tengman, labang arleng kikrol pangho detno aro pap katiki ado aphuthak si, Arnam akangpo ethakpe para chiklango. 19Piyok pu tene Arnam ke anliyok paklang tango, lasi Arnam yok pot badi chinibo bangpo pachiklan detno. 20Pirthepe kasanse arni para, anang athok-agor pachini un-ehsi dolo, anang ki-or-eh ajakong aro agun, bihini hel along paklang dakngo, lasi anali jokje ye. 21Piyok pu tene anali Arnam yok thek yongta, Arnam badi jortangpo yok kardom pajir thekthe yongo; manta anali bithang adak lam kachingje hel chakche pholo, aro anali nengchiwak phlen thekthe si aneng hel pangtingo. 22Abithang yok thek-at paklang si, anali mangojo chiplango. 23Aro kiprel arleng, wo, akeng hong-phili okpe, okthe, kiklim apei aro kangjar awohel athok-agor agoya hel pensi Arnam ajortang yok pharlep mo. 24Lasi anali sitem anali abangpo aman kachipangbo yok, Arnam lahel angthin kar-ih ateng akisim ayok, champi detno. 25Anali Arnam khanang yok asisik pen holelo, aro kithep-kichor po aholan kasanse abihini long chirdomo aro labang asal tiki pono; kithep-kichor poyok mo-moyok kardomo. Amen. 26Lasi, Arnam lahelyok aman kangwe det kar-ih along pek detno; anali arlosohel abithang kanange alok tikangsi, kamprek kanangne alok chi-en phakngo. 27Ladisi apenso helta abithang kanange arloso alok tikangsi, ihut para ihutyok kidoner aneng dophak si apenso hijanyok katharak asal tikisi, anali bithang yok kachichobe anat kanangne angban chiwano. 28Jibadi anali abithang anengten Arnam acho lamthe agiyan en-eh yongot, ladisi Arnam ta lahelyok, kanangne asal katikiyok, kikrolkre anengyok champi detno. 29Lahel ahuwit pap, kasotonga, alop, kachilang setset, kachitheng, 30arleng kamari, ahul, kachobe, aro hotur detsi plengo; kithan jol-jol, kachursi, Arnam kisim, aborai, kithekrak, kachurwit, kangho kapachiron, aipe pe apa poyok kimengme, 31kamango, bi-pun kapangho, nengdokwe, kajinsose chiplang detno. 32Aro anali labadi kido-kithak abang kithi kamichang, Arnam abisar kido chithan un yong ta, anali ladi kengkam chijorman, ladet kalek, labadi kengkam kachijor abang pen ta chikeng dunman.

Currently Selected:

ROMAN 1: AMRI-BSI

Highlight

Copy