ROMAN Kapachini Alam
Kapachini Alam
Roman Abang Ayok Pol po Kiwi Alo aron ke anang kidam apor Rom along kachikruk kikem ayok kachihonjok aphansi kiwi. Lo long anang kido akhap Rom along kido khristan hel asitem sal katiki aneng kido, kachirap dunyok, aro Ispain ayok kidam alam kido. Khristan kikrol alam abhu kapahlong aphan anang panirsi aro khristan ajiubong kido karjak nange alam wilo. Lo long Pol po kithan Arnam alamthe detsi plengsi do.
Rom long kachikruk arleng helyok kardom kipi aro anang analiyok kapingkit alam kithan aphel, Pol po kiwi acho alamthe kithan dak: “Piyok pu tene lalong Arnam dhorom kikrol para kikrol yok chiklango; labang alam ladisi kiwi ta do, “Dhorom kangthir po ke kikrol pensi hrenge.” (1:17).
Pol po labang acho alampo pame chotno. Ahuwit munusi Jihudihel aro Bang-ajat hel, Arnam pen khanang pachingbarsi binange, piyok pu tene ahuwit pap arlo kido. Jisu Khristo yok kikrol para arleng hel Arnam pen pangthir si bilo. La-aphel Pol po Khristo pen akimi ajiu para angban chitisi Khristo pen neng ki-en panirsi than do. Kikrol abang Arnam pen nengsam do, pap apharan aro kithi para Arnam-Ajiuli pen pajokngo. Angthek hel 5-8 ayok Pol po Arnam kanong alam aro kikrol abang ajiu long Arnam-Ajiuli ajakong alam chithando. La-aphel adun hel Jihudi pen Bang-ajat aro ahuwit munusi aphan pot badi Arnam angden chikeng do pusi karju alam wido. Anang Jisu yok kachidengde poke Arnam para angden kido wen aro ahuwit munusi aphan Arnam kajinso Jisu Khristo long do. Anang krol do Jihudi hel Jisu yok chidengmo jokje ye. Kijut alongke Pol po pot badi khristan ajiu long donange aro bang pen nengdok kido alam papho chotsi wido. Anang labadi acho alam ensi Arnam asal katiki, khristan hel ihut para ihut katiki nange asal, aro kime kangho kachiron karju. Anang lo along abithang alamthe aro Arnam yok kaparklam alamthe hel pen pajutno.
Kapangthek Alam
Kapachini aro acho alam 1:1-17
Arleng aphan kijoktang kanange 1:18-3:20
Arnam kapajoktang aduwar 3:21-4:25
Khristo long akimi ajiu 5:1-8:39
Israyel aphan Arnam angden 9:1-11:36
Khristan karjak asoi 12:1-15:13
Kijut aro kardom kipi alam 15:14-16:27
Currently Selected:
ROMAN Kapachini Alam: AMRI-BSI
Highlight
Share
Copy
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.