ROMAN 2

Arnam Abisar

1“Ei bangyok bisar-ka-ote arleng hel, nali ihut ta, nang bithang ta chipajok un-eh ye; piyok pu tene nang pot alam bangyok bisar-ote do, la-alam mat-matsi nang bithang yokta bisar otesi pangho do; piyok pu tene bangyok bisar kahonthe nang ihutpo, nang bithang ta lamat matsi asal tiki do.” 2“aro ladine kengkam kachijor aphuthak Arnam ado kibat ke khanang, labang hali than-un do.” 3Manta O ladi kido-kithak bisar ka-ote abang, nang mat ta ladi asal tikisi, Arnam abisar para joknge pusi chirondo ma? 4Lale, Arnam jinso si nangthin pharlep do, labang ahari hlonghlesi, nang Arnam kajinso, kachihi, aro kachipaning ding khanang agun kapangwe rondo ma? 5Manta nang thin kangtang aro neng akhep kido angthinyok Arnam bisar-kangthir chiklangsi aro Akang-arniyok, nang bithang yok akang chibiwen do. 6Anang abangten katiki atengsi katiki asal angban piye; 7inghosi kime asal hel chihisi, jortang padosi, aro kiprelpre yok arwale, analiyok or-eh len ajiu piye; 8manta kilang setset abangyok aro khanang po kimengme abang yok Arnam akang aro bisar phoye. 9Ango ke Jihudi, la-aphel Grik hel yokta, kangho katiki ahuwit ajiu aduk aro kaphere-meme chiplange; 10manta ango Jihudi hel, la-aphel Grik helyok kime asal katiki ahuwit yok jortang kiri, aro nengsam choknge; 11piyok pu tene Arnam ke ibak det ke langle. 12Inghosi kanong wesi pap tikilo, kanong wesi lahel prel le; aro inghosi kanong do yongta pap tikilo, kanong pensi anali bisar chiplange. 13Piyok pu tene kanong ka-onene parake Arnam ango dhorom kangthir chiplang un-eh, manta kanong kimeng abangsi dhorom kangthir abang pusi alekhot chiplange. 14Bang-ajat hel asal katiki asot ke kanong badisi tikiman, la-amun kanong kangwe yongta anali katiki asal kanong ateng tikiman. 15Anali angthin longsi kanong kiwi badi pachiklanman, anali kachiron parata hakhi piman; 16aro lasi, ne kime-alamthe kithan badi la-arni Arnam Jisu Khristo parasi ahuwit angthin arlo kabutisit hel bisar-oteye.

Jihudi Abang Pen Kanong

17Manta nang bithang ihut Jihudi pusi chitha-angdo pu tene aro kanongyok chihado tene Arnam yok jortang patha-ang do, 18aro kanong para chirlisi, anang ahisa chithan undo, aro akime ahol ke chideng pondo, 19Aro kanong long agiyan, aro khanang katha-ang hlongsi, nang kangting hel yok duwar kapaklang, kangting abangyok kapatha-ang, 20agiyan kangwe abangyok agiyan kipi, aro osohel yok paklangpo pusi chirondo, 21Ei nang, bangyok paklang abang, nang abithang yok chipaklang kalek ma? Ei chinghu nangne pusi kapaharpo, manta nang bithang chunghudo ma? 22Nali bangpen doner nangne pusi paklangdo, manta nang bithang ke donerdo ma? Ei agoya hel kisimpo, manta nang Arnam ahem long kachirdom ahem chunghu-man ma? 23Ei nang kanong long jortang kapatha-angpo, nang kanong panghosi Arnam amahang patharakdo ma? 24Piyok pu tene lo-kangthir long wido, “Ladisi Arnam amen Jihudi hel anatsi Bang-ajat hel asitem tharak hlongdo.” 25Nang kanong mengdo pu tene, nang sunnot ka-ote mepen do; manta nang kanong mengme pu tene, nang sunnot ka-ote po sunnot ka-otete po chiplango. 26Lasi sunnot ka-otete po, Bang-ajat hel kanong meng tene, sunnot ka-otete poyok Arnam anang yok sunnot ka-ote alekhot en-eh ye ma? 27Manta kanong kimeng inghosi a-ok pen sunnot otete yong, kiwi alamthe aro sunnot hlong yong ta kanong kimengme nang tene, nangyok bisar otete ye ma? 28Piyok pu tene, ihut arleng anglang ke Jihudi, yongta Jihudi kalek; aro anglang a-ok along sunnot ka-ote, labang ke sunnot kalek ngo; 29manta inghosi neng longsi Jihudi, anangsi Jihudi lo; aro kiwi para kalek, manta Jiuli pensi, angthin long sunnot ka-oteposi, labangsi sunnot; labadi ihut arleng karklam ke arleng para kalek, manta Arnam parasi chokman.

Currently Selected:

ROMAN 2: AMRI-BSI

Highlight

Copy