MATHAIA 23
23
Farisaihei neh Dân inriseituhei ata ridîn rang
(Mk.12:38-39; Lk.11:43-46; 20:45-46)
1Khanungchu, Jisuan mipuihei neh a kôilômhei ziangah thu â sîr a, 2“Dân inriseituhei neh Farisaihei hih Mosia Dânhei inrisei thei ranga iphal an nit. 3Khasikin, itho ranga nangni an ibe murdi chu zôm unla; khanniseh, an om dân chu zui no rei; an îsîrhei hih an imang ngai ino a nit. 4Puak irik tak takhei an siam a, mihei chungah an bâng ngai a; khanniseh, anni khan chu an kutṭimhei ilua khomin tôn nuam ngai mak e.#Lk.11:46; TS.15:10. 5An sintho murdi khom miriam mu rang bangin kêng an isin ngai. An ichalhei neh an ibânhei khitnaa Pathian thu riziakhei #23:5 Dn nik. 6:4 thu an riziakna. an inrol a, an zakorfual môr vonahei khom an insei ngai a.#Mat.6:1; Fes.13:9; Rit.15:38; Dn nik.6:8. 6Ruaiṭhena munah ṭhungmun iṭha tak takhei neh inkhôm inheiah ṭhungmun riphoi tak takhei an ringen ngai a; 7bazâr munheia min chibai an ibûkhei, ‘Minriseitu’ itia an ikoihei an ringaiinnat ngai.
8“Nangni chu ‘Minriseitu’ itia koi ni tlak no tin u, nangni inriseitu chu khatkah bang a nit a, nangni chu nin rêngkan urêngkah korong kêng nin init.#Jak.3:1. 9Rinêng chungah hin tute, ‘Epa’ ti no rei, nin Pa chu khatkah, rivâna mi bang nin inei a nit. 10‘Ruaitu’ iti khomin ikoi ni no tin u. Mesia bang hi nin ruaitu a nit. 11Nin lâia â roinpui tak chu nin isom a nit rang a nit. #Mat.20:26,27; Mk.9:35; 10:43,44; Lk.22:26. 12Tutu om ilian kah chu tlôm an ta, om itlôm kah chu inlutin om an ti. #Lk.14:11; 18:14; Mat.18:4; 1 Pet.5:6.
Jisuan an vârriletna a dem
(Mk.12:40; Lk.11:39-42,44,52; 20:47)
13“Nangmani Dân inriseitu neh Farisai vârrilethei o, nin chung ân khôk e! Rivân ram lampui khah mihei nin khâr pêk a; nangmani laka lût ual mak chei a, mi â lût ranghei khom nin khap ngai a. 14Nangmani Dân inriseitu neh Farisai vârrilethei o, nin chung ân khôk e! Numeihei sum nin fâk a, mi lêm nan isôt tak takkah nin ṭongṭai ngai a; khasikah khan nin kuttum tuang inrik ual a ti.#Mk.12:15.
15“Nangmani Dân inriseitu neh Farisai vârrilethei o, nin chung ân khôk e! Mi khatkah inrilet rangin tuikhanglian neh ram phêk pumpui nin ithlo ngai a; khan, a hong riletin chu kha mi khah nangmani nêka bâk inika sualin nin siam ngai.#TS.2:10; 6:5; 13:43.
16“Nangni ruaitu mitdel, ‘Tukhom Tempil ichinga ṭongrikhâm chu îte rinangna nei mak e; khanniseh, tukhom Tempila rângkachak ichinga ṭongrikhâm chu a len rang a nit,’ itituhei o, nin chung ân khôk e! 17Nangni mitdel intlohei o, im a roinpui ual, rângkachak im anitnole rângkachak inrithiangtu Tempil khâm? 18Khabanah, ‘Tukhom mâichâm ichinga ṭongrikhâm chu îte rinangna nei mak e; khanniseh, mâichâm chunga thilpêk ichinga ṭongrikhâm chu an len rang a nit,’ nin ti sa ngai a. 19Nangni mitdelhei o, im a roinpui ual, thilpêk im anitnole thilpêk inrithiangtu mâichâm khâm? 20Khasikin, mâichâm ichinga ṭongrikhâm chu mâichâm neh a chunga thilpêk iom murdi chinga ṭongrikhâm a nit. 21Tempil ichinga ṭongrikhâm chu Tempil neh a sunga om Pathian ichinga ṭongrikhâm a nit. #1 Rêng.8:13; Lap.26:8. 22Rivân ichinga ṭongrikhâm chu Pathian ṭhungmun neh a chunga ṭhungtu chinga rikhâm a nit. #Isa.66:1; Mat.5:34.
23“Nangni Dân inriseitu neh Farisai vârrilethei o, nin chung ân khôk e! A zoro oma vâng ngai chimu loinamsiahei, lêngisêrhei neh roikokhei tena khom sômka khatkah nin pêk ngai a; khanniseh, Dân inriseina â lu ual, felna hei, khorngaina hei neh iamomna hei izôm rangin chu uksak ngai mak chei. Hihei hih kêng nin zôm rang chu ai nit, a danghei khom iṭhûl ual loiin.#Lev.27:30; Mik.6:8. 24Ruaitu mitdel, nin tui innah ithoi chu nin rithît infâi a, saringsei chu rithît infâi loia â lem sa ngaihei o!
25“Nangni Dân inriseitu neh Farisai vârrilethei o, nin chung ân khôk e! Nin kilât neh nin khêng putiang nin infâi a, a sungtiang chu leprûkna neh ridîn nonan ai sip a nit. 26Nangni Farisai mitdelhei, kilât sungtiang khah infâi bak unla; khanchu, a putiang khom fâi sâng a ti.
27“Nangni Dân inriseitu neh Farisai vârrilethei o, ithlân lung nâlinvâr, putiang chu en ihoi zap a; khanniseh, a sungtiang chu mithi ru neh ruak ithua sip angkah nin nit. #TS.23:3; Lap.5:9. 28Nangni khom ama angkah khan mi tin mitmuah putiang chu â ṭha angkan nin ilang a; khanniseh, nin sungtiang chu vârriletna neh sualna sip a nit.
An tuang rang thu Jisuan â sîr
(Lk.11:47-51)
29“Nangni Dân inriseitu neh Farisai vârrilethei o, nin chung ân khôk e! Zânthlahei ithlân nin siam inṭhat a, mi felhei riatmaina lunghei nin vo ngai a. #TS.7:52,53. 30‘Ei chibulhei hun lâiah khan ei lei iom tâk khom ni sela, zânthlahei thisen an isuanaah khan chu ṭang no min,’ nin ti ngai. 31Khasikin, zânthlahei lei ithattuhei richia mi nin nit iti nin înlang chak a nit. 32Fe unla, nin chibulhein an lei iphut khah inrizoi rei. 33Nangni irûlhei neh irûl richihei o, dûkmuna fe ranga roirêlna rithokin ingkam izôk thei rangin nin irtûng?#Mat.3:7; 12:34; Lk.3:7.
34“Ringai rei, khasikah khan nin ziangah zânthlahei, mi vârhei, minriseituhei zuk tir ki ta; ṭhenkah that nin ta, ṭhenkah hêmde nin ta, ṭhenkah inkhôm inheiah hêm nin ta, kho tinah ûm rizûl riai nin ti.#Mat.10:17,23. 35Khasikin, mi fel tak Abela thisen isua rithokin, Tempil neh mâichâm kâra Barakia naipa Zakaria thisen nin isua tenah khan, rinêng chunga mi fel thisen isuak murdi sika kuttum tuangna chu nin chungah la ṭum a ti.#Lk.11:49-51; 2 Rich.36:15,16. 36Thu dik nangni ke ril, kha mihei thatna sika kuttum tuangnahei rêng rêng chu atûna mihei chungah ai ṭum rang a nit.
Jisuan Jerusalem lung a thlung
(Lk.13:34-35)
37“O Jerusalem, Jerusalem, zânthlahei ithat a, Pathianin ni zianga mi a zuang itirhei lunga dêng thattu! Ârpuinûn a tehei arthla nuaia ai op bûm ngai angkan ni naihei voi izâkah iop bûm rang ki tum a, khan laka nuam mak che. 38Khasikin, nin Tempil #23:38 Grik ‘in’ iti a nit. khah imarakin, a khorongin #23:38 ‘Ai ram tâk a nit’ iti thei a nit. om tâng a ti. #Jer.22:5. 39Nangni ke ril, ‘Pumapa riminga hong chu inpâkin riseh,’ nin ti mâkah chu atûna rithokin ne mu nôk khâi no tin,” a ti a.#Lap.118:26.
Currently Selected:
MATHAIA 23: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
