MATHAIA 22
22
Rineina ruaiṭhe ṭongrikhek
(Lk.14:15-24)
1Jisuan mipuihei ziangah ṭongrikhekin thu â sîr nôk a, 2“Rivân Ram chu rêng khatkan a naipa ta ranga rineina ruaiṭhe ai siam neh inrikhek a nit. 3Ruai ifah ranga a mi fialhei ikoi rangin â somhei a tir a; nikhomseh, a mi fialhei khah hong nuam mak a. 4Khanchu, isom danghei a tir nôk a, a mi fialhei ziangah hingkana ti rangin he a be a, ‘Ki ruai khah ken rifûk zoi diam tâk a; ki serâtchalhei neh ki ran vâi ithâihei ki that a, tinrêng arfûk zoi diam tâk a nit. Rineina ruaiṭhe fah rangin hong ta rei, va ti rei,’ a ti a. 5Nikhomsela, a mi fialhei khan iten lei be mak a, an sintum seng an sin a, khatkah a loiah a fe a, khatkah chu a sum inrivaina munah a fe a, 6mi danghei khan isomhei khah an man a, an itôk a, an that a. 7Rêng khah a ning a thik tâk a; khanchu, a sipaihei a tir a, kha mi thattuhei khah ân that a, an khua khom ân hâl pêk tâk a. 8Khanungchu, â somhei khah a koi a, an ziangah, ‘Rineina ruai chu isiam zoi diam a nit tâk a; nikhomseh, ki mi fialhei kha chu â fah rua ni mak e. 9Atûn chu lamilianah fe unla, mi nin imu murdi ruai ifah rangin hong koi rei,’ a ti pêk a. 10Khanchu, isomhei khah lamilianheiah an fe a, mi an imu murdi, mi ṭha neh mi sia, an hong koibûm a, imoi lômna in khah mipuiin an sip tâk a.
11“Khante, rêng khah khualmihei ien rangin a va lût a, rineina puan sil ino mi khatkah a va mu a. 12Rêng khan a ziangah, ‘Mala, rineina puan sil loiin ingkan im hin ni hong lût tlia?’ a ti a. Khanniseh, kha mi khah a dâirek a. 13Khanungchu, rêng khan â somhei ziangah, ‘A kut neh a ke khuap unla, putiang izîngah paiisua rei. Amakhan ṭap a ta, arkam inritông a ti.’ #Mat.8:12; 13:42,50; 24:51; 25:30; Lk.13:28. 14Ifialhei chu itam takkah an nit a; nikhomseh, rithlanghei chu iroichekah an nit,” a ti a.
Sia chôi thua ridonna
(Mk.12:13-17; Lk.20:20-26)
15Khante, Farisaihei khah an suak a, a ṭongbâi suaka rithoka Jisua an man thei rang dân lampui an siam tâk a.#Mk.3:6; 8:15. 16Khanungchu, an kôilôm ṭhenkahei neh Heroda pôla mi ṭhenkahei khah Jisua ziangah an tir a; kha mihei khan, “Minriseitu, thutak ne sîr ngai iti kin riat. Tute ringai dân ngaisak ngai mak che a, tute khom ithleibîk loiin miriam ta ranga Pathian lungdo thutak khah nen risei ngai a. 17Khateh, ingkam ner ngai dân a nit ne ril ta? Kaisara zianga sia chôi hih arthiang im, rithiang mak im?” an ti a.
18Jisuan an lunginṭong ṭhatnozia khah a riat ṭian a, an ziangah, “Vârrilethei o, ithôm nen ôk rang nin itum hi? 19Sia chôi ranga sum khah nen en ta u,” a ti a.
Sum khah a ziangah an hong chôi a. 20Anni khah ardon a, “Tu rilim neh tu riming im ai nit hi?” a ti a.
21Anni khan, “Kaisara,” itin an sâm a.
Khanchu, Jisuan an ziangah, “Kaisara ta chu Kaisara peh unla, Pathian ta chu Pathian peh rei,” a ti a.#Rom.13:7.
22Amakhah an riatin chu arkhêl an ti tak tak a, ani khah an mâk a, an rot pat tâk a.
Thoinôk thu ridonna
(Mk.12:18-27; Lk.20:27-40)
23Kha nî sûn ngirah khan thoinôkna omak iti ngai Sadukai ṭhenkahei Jisua ziangah an hong a.#TS.23:8. 24A ziangah, “Minriseitu, Mosian, ‘Nai nei loiin mi thi sela, a unaipa khan kha numei khah ilua nôkin a ulianpa ta rangin richi a nei pêk rang a nit,’ a ti a. #Dn nik.25:5. 25Khate, kin lâiah urêng parual sarikah an om a, a ulian takin nupui a nei a, richi nei loiin a thi a, a nupui khah a unaipa ziangah a mâk tâk a. 26A unaipa â nikna chungah khom khangkah ngirin a om a, a thumnapu chungah khom, a sarinapu dênin an lua seng a. 27A nungkhôn takah chu a nupang khom khah a thi tâk a. 28Khate, thoinôknaah kha mi pasal sarikahei lâia tu nupui tak im ai nit rang tâk? An rêngkan lak an lua seng a,” an ti a.
29Jisuan a sâm a, “Nin ringai insual vang na! Pathian thu neh Pathian sinthotheina nin riat no sika a nit. 30Thoinôknaah khan nupui pasal rinei khâi no nih, rivâna vântirtônhei angkan om tâng an ti. 31Khante, mithi thoinôkna thu chu Pathianin, ‘Keimah hi Abrahama Pathian, Isaka Pathian, Jakoba Pathian ki nit’ itia nangni a îsîr pêk khah nin lai tep tlak ngai ino mani? 32Pathian chu mithihei Pathian ni mak a, iringhei Pathian kêng ai nit,” a ti a. #Fes.3:6; Lk.7:30; 11:45; 14:3. 33Mipuihei khan amakhah an riatin chu a thu inrisei khah arkhêl an ti tak tak a.
Thupêk roinpui tak
(Mk.12:28-34; Lk.10:25-28)
34Jisuan Sadukaihei khah a sêlindong iti Farisaihei khan an riatin chu a lômin an hong a, 35an lâia Dân inriseitu #22:35 Mss ṭhenkatah chu ‘Dân inriseitu’ iti hih kop mak. khatkan ṭongridona in-ôk rang a tum a,#Lk.10:25-28. 36“Minriseitu, Dânah hin thupêk îtak hîm â roinpui tak?” itin ardon a.
37Jisuan a ziangah, “‘Pumapa ni Pathian chu ni lungril murdin, ni ringna murdin, ne lunginṭong murdin lungthlung roh’ iti hi. #Dn nik.6:5. 38Amahih thupêk roinpui tak neh a kâmiom tak a nit. 39Thupêk â nikna, ar-angpui chu, ‘Nangmah lung ni irthlung angkan ni bungahei lungthlung roh,’ iti hih a nit.#Lev.19:18; Mat.19:19; Gal.5:14; Rom.13:9; Jak.2:8. 40Mosia Dân pumpui neh zânthlahei inriseina murdi hi thupêk inika hin a itêl inrichin thlep a nit,” a ti a.
Mesia chungchâng ridonna
(Mk.12:35-37; Lk.20:41-44)
41Farisai ṭhenkahei an ribûm lâiin Jisuan thu ardon a, an ziangah, 42“Mesia hi ingkam nin ringai? Tu richia mîm ai nit?” a ti a.
Anni khan, “Davida richia mi a nit,” an ti a.
43Jisuan an ziangah, “Khateh, ithôm Rithla khan Davida kha, ‘Pumapa’ tia a înkoi? Davida khan,
44“‘Pumapa khan ki Pumapa#22:44 Pumapa iti masa hih Pathian a nit a, a nûngita hih Mesia a nit. ziangah;
Ne râlhei ni kepha nuaiah ki sia zoi mâkah chu,
Ke changtiang iṭhung mai roh,’
ai ti a nit a.#Lap.110:1; TS.2:34,35; Heb.1:13; 10:13. 45Davidan ani khah, ‘Pumapa’ itin a koi inteh, ingkan im Mesia khah Davida richi a nit thei rang?” a ti a.
46Khanchu, tutên Jisua khah sâm thei mak a, kha nî sûna rithokin chu tutên îte ridon ngam khâi mak a.
Currently Selected:
MATHAIA 22: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
