MATHAIA 24
24
Tempil siat rang thu
(Mk.13:1-2; Lk.21:5-6)
1Khante, Jisua kha Tempil ata a suak a, a fe rangto takin, Tempil sin dân ien rangin a kôilômhei a ziangah an hong a. 2Ani khan an ziangah, “En rei, hihei murdi hih nin mu na? Thu dik nangni ke ril, hintaka lung richuan khatkah khom hih isim iloia imarak zel om no nih,” a ti a.
Buaina neh nuamlona
(Mk.13:3-13; Lk.21:7-19)
3Khante, Jisua kha Oliv tlângah â ṭhung lâiin, a kôilômhein anmani khât bangin an hong rimupui a. “Ne ril ta, khahei khah tikin im a hong itlung rang? Ni zuang nôkna rang neh rammual mongna rang risin khah im ai nit rang?” itin an ridon a.
4Jisuan an ziangah, “Tutên nangni an lêm nona rangin ridîn rei. 5Mi tam takkan, ‘Mesia chu ki nit,’ itin keima riming ichingin hong an ta, mi tam takkah lêm an ti. 6Nin kôla ridoina rihuhei riang nin ta, ilah taka ridoina thuthang la riang nin ti; nikhomseh, nin ilung inbuai no rei. Kha thilhei kha chu a hong itlung ngêt rang a nit; nikhomseh, mongna chu la ni no nih. 7Nam neh nam ridoi an ta, ram neh ram ridoi an ti. Mun tinah iṭâm thlâng a ta, nînu inîng a ti. 8Khahei murdi khah naihasê riphutna a nit.
9“Khanungchu, nangni intuang rangin nangni la man an ta, nangni that an ti; keima sikin nam tinin nangni la nel an ti.#Mat.10:22. 10Khatikin chu mi tam takkan an iamna la mâng an ta; lân man risak an ta, lar nel risak an ti. 11Zânthla lem itam takkah hong suak an ta, mi tam takkah la lêm an ti. 12Khante, sualna a la pung rang sikin mi tam takka lungthlungna la dâi a ti. 13Nikhomsela, tutu a mong idêna tuang idiar chu inringin om a ti. #Mat.10:22; 10:22; Thup.2:7. 14Khante, hi Ram Thurchi Ṭha hih nam tin riat rangin rammual pumpuiah isîrin la om a ta; khanchu, mongna hong tlung a ti.
Inkhôkna inrît tak
(Mk.13:14-23; Lk.21:20-24)
15“Khante, ‘Siatna Porinche’ zânthla Danielan a lei îsîr khah mûng nin ta, mun rithiangah khan iding a ti. A tep kan a omzia reh riseh. 16Khanchu, Judai rama omhei khah itlângheiah lâizâm tho riseh. 17In chunga om khan insungah a neinun isua rangin ṭum no riseh.#Lk.17:31. 18Loia om khomin a puan ilah rangin kîr no riseh. 19Kha nikhuaah khan chu nai ivonghei neh nu naite pomlâihei chu lungkham an om rang vang na!#Lk.23:29. 20Lâizâm nin tho rang zoro khah phalbia #24:20 Phalbi hih ei ram fûr lâi a nit. manih, sabatnin manih a hong tlung nona rangin Pathian ziangah ṭongṭai rei. 21Kha zoroa dengthei inthang iom rang kha chu rammual insiang ata atûn tenan la om ngai mak a, iom khom om nôk tlak khâi no nih. #Dan.12:1; Joel.2:2; Thup.7:14. 22Nikhomsela, Pathianin kha sûnhei khah intôi no sela, miriam tute â dam suak om no nih. Nikhomsela, a mi zenhei sikin Pathianin kha sûnhei khah intôi a ti.
23“Kha nungah khan tukhomin nin ziangah, ‘En ta, Mesia chu hin a om’ manih, ‘Son a om’ manih an ti khoma taksôn no rei. 24Mesia lemhei neh zânthla lemhei an lai suak rang a nit; khahei khan thei vâng seh chu izenhei ilua an lêm theina rangin risinsiana neh sinrikhêl tak tak sin an ti. 25Ringai rei, a zoro a hong tlung man nangni ki îril thlâm a nit.
26“Tukhomin nin ziangah, ‘En ta, ramchârah a om,’ an ti khoma taksôn no rei. 27Miriam Naipa zuang nôk rang chu khothlâr sak tianga rithoka thlang tiang idêna hong rilek ngai angkah hih ai nit rang a nit.#Lk.17:23,24.
28“Takah khom saruak omna kipah chu vasatelhei khom ribûm an ti.
Miriam Naipa zuang rang thu
(Mk.13:24-27; Lk.21:25-28)
29“Kha dengtheina nikhuahei rizoi kaneh chu inî zîng a ta, ithla vâr khâi no nia, rivâna rithokin ârsihei ṭul a ta, rivân sinthotheinahei khah innîngin om a ti. #Isa.13:10; 34:4; Ezek.32:7; Joel.2:10,31; 3:15; Zef.1:15; 2 Pet.3:10; Thup.6:12,13; 8:12. 30Khanungchu, Miriam Naipa risinsiana khah rivânah zuang ilang a ta; rinêng chunga mi murdîn Miriam Naipa hi sinthotheina neh roinpui takka rivâna sûm lâiah a zuang an mu tikin chu ṭap an ti.#Dan.7:13; Zak.12:10-14; Mat.16:27; Thup.1:7. 31Vântirtônhei chu bekul irî neh rammual kil ilika tah tir a ta, kôlkomonga rithoka kiangtiang kôlkomong idênin a mi zenhei bûm an ti.#1 Kor.15:52; 1 Thes.4:16; Isa.27:13; Zak.9:14.
Theichâng kung ata risei rang
(Mk.13:28-31; Lk.21:29-33)
32“Khanchu, theichâng kung om dâna rithokin risei rei. Â ṭang a hong cher a, nâ a hong lâkin chu kholum a hong nâi tâk iti nin riat ngai. 33Khangkah ngirin, nangni khomin khahei murdi khah nin mu tikin chu a zoro a hong nâi tâk a, arphut rang tâk iti reh rei. 34Thu dik nangni ke ril, khahei murdi khah a tlung mâkah chu atûn lâia mihei hih thi riai no nih.#Mat.16:28. 35Rinêng neh rivân boi a ta, ki ṭong chu boi no nih. #Mat.5:18; Lk.16:17.
A zoro neh a nikhua tutên reh mak
(Mk.13:32-37; Lk.17:26-30,34-36)
36“Khannisela, kha zoro neh nikhua zuang tlung rang khah Pa banah chu tutên reh mak; rivâna vântirtônhei khomin, Naipa khomin reh mak e. #TS.1:6,7.
37“Miriam Naipa zuang nôkna chu Nova dam lâia angkah khan nîng a ti. #Riph.6:6-8. 38Tui lian ma, Nova rikuangah a lût nî dênin an fâkin an nêk a, nupui pasal an rinei a; 39tui a hong lian a, an rêngkan an rimang khap mâkah chu im a hong itlung îte reh mak e. Miriam Naipa zuang nôkna kha khangkah takah khan nîng a ti. 40Kha tikin chu mi inikah loiah sin thông an ta, khatkah iṭhuiin om a ta, khatkah iman om a ti. 41Nupang inikan fasum kungah fâng isukin om an ta, khatkah iṭhuiin om a ta, khatkah iman om a ti.
42“Khasikin, intûng ṭiankan om rei, tik nikhuan im nin Pumapa ai zuang rang reh mak chei. 43Nikhomsela, amahih nin riat, inchongpu khan inru hong rang zoro khah reh sela chu lei intûng ṭian a ta, a in khah inrok no nih.#Lk.12:29-40. 44Khasikin, nangni khom intûng ṭiankan om rei, nin intûng no zoro takin Miriam Naipa khah zuang duai a ti.
Isom iamom neh iamom ino
(Lk.12:41-48)
45“Isom iamom tak neh â vâr, a pun a insung icharêl a, isom danghei zoro tina an fâk isem pêk ranga uliana ai siam khah tûm nîng a ti? 46A pu a hong tikin khangkana sin itho isom a hong imu kha chu a ham a ṭhat rang vang na! 47Thu dik nangni ke ril, a pu khan a neinun murdi chunga â zêktun siam a ti. 48Khannisela, isom ṭhano a nitin chu a lungrilin, ‘Ki pu chu hong vak no nih,’ tîng a ta, 49â som champuihei lei hêm a ta, zûnruihei lâiah ifan in a ti. 50Khanchu, kha som a pu khah a tûng no lâi tak neh a riat no zoro takin hong pêk a ta, 51a pu khan ûmisua pai a ta, vârrilethei dongtum angkana khah indong a ta; amakhan ṭap a ta, arkam inritông a ti.
Currently Selected:
MATHAIA 24: BIATBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
