Yaxayas 9

Tus Vajntxwv Uas Yuav Los

1Txawm li ntawd los yuav tsis muaj kev nyuajsiab rau cov neeg uas twb raug kev txomnyem ntawd ntxiv lawm. Yav tas los Nws tau coj kev txajmuag los rau xeem Xenpuloos lub tebchaws thiab xeem Nathalis lub tebchaws, tiamsis yav tomntej no mus, txij ntua ntawm ntug Hiavtxwv Meditelanees sab hnubtuaj mus txog ntua lub tebchaws uas nyob sab ntug dej Yauladees tim ub, thiab pem Kalilais uas cov neeg txawv tebchaws nyob, Nws yuav ua kom lawv rov tau ntsejmuag.#9:1 Hauv phau lus Henplais, tshooj 9:1 no yog txuas los ntawm tshooj 8:23, mas tshooj 9:2-21 yog 9:1-20. #Math 4:15

2Cov neeg uas taug kev tsausntuj nti,

twb pom ib lub teeb uas ci pomkev kajnrig lawm.

Lawv nyob hauv lub tebchaws uas tsausntuj nti,

tiamsis nimno tshavntuj ci kajnrig rau lawv lawm. #Math 4:16; Lukas 1:79

3Tus TSWV, Koj tau pub lawv muaj kev zoosiab heev,#9:3: Nqe no sau hais tias Koj tau pub lawv muaj kev zoosiab heev; phau lus Henplais hais tias Koj tau pub rau lub tebchaws nthuav dav.

Koj pub lawv tau zoo nyob kajsiab lug.

Lawv zoosiab kawg rau tej uas Koj tau ua,

ib yam li cov neeg uas zoosiab thaum sau qoobloo,

lossis thaum lawv faib tej khoom uas mus txeeb tau los tomqab lawv yeej rog.

4Rauqhov Koj twb muab tus quab uas hnyav heev saum lawv xubpwg lov

thiab muab tus nplawm uas luag nplawm lawv nrobqaum lov lawm.

Koj tau kovyeej lub tebchaws

uas tau caijtsuj thiab yuam Koj haivneeg,

ib yam li Koj tau kovyeej Midias cov tubrog ntau xyoo dhau los.

5Txhua nkawm khau uas cov tubrog rau

thiab lawv cov ristsho uas lo ntshav

yuav muab sau huv tibsi coj mus hlawv.

6Muaj ib tug Menyuam tau yug los rau peb lawm!

Muaj ib tug tub tau raug muab pub rau peb lawm!

Nws yuav ua tus kav peb.

Nws lub npe yuav hu ua, “Tus Tuavxam uas muaj Tswvyim,#9:6: muaj Tswvyim lossis Ntse.”

“Vajtswv tus muaj Hwjchim,” “Leejtxiv uas Nyob Mus Ibtxhis,”

“Vajntxwv Leejtub uas muaj kev Thajyeeb.”

7Nws txoj kev tswjhwm yuav tsis paub kawg;

Nws txoj kev thajyeeb yuav tsis paub xaus.

Nws yuav nyob saum Daviv lub zwmtxwv kav

thoobplaws nws lub tebchaws.

Nws yuav txhimkho lub tebchaws,

thiab tswjhwm mus rau qhov tseeb thiab ncajncees

txij no mus ibtxhis tsis kawg.

Tus TSWV uas muaj Hwjchim Loj Kawg Nkaus yuav ua tej no kom tiav. #Lukas 1:32-33

Tus TSWV Yuav Rautxim Rau Cov Yixalayees

8Tus TSWV twb txiavtxim rau Yakhauj cajces, rau lub tebchaws Yixalayees lawm. 9Txhua tus neeg Yixalayees, txhua tus uas nyob hauv lub nroog Xamalis, twb paub txog tej uas Nws tau ua tas los lawm. Tiamsis lawv tseem khavtheeb thiab muabhlob kawg. Lawv hais tias, 10“Tej tsev uas xuas thwvcib ua twb pob tag lawm, tiamsis peb yuav muab tej pobzeb los txhim rau. Tej nqaj ntoo xikamaus twb raug muab txiav povtseg tas lawm, tiamsis peb yuav muab tej nqaj ntoo thuv uas khov heev los hloov.”

11Tus TSWV tshoov lawv cov yeebncuab#9:11: Nqe no saum hais tias lawv cov yeebncuab; phau los Henplais hais tias Lexees cov yeebncuab. siab kom tuaj tawmtsam lawv. 12Cov Xilias uas nyob sab hnubtuaj thiab cov Filixatees uas nyob sab hnubpoob thiaj rua lawv tej qhovncauj tuaj nqos haivneeg Yixalayees. Txawm muaj li ntawd los tus TSWV txoj kev chim yeej tsis tau ploj mus li; Nws tseem xyab tes tuaj rautxim rau lawv tsis tseg.

13Txawm yog tus TSWV uas muaj Hwjchim Loj Kawg Nkaus twb rautxim rau cov Yixalayees lawm los lawv yeej tsis tso lawv tej kev txhaum tseg thiab yeej tsis tig rov los cuag Nws li. 14Tibhnub xwb tus TSWV yuav rautxim rau cov Yixalayees tej thawjcoj thiab tej pejxeem; Nws yuav txiav lawv lub taubhau thiab tus kotw, tej nplooj toovlaj thiab lojkov huv tibsi. 15Cov thawjcoj thiab cov muaj meejmom yog lub taubhau, thiab cov xibhwb cevlus uas qhia tej lus dag yog tus kotw! 16Cov neeg uas coj tsoom pejxeem no yog cov coj lawv yuamkev, thiab ua rau txhua tus ciali tsis totaub li lawm. 17Vimli ntawd, tus TSWV thiaj tsis txaussiab rau lawv cov tub hluas, thiab Nws yuav tsis hlub cov pojntsuam thiab cov menyuam ntsuag, rauqhov txhua tus puavleej tsis hwm tus TSWV thiab muaj lub siabphem kawg li, thiab txhua lolus uas lawv hais puavleej yog lus phem xwb. Txawm muaj li ntawd los tus TSWV txoj kev chim yeej tsis tau ploj mus li; Nws tseem xyab tes tuaj rautxim rau lawv tsis tseg.

18Cov neeg ua phem tej kev txhaum cig yam nkaus li lub cub hluavtaws uas kub tej ntoo pos thiab hmab pos. Nws kub yam nkaus li tej havzoov kubhnyiab ua rau ncho pa auv niab. 19Vim tus TSWV uas muaj Hwjchim Loj Kawg Nkaus chim heev, Nws yuav muab lub tebchaws hlawv, mas tej neeg yuav puastsuaj tag; ib leeg yuav tsis cawm ib leeg li. 20Cov pejxeem mus txeeb tau zaub-mov ntawm sab xis los noj los yeej tseem tshaib, mus txeeb tau ntawm sab laug los noj los yeej tsis tsau. Thaum kawg lawv tseem rov noj lawv tej menyuam! 21Cov Manaxes thiab cov Efalayees ib leeg tawmtsam ib leeg; thiab ob pab no sibsau tawmtsam cov Yudais. Txawm muaj li ntawd los tus TSWV txoj kev chim yeej tsis tau ploj mus li; Nws tseem xyab tes tuaj rautxim rau lawv tsis tseg.

Currently Selected:

Yaxayas 9: MWW2022

Highlight

Copy

Compare