Yaxayas 10
10
1Cov neeg uas rhawv kevcai tsis ncajncees thiab cov neeg uas sau kevcai los caijtsuj kuv haivneeg, nej yuav raug puastsuaj lau! 2Ntawd yog qhov uas nej tsis pub kom cov neeg txomnyem muaj cai thiab tau txais kev ncajncees. Ntawd yog qhov uas nej txeeb tej uas yog cov pojntsuam thiab cov menyuam ntsuag tus. 3Nej yuav ua licas thaum txog hnub uas Vajtswv rautxim rau nej? Nej yuav ua licas thaum Nws coj lwm haivneeg uas nyob deb tuaj ua kom nej puastsuaj? Nej yuav mus thov kom leejtwg pab nej? Nej yuav muab nej tej nyiaj coj mus zais rau qhovtwg? 4Nej yuav raug tua tuag tas rau hauv tshavrog lossis raug cab mus kaw. Txawm muaj li ntawd los tus TSWV txoj kev chim yeej tsis tau ploj mus li; Nws tseem xyab tes tuaj rautxim rau lawv tsis tseg.
Vajtswv Rautxim Rau Cov Axilias
5Vajtswv hais tias, “Axilias! Kuv yuav siv cov Axilias zoo li rab qws rautxim rau cov neeg uas Kuv chim rau. 6Kuv tso cov Axilias mus tawmtsam haivneeg uas tsis hwm Vajtswv, lawv yog cov uas ua rau Kuv npautaws. Kuv tso lawv mus txeeb, mus nyiag, thiab mus tsuj cov neeg ntawd ib yam li tsuj tej hmoov av hauv tej kev.”
7Tiamsis tus huabtais uas kav tebchaws Axilias nws muaj nws homphiaj yuav ua tej yam nrujtsiv. Nws npajsiab yuav ua kom ntau haivneeg puastsuaj xwb. 8Nws khav tias, “Kuv cov thawj tubrog txhua tus puavleej yog vajntxwv! 9Kuv txeeb tau lub nroog Kanaus thiab lub nroog Kakhemis, lub nroog Hamaj thiab lub nroog Apas. Kuv txeeb tau lub nroog Xamalis thiab lub nroog Damaxakas huv tibsi. 10Kuv txhais tes rautxim rau cov tebchaws uas pe mlom, cov mlom ntawd tseem ntau tshaj cov uas nyob hauv Yeluxalees thiab Xamalis. 11Kuv twb ua rau lub nroog Xamalis thiab tagnrho tej mlom uas nyob hauv puastsuaj tag lawm, Kuv yuav ua ib yam li ntawd rau lub nroog Yeluxalees thiab cov mlom uas lawv pehawm nyob rau hauv thiab.”
12Tiamsis tus TSWV hais tias, “Thaum Kuv ua Kuv tej haujlwm saum Roob Xi-oos thiab hauv Yeluxalees tas lawm, Kuv yuav rautxim rau tus huabtais uas kav tebchaws Axilias, vim nws txoj kev khavtheeb khavtxiv.”
13Tus huabtais uas kav tebchaws Axilias khav hais tias, “Kuv ib leeg yog tus ua tej haujlwm no tiav. Kuv muajzog, muaj tswvyim, thiab ntse heev. Kuv rhuav tshem lwm haivneeg tej ciam dej ciam av thiab txhav lawv tej nyiajtxiag nqa los. Kuv zoo li tus txiv nyuj uas nrau cov neeg uas nyob saum tej zwmtxwv kom poob tag. 14Txhua haivneeg uas nyob hauv ntiajteb no zoo ib yam li tej zes noog, kuv muab lawv tej nyiajtxiag yoojyim ib yam li kuv muab tej qe noog; tsis muaj leejtwg yuav ntxuaj tau tis ua kom kuv ntshai, thiab tsis muaj ib tug twg qhib ncauj nthe tau kuv.”
15Tiamsis tus TSWV hais tias, “Rab taus puas muaj peevxwm hais tau tias nws muaj hwjchim loj dua tus uas siv rab taus ntawd? Rab kaw puas tseemceeb dua tus uas siv rab kaw ntawd? Rab qws yeej nqa tsis taus tus neeg uas siv rab qws ntawd, tsuas yog tus neeg uas siv rab qws thiaj nqa taus rab qws xwb.”
16Tus TSWV uas muaj Hwjchim Loj Kawg Nkaus yuav tso ib cov kab mob yuag los rautxim rau cov tubrog uas lawv rog-rog. Hauv lawv lub nrog cev yuav kub yam li hluavtaws hlawv. 17Vajtswv, uas yog cov Yixalayees lub teeb, yuav yog qhov hluavtaws ntawd ntag. Cov Yixalayees tus Vajtswv uas Dawbhuv yuav ua tus nplaimtaws, mas tibhnub xwb yuav kub txhua yam huvsi mus, txawm yog tej hmab pos thiab tej ntoo pos los yuav kubhnyiab tag huv tibsi. 18Tej havzoov thiab tej teb yuav puastsuaj tag du lug, zoo ib yam li tus kab mob phem uas los ua rau neeg puastsuaj. 19Hauv lub havzoov ntawd tsuas tshuav tsob puav ntoo lawm xwb, txawm yog tus nyuag menyuam yaus los yeej suav txheeb.
Cov Yixalayees Tshuav Tsawg-Tsawg Leej Uas Yuav Rov Los Cuag Tus TSWV
20Muaj ib hnub tomntej cov Yixalayees uas seem yuav tsis vamkhom haivneeg uas muab lawv ua puastsuaj lawm, tiamsis lawv yuav los tsosiab plhuav rau tus TSWV uas yog lawv tus Vajtswv Dawbhuv. 21Cov Yixalayees ibtxhia yuav rov los cuag lawv tus Vajtswv uas muaj Hwjchim. 22Txawm yog cov Yixalayees coob npaum li tej xuabzeb ntawm ntug hiavtxwv los tsuas yog ibtxhia thiaj rovqab los xwb. Kev puastsuaj yeej muaj tseg cia rau neeg lawm, thiab yeej tsimnyog lawv raug kawg li. #Loos 9:27 23Tus TSWV uas kav ibpuas tsavyam, tus uas muaj Hwjchim Loj Kawg Nkaus, yuav tso kev puastsuaj los thoobplaws lub tebchaws rawsli Nws tau hais tseg lawm.
Tus TSWV Yuav Rautxim Rau Cov Axilias
24Tus TSWV uas kav ibpuas tsavyam, tus uas muaj Hwjchim Loj Kawg Nkaus, hais rau Nws haivneeg uas nyob hauv lub nroog Xi-oos tias, “Txawm yog cov Axilias nqa qws thiab nqa nplawm tuaj ntaus nej ib yam li cov Iziv tau ua rau nej yav tas los, los nej tsis txhob ntshai lawv. 25Kuv txoj kev chim rau nej twb yuav dhau, ces Kuv yuav ua kom lawv raug kev puastsuaj. 26Kuv yog tus TSWV uas muaj Hwjchim Loj Kawg Nkaus, Kuv yuav muab lawv nplawm li Kuv tau nplawm cov Midias ntawm lub Pobzeb Aules. Kuv yuav nplawm cov Axilias ib yam li Kuv tau nplawm cov Iziv. 27Muaj ib hnub tomntej, Kuv yuav tso kom nej dim ntawm cov Axilias lub hwjchim, lawv tus quab yuav tsis ua lub nra hnyav rau saum nej xubpwg lawm.”#10:27: Phau lus Henplais muaj 3 lolus ntxiv uas tsis paub lub ntsiab meej.
Cov Axilias Txhij Tubrog
28Cov tubrog Axilias tau mus txeeb lub nroog A-is.#10:28: A-is: Lub nroog no thiab lwm thaj chaw uas hais nyob hauv nqe 28-32, yog nyob ze lub nroog Yeluxalees, ntawm txojkev uas cov yeebncuab tuaj pem sab qaumteb tuaj tua lawv. Lawv tuaj dhau lub nroog Minkeloos. Lawv tau muab lawv tej khoom tso rau hauv lub nroog Mikemas. 29Lawv hla dhau plaws lub kwjha rau sab tid, thiab lawv pw ib hmos hauv lub nroog Nkenpas. Cov pejxeem hauv lub nroog Lamas ntshai heev, thiab cov neeg uas nyob hauv Vajntxwv Xa-us lub zos Nkinpe-as tau khiav tag li lawm. 30Cov neeg Nkalis 'e, nej ciali quaj qw! Cov neeg Laisas 'e, nej ciali mloog! Cov neeg Anathaus 'e, nej ciali teb! 31Cov neeg Mamenas tabtom khiav, thiab cov neeg Nkenpis tabtom khiav nkaum. 32Hnubno yeebncuab twb tuaj nyob puv tas rau hauv lub moos Nau lawm, thiab lawv yuav yom nrig rau lub Roob Xi-oos, uas yog lub nroog Yeluxalees lub roob.
33Tus TSWV uas muaj Hwjchim Loj Kawg Nkaus yuav muab lawv txo kom poob ib yam li txo tej ceg ntoo. Tus uas khavtheeb tshajplaws thiab tsa hwjchim siab tshajplaws yuav raug muab ntov thiab poob tsim. 34Tus TSWV yuav muab lawv ntov ib yam li xuas taus ntov ntoo hauv plawv zoov, txawm yog tej ntoo uas zoo tshajplaws hauv Roob Lenpanoos los yeej yuav vau tag tibsi! #Yaxaya 14:24-27; Nahus 1:1—3:19; Xefani 2:13-15
Currently Selected:
Yaxayas 10: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
