Yaxayas 6
6
Vajtswv Hu Yaxayas Ua Tus Cev Vajtswv Lus
1Xyoo uas Vajntxwv Uxiyas tuag, kuv pom tus TSWV. Nws nyob saum Nws lub zwmtxwv uas nyob siab heev, thiab Nws lub tsho ntev nthuav puvnkaus hauv lub Tuamtsev. 2Muaj ib co xelafees sawv puagncig Nws; ib tug xelafees twg muaj rau phab tis. Ob phab tis npog ntsejmuag, ob phab tis npog lub cev, thiab ob phab tis ya. 3Lawv ib tug hais rau ib tug tias:
“Dawbhuv, dawbhuv, dawbhuv!
Tus TSWV uas muaj Hwjchim Loj Kawg Nkaus yog tus dawbhuv!
Nws tus tshwjchim ci ntsa-iab puvnkaus lub ntiajteb.” #Tshwm 4:8
4Lawv tej suab haislus ntawd ua rau lub plag Tuamtsev uazog koog thiab muaj pa ncho auv niab puvnkaus lub Tuamtsev. #Tshwm 15:8
5Kuv hais tias, “Kuv yeej tsis muaj chaw ciasiab hlo li! Kuv yuav raug kev puastsuaj lau! Rauqhov txhua lolus uas tawm ntawm kuv daim dincauj mus yeej tsis huv, thiab kuv ua neej nrog ib cov neeg uas hais txhua lolus uas tsis huv. Txawm li ntawd los kuv lub qhovmuag tau pom tus Vajntxwv, uas yog tus TSWV muaj Hwjchim Loj Kawg Nkaus lawm.”
6Ces txawm muaj ib tug xelafees ya los rau ntawm kuv, nws muab ciaj tais tau ib lub ncaigtaws cig liabploog ntawm lub thaj nqa los. 7Nws muab twb rau kuv ob daig dincauj thiab hais tias, “Lub ncaigtaws no tau chwv koj ob daig dincauj lawm; zaumno koj lub txim raug muab rho mus lawm, thiab koj tej kev txhaum twb raug zam tas lawm.”
8Ces kuv hnov tus TSWV hais tias, “Kuv yuav txib leejtwg mus? Leejtwg yuav ua tus sawv peb cev mus?”
Kuv thiaj teb tias, “Kuv nyob ntawm no! Thov txib kuv mus!”
9Yogli ntawd Nws thiaj hais rau kuv tias, “Koj ciali mus thiab hais rau cov pejxeem sawvdaws li no: ‘Nej mloog tas mloog thiab, los yeej tsis totaub. Nej saib tas saib thiab, los yeej tsis paub li.’ ” 10Ces nws hais rau kuv tias, “Ciali ua kom haivneeg no lub siab ruam qhwv, pobntseg lag, thiab qhovmuag dig, kom lawv thiaj tsis pomkev, tsis hnov lus, thiab tsis totaub. Yog tsis ua li ntawd, nyobtsam lawv ho tig los cuag Kuv ces lawv ciali zoo lawm.” #Math 13:14-15; Malak 4:12; Lukas 8:10; Yauh 12:40; Teshl 28:26-27
11Kuv thiaj nug hais tias, “Tus TSWV, yuav zoo li no mus txog thaum twg?”
Nws teb tias, “Mus txog thaum tej nroog raug puastsuaj tag tsis muaj neeg nyob lawm—mus txog thaum tej tsev khoob lug tsis muaj neeg nyob—mus txog thaum lub tebchaws nyob qhuav nquas cia. 12Kuv yuav xa cov neeg ntawd mus kom deb, thiab kom lub tebchaws nyob qhuav nquas cia. 13Txawm yog muaj ib tug neeg ntawm kaum tug tseem nyob rau hauv lub tebchaws, los nws yeej yuav raug puastsuaj mus. Nws yuav zoo yam li tej ntoo qhib uas luag muab ntov tas tshuav lub hauvpaus lawm xwb.”
(Lub hauvpaus ntoo ntawd piv txog Vajtswv haivneeg uas pib hlav tuaj dua tshiab.)
Currently Selected:
Yaxayas 6: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
