Yaxayas 5
5
Zaj Nkauj Hais Txog Lub Vaj Txivhmab
1Kuv yuav hunkauj rau tus uas kuv hlub mloog,
zaj nkauj hais txog Nws lub vaj txivhmab:
Tus uas kuv hlub muaj ib lub vaj txivhmab
nyob saum lub ncov roob uas av zoo heev.
2Nws khawb av thiab khaws tej pobzeb tawm,
Nws cog tej yub txivhmab zoo heev rau.
Nws ua ib lub chaw tsomfaj zov tej txivhmab ntawd,
thiab khawb ib lub qhov ua chaw tsuam txivhmab.
Nws tos rawv kom tej txivhmab siav,
tiamsis tej txivhmab qaub kawg li. #Math 21:33; Malak 12:1; Lukas 20:9
3Tus uas kuv hlub hais tias, “Zaumno nej cov uas nyob hauv lub nroog Yeluxalees thiab Yudas, nej ciali txiavtxim nruabnrab ntawm Kuv thiab Kuv lub vaj txivhmab. 4Puas muaj tej yam dabtsi uas Kuv tsis tau ua rau Kuv lub vaj txivhmab? Vim licas Kuv twb xav kom cov txivhmab no qabzib, tiamsis ho qaub?
5“Zaumno cia Kuv qhia rau nej paub txog qhov uas Kuv yuav ua rau Kuv lub vaj txivhmab. Kuv yuav muab tej lajkab pos uas xov ncig lub vaj rhuav povtseg, muab tej ntsa vaj tsoo povtseg, thiab cia tej tsiaj qus los noj thiab tsuj rau hauv av. 6Kuv yuav ua kom lub vaj txivhmab no tuaj nrojtsuag. Kuv yuav tsis tav ntsis lossis npoog av rau tej hauvpaus; Kuv yuav cia pos tshauv thiab pos rau tshws tuaj laum nws. Kuv yuav txwv tej huab kom tsis txhob muaj nag los ywg lub vaj.”
7Cov Yixalayees yog tus TSWV uas muaj Hwjchim Loj Kawg Nkaus lub vaj txivhmab;
cov Yudais yog cov txivhmab uas Nws cog rau.
Nws ciasiab ntsoov tias lawv yuav ua neeg zoo,
tiamsis lawv ho ua neeg tua neeg.
Nws ciasiab ntsoov tias lawv yuav ua qhov yog,
tiamsis cov neeg uas raug lawv tsimtxom quaj qw kom muaj kev ncajncees.
Tej Kev Phem Uas Neeg Ua
8Nej yuav raug kev puastsuaj lau! Nej yuav ntau lub tsev thiab ntau thaj teb los ntxiv rau tej uas nej twb muaj lawm. Tsis ntev yuav tsis muaj chaw rau lwmtus nyob, tsuas tshuav nej nyob hauv lub tebchaws ntawd lawm xwb. 9Kuv hnov tus TSWV uas muaj Hwjchim Loj Kawg Nkaus hais tias, “Tagnrho tej tsev loj thiab zoonkauj no yuav puastsuaj mus thiab tsis muaj neeg nyob. 10Cog kaum daim teb txivhmab, thaum siav tsuas tsuam tau 22 liv cawv xwb, thiab tseb kaum kawm noob nplej, thaum siav tsuas sau tau ib kawg xwb.”
11Nej yuav raug kev puastsuaj lau! Nej sawvntxov tsees los haus cawv, thiab nyob tsheej tashmo haus cawv kom nej ntog. 12Nyob rau nej tej rooj noj rooj haus, nej muaj nkauj nogncas, muaj tej nruas npuaj, muaj raj, thiab muaj cawv. Tiamsis nej yeej tsis quavntsej tus TSWV lossis hwm txog tej uas Nws txhais tes tau ua, 13yogli ntawd, nej thiaj yuav raug coj mus yam li cov neeg raug txim vim nej txoj kev tsis totaub. Nej cov thawjcoj yuav tuag tshaib thiab nej cov pejxeem yuav tuag nqhis. 14Tubtuag teb tshaib nqhis heev, nws rua ncauj ras tos lawv. Tubtuag teb yuav nqos cov muaj meejmom hauv lub nroog Yeluxalees nrog cov pejxeem uas qw ua nqaj ua nqug mus kom tas.
15Txhua tus yuav poob ntsejmuag, thiab tagnrho tej neeg khavtheeb yuav raug txo hwjchim. 16Tiamsis tus TSWV uas muaj Hwjchim Loj Kawg Nkaus yuav qhia Nws lub hwjchim los ntawm Nws txoj kev ncajncees, thiab qhia Nws txoj kev dawbhuv los ntawm qhov uas Nws txiavtxim rau Nws haivneeg. 17Yaj yuav noj nyom thiab tej menyuam tshis yuav ntsib lub tshav zaub mos uas tuaj hauv tej nroog uas puastsuaj tag lawm.#5:17: Nqe 17 no paub tsis meej tias lolus Henplais yog txhais licas tiag.
18Nej cov uas cab kev txhaum thiab cab kev phem kev qias nrog nej, los ntawm nej tej lus dag, nej yuav raug kev puastsuaj lau! 19Nej hais tias, “Cia tus TSWV majnroos thiab ua rawsli Nws hais tias Nws yuav ua, kom peb thiaj yuav pom. Cia cov Yixalayees tus Vajtswv uas dawbhuv ua rawsli tej uas Nws tau npaj tseg lawm, kom peb thiaj yuav paub.”
20Nej cov uas muab yam phem suav ua yam zoo thiab muab yam zoo suav ua yam phem, muab qhov kaj ntxeev ua qhov tsaus thiab muab qhov tsaus ntxeev ua qhov kaj, muab yam qabzib hloov ua yam iab thiab muab yam iab hloov ua yam qabzib, nej yuav raug kev puastsuaj lau!
21Nej cov uas xav tias nej ntse thiab muaj tswvyim heev, nej yuav raug kev puastsuaj lau!
22Cov uas haus cawv ua tau heev, thiab cov uas siab tawv tsis ntshai txog kev muab cawv sibtov haus hlo li, nej yuav raug puastsuaj lau! 23Tiamsis nej txais yuav tej nyiaj xiab thiab tso tus neeg uas muaj txim tawm nyob ywjsiab, thiab rautxim rau tus neeg ncajncees. 24Yogli ntawd, tej quavnyab npleg thiab tej nroj puamkhab kubhnyiab licas, nej tej cag yuav lwj, nej tej paj yuav qhuav, thiab cua yuav muab ntsawj ya tas ib yam li ntawd, vim nej tsis lees paub tus TSWV uas muaj Hwjchim Loj Kawg Nkaus txoj kevcai, uas cov Yixalayees tus Vajtswv uas dawbhuv tau qhia rau peb. 25Tus TSWV chim heev rau Nws haivneeg, Nws thiaj tsa Nws txhais tes rautxim rau lawv. Tej hauv roob yuav uazog koog, thiab cov neeg tuag lub cev yuav xyab pawglug rau hauv tej plawvkev li tej liamsim. Txawm yog twb muaj npaum li no los tus TSWV txoj kev chim tseem tsis paub xaus li, Nws tseem pheej tsa tes rautxim tas zog.
26Tus TSWV ua ib yam cim hu ib lub tebchaws uas nyob deb heev,#5:26: Nqe no sau hais tias lub tebchaws uas nyob deb heev; phau lus Henplais hais tias cov tebchaws uas nyob deb. Nws xuav hu kom lawv tuaj tim qabntug tuaj. Mas lawv tuaj lawm tiag lau! Lawv tsosas ceev kawg li! 27Lawv cov ntawd yeej tsis muaj leejtwg nkees thiab tsis muaj leejtwg ntog li. Lawv yeej tsis ncaws lossis tsaugzog hlo li. Lawv tej hlab sia los tsis xoob; tej hlua khau los tsis tu. 28Lawv tej xub hnee los zuag, thiab lawv tej hneevnti los yeej npaj txhij lawm. Lawv cov nees tej rau mas tawv cuag li pobzeb, thiab lawv tej log tsheb nees mas ntog zoo li khaubzeeg cua. 29Cov tubrog nyoojlaws ib yam li tej tsov ntxhuav uas tom tau tsiaj thiab kwv mus rau qhov chaw uas tsis muaj tus los txeeb tau ntawm lawv.
30Thaum txog hnub ntawd, lawv yuav nyooj nrov heev thoobplaws lub tebchaws Yixalayees npaum nkaus li dej hiavtxwv ntas. Tig saib lub tebchaws no seb! Tsuas pom kev tsausntuj thiab kev nyuajsiab lawm xwb! Kev tsausntuj muab kev kaj laum tas lawm.
Currently Selected:
Yaxayas 5: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
