Yaxayas 7

Cov Lus Uas Hais Rau Vajntxwv Ahaj

1Thaum Vajntxwv Ahaj, uas yog Yauthas tus tub thiab yog Uxiyas tus xeebntxwv, kav lub tebchaws Yudas, lub tebchaws tau sawv rog. Lexees, uas ua vajntxwv kav tebchaws Xilias, thiab Pekas uas yog Lemaliyas tus tub, uas ua vajntxwv kav tebchaws Yixalayees, tau tuaj tua Yeluxalees, tiamsis lawv txeeb tsis tau. #2Vaj 16:5; 2Xwm 28:5-6

2Thaum muaj neeg mus qhia rau cov Yudais tus vajntxwv paub tias cov Xilias tau tuaj tsuam yeej rau hauv cheebtsam Yixalayees lawm, nws thiab nws cov pejxeem txawm ntshai ua ibce tshee laim dais cuag li cua ntsawj tej ntoo uas nyob hauv havzoov.

3Tus TSWV hais rau Yaxayas tias, “Koj coj koj tus tub Se-as Yasus,#7:3: Se-as Yasus: Lub npe no lus Henplais txhais hais tias “Muaj qeeleej yuav rovqab los” (saib 10:20-22). mus cuag vajntxwv Ahaj. Neb yuav ntsib nws ntawm ntu kev qhov chaw uas cov neeg ntos ntaub ua haujlwm, ntawm tus kwjdeg uas los pem lub pas dej theem saum toj los xaus nkaus. 4Hais kom nws ceevfaj tsis txhob ua lub siab ywjfab ywjfwj, tsis txhob ntshai lossis nyuajsiab hlo li. Vajntxwv Lexees thiab nws cov pejxeem Xilias thiab Vajntxwv Pekas uas yog Lemaliyas tus tub, txoj kev npautaws ces tsuas zoo li ob yav nyuag qab taws uas ncho-ncho pa xwb. 5Vim cov Xilias tau tuaj nrog cov Yixalayees thiab lawv tus vajntxwv ntxeevsiab tawmtsam koj, lawv hais tias 6lawv npajsiab yuav mus tua lub tebchaws Yudas, ua kom cov pejxeem ntawd ntshai thiab ciali los tuaj lawv tog, ces muab Tanpees tus tub tsa ua vajntxwv kav lub tebchaws ntawd.

7“Tiamsis Kuv, uas tus TSWV, hais tias tej xwm no yuav tsis tshwmsim ib zaug li. 8Vim licas? Rauqhov cov Xilias twb tsis muajzog npaum li lub tuamceeb nroog Damaxakas, thiab Damaxakas tsis muajzog npaum li Vajntxwv Lexees. Tshuav li ntawm raucaum-tsib xyoos lawm xwb, haivneeg Yixalayees yuav tawg uasab uasua tas, ua tsis tsheej ib haivneeg lawm. 9Yixalayees yuav tsis muajzog npaum li lub tuamceeb nroog Xamalis, thiab Xamalis yuav tsis muajzog npaum li Vajntxwv Pekas.

“Yog koj txoj kev ntseeg tsis ruaj tsis khov, koj yeej yuav tsis ruaj tsis khov.”

Lub Cim Uas Qhia Txog Emanuees

10Tus TSWV hais dua ib zaj ntxiv rau Ahaj tias: 11“Ciali thov tus TSWV uas yog koj tus Vajtswv, ua ib yam cim kom tshwmsim rau koj pom. Txawm yog tawm hauv tubtuag teb qhov uas tob tshajplaws lossis tawm saum qaumntuj qhov uas siab tshajplaws tuaj los xij.”

12Tiamsis Ahaj teb tias, “Kuv yuav tsis thov ib yam cim dabtsi thiab kuv yuav tsis kam sim tus TSWV siab.”

13Yaxayas teb tias, “Vajntxwv Daviv li cajces, nej ciali mloog kuv hais. Qhov uas nej ua rau neeg tsivsiab es lawv ua tsis taus siabntev, tseem tsis tau txaus nej siab thiab lov? Nej tseem yuav ua kom Vajtswv tsivsiab thiab ua tsis taus siabntev thiab lov? 14Yogli ntawd, tus TSWV yuav ua ib yam cim tseemceeb rau nej pom: ib tug nkaujxwb#7:14: nkaujxwb: Lolus no lus Henplais txhais hais tias “hluasnkauj” tsis yog kiag tus “nkaujxwb,” tiamsis yog tej hluasnkauj uas yuav nyog txiv lawm. Lolus “nkaujxwb” nyob hauv Math 1:23, txhais ua lus Kilis tawm hauv Phau Vajluskub Qub, 500 xyoo tomqab Yaxayas. yuav xeebtub thiab yuav yug tau ib tug Metub, nws yuav muab tis npe hu ua ‘Emanuees.’#7:14: Emanuees: Lub npe no lus Henplais txhais hais tias, “Vajtswv nrog peb nyob.” #Math 1:23 15Thaum Nws loj txaus thiab paub txiavtxim siab tsis nyiam qhov phem tiamsis nyiam qhov zoo lawm, Nws yuav haus mis nyuj thiab noj zib ntab.#7:15: haus mis nyuj thiab noj zib ntab: Yog cov Yixalayees tej zaub-mov uas nyob rau hauv lawv li keebkwm. 16Tiamsis uantej uas tus metub ntawd paub tsis nyiam qhov phem thiab nyiam qhov zoo, ob tus vajntxwv uas uanruj uatsiv rau koj ntshai ntawd, ob lub tebchaws yuav nyob nphobxuav cia.

17“Tus TSWV yuav coj kev txomnyem lwjsiab los rau koj, rau koj cov pejxeem, thiab tagnrho koj txiv tsev neeg; thaum ntawd nej yuav raug kev txomnyem heev tshaj txhua zaus, txij thaum cov Yixalayees faib tebchaws tawm ntawm cov Yudais—Nws yuav coj tus vajntxwv kav cov Axilias tuaj tua nej.

18“Hnub ntawd, tus TSWV yuav xuav hu cov neeg Iziv kom sau nthwv tuaj ib yam li yoov ya tim ntug Dej Nais tuaj, thiab hu cov neeg Axilias kom sau nthwv hauv lawv lub tebchaws tuaj ib yam li xub ntab. 19Lawv yuav tuaj sibsau ua npoj ntws rau hauv tej hav, tej kis pobzeb ntawm tej roob zeb, thiab lawv yuav nyob puvnkaus ntawm tej hav pos thiab tej nras puamkhab.

20“Hnub ntawd, tus TSWV yuav ntiav ib tug txiav plaubhau tuaj sab tim tus Dej Yufatis tuaj—uas yog cov Axilias tus vajntxwv ntag! Nws yuav chais nej cov plaubhau, nej cov hwjtxwv, thiab nej tej plaub thoobplaws ibce.

21“Hnub ntawd, txawm yog tus tswv teb tsuas cawm tau ib tug xyuas nyuj thiab ob tug maum tshis xwb los 22tus xyuas nyuj thiab ob tug maum tshis ntawd yuav muaj kua mis ntau heev, txaus nkaus rau tus tswv teb. Cov neeg uas seem nyob hauv lub tebchaws yuav muaj mis nyuj thiab zib ntab nojhaus tsis tas li.

23“Hnub ntawd, tej vaj txivhmab zoo-zoo, uas muaj 1,000 tsob txivhmab, ib tsob twg ntaus nqi 1,000 lub txiajnyiag, los tsuas yog muaj tej hmab pos thiab ntoo pos lawm xwb. 24Neeg yuav nqa hneevnti thiab xubvos mus plhob tua tsiaj hauv tej vaj ntawd. Yuav muaj hmab pos thiab ntoo pos tuaj puvnkaus hauv lub tebchaws ntawd. 25Tej povroob uas ibtxwm zoo ua teb cog qoob cog loo, los yuav tuaj hmab pos puvnkaus, yuav tsis muaj leejtwg mus rau hauv li lawm. Yuav ua chaw rau tej nyuj thiab tej yaj mus noj zaub lawm xwb.”

Currently Selected:

Yaxayas 7: MWW2022

Highlight

Copy

Compare