Yaxayas 49
49
Yixalayees Yog Lub Teeb Rau Ntau Haivneeg
1Cov tebchaws uas nyob raws ntug hiavtxwv,
cov neeg uas nyob deb, nej ciali mloog kuv hais.
Uantej kuv yug, tus TSWV twb xaiv kuv
thiab Nws twb tis kuv lub npe thaum kuv tseem nyob hauv niam plab lawm. #Yelemi 1:5
2Nws ua rau kuv tej lus ntse npaum nkaus li hniav ntaj.
Nws muab Nws txhais tes tivthaiv kuv.#49:2: Nws txhais tes tivthaiv kuv; lossis Nws muab kuv zais rau hauv Nws txhais tes.
Nws ua rau kuv zoo li ib tug xibxub,
uas ntse heev thiab npaj rawv tos tua lawm xwb. #Henpl 4:12; Tshwm 1:16
3Nws hais rau kuv tias, “Yixalayees, koj yog Kuv tus tubtxib;
koj yog tus uas yuav ua rau Kuv tau koobmeej.”
4Kuv hais tias, “Kuv twb ua haujlwm khwv heev, tiamsis tsis tau dabtsi li!
Kuv siv tagnrho kuv lub zog, tiamsis ua tsis tiav dabtsi li.
Txawm li ntawd los kuv tso txhua yam rau ntawm tus TSWV txhais tes;
kuv tej nqizog yog nyob rau ntawm kuv tus Vajtswv.”
5Uantej kuv yug, tus TSWV twb tsa kuv lawm;
Nws tsa kuv ua Nws tus tubtxib mus coj Nws haivneeg rovqab los,
mus coj haivneeg Yixalayees uas tawg uasab uasua lawm, rovqab los rau Nws.
Tus TSWV yog tus muab lub meejmom rau kuv,
thiab Nws yeej ibtxwm yog kuv lub zog.
6Tus TSWV hais rau kuv tias,
“Kuv tus tubtxib, Kuv muaj ib tes haujlwm loj dua yav tas los rau koj.
Tsis yog koj yuav ua rau cov Yixalayees uas tseem seem nyob, rov vammeej tshaj qub xwb,
tiamsis Kuv yuav ua kom koj yog lub teeb rau txhua haivneeg,
kom txhua tus neeg hauv ntiajteb muaj kev cawmdim.” #Yaxaya 42:6; Lukas 2:32; Teshl 26:23; Teshl 13:47
7Cov Yixalayees tus Vajtswv uas dawbhuv thiab tus Cawmseej
hais rau tus uas raug ntau haivneeg thuam thiab ntxub,
thiab tus uas raug ua tej nomtswv qhev tias,
“Tej vajntxwv yuav pom koj raug tso,
mas lawv yuav sawv hwm koj;
tej nomtswv yuav puavleej pom koj,
mas lawv yuav khoov hawm koj.
Rauqhov tus TSWV uas ncajncees,
cov Yixalayees tus Vajtswv uas dawbhuv, twb xaiv koj lawm.”
Txhimkho Lub Nroog Yeluxalees Dua
8Tus TSWV hais tias,
“Thaum txog Kuv lub sijhawm lawm, Kuv yuav teb koj,
thaum txog hnub uas cawmdim lawm, Kuv yuav pab koj.
Kuv yuav tsomkwm thiab tivthaiv koj
thiab koj yuav yog Kuv lolus cogtseg rau lwm haivneeg.
Kuv yuav cia koj rov mus kho
thiab muab lub tebchaws faib rau koj cov neeg nyob. #2Klt 6:2
9Kuv yuav hais rau cov neeg uas raug luag ntes tias, ‘Ciali tawm los rau ntawm txoj kev ywjpheej!’
Thiab hais rau cov uas nyob hauv qhov tsausntuj nti tias,
‘Ciali tawm los rau ntawm qhov pomkev!’
Lawv yuav zoo li tej yaj uas noj zaub saum tej roob uas docuas;
10thiab yuav tsis raug kev tshaib kev nqhis.
Lub hnub thiab tej cua sov tom tiaj suabpuam yuav tsis kub lawv,
vim tus uas hlub lawv yuav coj lawv kev.
Nws yuav coj lawv mus rau ntawm tej chaw uas muaj dej txhawv. #Tshwm 7:16-17
11“Kuv yuav ua kev rau saum tej roob,
thiab ua ib txoj niamkev loj rau Kuv haivneeg taug.
12Kuv haivneeg yuav los deb-deb los,
lawv yuav los sab qaumteb thiab sab hnubpoob los,
thiab los hauv lub nroog Axavas#49:12: Axavas: Yog ib lub nroog uas nyob hauv tebchaws Iziv sab qabteb, uas yog ib qhov chaw thaum ub cov Yudais nyob coob heev. uas nyob sab qabteb los.”
13Lub ntuj, ciali hunkauj! Lub ntiajteb, ciali qw zoosiab!
Cia tej tojroob hauvpes tsa suab hunkauj!
Tus TSWV yuav nplig Nws haivneeg siab;
Nws yuav tabncuab Nws haivneeg uas raug kev txomnyem.
14Tiamsis Yeluxalees hais tias,
“Tus TSWV twb tso kuv tseg lawm!
Tus TSWV hnovqab kuv lawm.”
15Yogli ntawd, tus TSWV thiaj teb tias,
“Puas muaj ib leejniam uas ciali hnovqab tus menyuam mos ntawm nws lub ntiag,
thiab ciali tsis hlub tus menyuam uas nws yug?
Txawm yog leejniam hnovqab tau nws tus menyuam los xij,
Kuv yeej yuav tsis hnovqab koj ib zaug li.
16Yeluxalees, koj saib maj, Kuv twb muab koj lub npe saum rau hauv Kuv ob lub xibteg lawm.
Koj yeej nyob rawv hauv Kuv lub siab.
17“Tshuav tsis ntev cov neeg uas yuav txhimkho koj twb yuav los,
thiab cov neeg uas rhuav tshem koj twb yuav khiav mus.
18Ciali tsa qhovmuag saib puagncig!
Koj haivneeg tabtom sibsau uake—lawv yuav rov los tsev!
Kuv yog tus uas muaj sia nyob,
koj yuav zoosiab rau koj haivneeg
ib yam li tus nkaujnyab zoosiab rau nws tej npauj nyiag npauj kub.
19“Koj lub tebchaws raug puastsuaj thiab nyob docuas cia,
nimno lub tebchaws yuav tsis txaus
cov neeg uas tabtom los ntawd nyob.
Thiab cov neeg uas ua rau koj puas tag lawm
yuav raug muab raws kom khiav mus deb heev.
20Muaj ib hnub koj cov menyuam uas yug thaum koj raug luag ntes mus,
yuav hais rau koj tias,
‘Lub chaw no nqaim heev,
peb xav tau thaj chaw uas dav dua no los rau peb nyob!’
21Ces koj yuav xav hauv koj lub siab tias,
‘Leejtwg yug cov menyuam no rau kuv?
Kuv cov menyuam twb tuag tas thiab kuv twb muaj tsis taus menyuam lawm.
Kuv raug luag ntes coj mus nyob rau lwm lub tebchaws uas deb heev,
leejtwg yog tus tu cov menyuam no lojhlob?
Tshuav kuv ib leeg nyob lawm xwb,
tej menyuam no tseem los qhovtwg los thiab?’ ”
22Tus TSWV uas kav ibpuas tsavyam hais tias:
“Saib maj, Kuv yuav co tes rau txhua haivneeg,
mas lawv yuav coj koj cov menyuam los tsev.
23Tej vajntxwv yuav zoo li koj txiv,
tej poj vajntxwv yuav zoo li koj niam.
Lawv yuav nyo hau qis heev rau ntawm koj thiab hawm koj;
lawv yuav yaim tej hmoov av uas lo koj kotaw.
Ces koj yuav paub tias Kuv yog tus TSWV;
cov neeg uas tog rawv Kuv txoj kev pab, yeej yuav tsis nkim lawv los zog kiag li.”
24Leejtwg thiaj yuav muaj peevxwm mus muab tau tej khoom uas cov tubrog mus huab tau los?
Leejtwg thiaj yuav muaj peevxwm mus tso tau cov neeg uas raug kaw ntawm tus neeg limhiam los?
25Tus TSWV teb tias,
“Txawm yog cov uas raug cov tubrog ntes, los Kuv yuav mus tso lawv los;
thiab tej khoom uas cov neeg limhiam huab tau, los Kuv yuav mus muab los huv tibsi.
Kuv yuav tawmtsam cov neeg uas tawmtsam koj,
thiab Kuv yuav cawm koj cov menyuam kom dim.
26Kuv yuav ua kom cov neeg uas tsimtxom koj rov sibtua
lawv yuav qaugntshav ib yam li cov neeg qaugcawv.
Ces thaum ntawd txhua haivneeg yuav paub tias Kuv yog tus TSWV,
yog koj tus Cawmseej thiab yog tus uas tso koj dim.
Lawv yuav paub tias Kuv yog Yixalayees tus Vajtswv uas muaj Hwjchim Loj Kawg Nkaus.”
Currently Selected:
Yaxayas 49: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
