Yaxayas 50
50
1Tus TSWV hais tias,
“Nej xav tias Kuv tso Kuv haivneeg tseg,
yam li tus txivneej uas muab nws tus pojniam nrauj no lov?
Daim ntawv nrauj ntawd nyob qhovtwg?
Nej xav tias Kuv muab nej muag rau cov uas Kuv tshuav nqi,
yam li tus txivneej uas muab nws cov menyuam muag mus ua qhev no lov?
Tsis yog li ntawd, nej raug muag vim yog nej tej kev txhaum;
nej niam raug muab xa mus, vim yog nej tej kev txhaum uas nej ua xwb.
2“Vim licas thaum Kuv los,
ho tsis muaj ib tug neeg nyob ntawd?
Vim licas thaum Kuv hu, ho tsis muaj ib tug neeg teb li?
Kuv txhais npab luv heev, pab tsis tau nej lov?
Kuv tsis muaj hwjchim cawm tau nej no lov?
Kuv muaj peevxwm xaaj kom
dej hiavtxwv nqhuab thiab muab tej havdej hloov ua suabpuam,
kom tej ntses tuag vim lawv tsis muaj dej haus.
3Kuv muaj peevxwm ua kom lub ntuj tsaus nti,
cuag li tej neeg hnav hnabtsaj tuaj quaj rau tus tuag.”
Tus Tubtxib Uas Mlooglus
4Tus TSWV uas kav ibpuas tsavyam tau pub ib tug nplaig uas muaj tswvyim rau kuv,
kom kuv thiaj txawj txhawb cov neeg uas qaugzog.
Txhua tagkis Nws pub kuv muaj lub siab kublug
los mloog tej uas Nws yuav qhia rau kuv.
5Tus TSWV pub txoj kev totaub rau kuv,
kuv thiaj tsis ntxeevsiab
lossis khiav tawm ntawm Nws mus.
6Kuv tseem txaussiab tig nrobqaum rau cov neeg uas nplawm kuv.
Txawm lawv saib tsis taus kuv, los kuv tsis cheem lawv;
txawm lawv rub kuv cov hwjtxwv thiab nto qaubncaug rau kuv
los kuv twb tsis tig kuv lub ntsejmuag tawm ntawm lawv mus. #Math 26:67; Malak 14:65
7Lawv tej lus thuam tsis mob kuv li,
rauqhov tus TSWV uas kav ibpuas tsavyam twb pab kuv lawm.
Kuv tswj kuv tuskheej kom khovkho,
vim kuv paub tias kuv yeej tsis raug kev txajmuag ib zaug li.
8Vajtswv yog tus nyob ze kuv,
mas Nws yuav ua kom lawv paub tias kuv tsis muaj txim.
Leejtwg thiaj yuav liamtxim tau rau kuv?
Cia peb uake mus rau hauv tsev tu plaub!
Cia nws coj nws tej lus kom tuaj kom kuv!
9Tus TSWV uas kav ibpuas tsavyam yog tus pab kuv,
leejtwg thiaj yuav hais tau tias kuv muaj txim?
Txhua tus uas liamtxim rau kuv yuav ploj tas
yam li tej tsoostsho uas ntsaum kabrwg muab noj tas lawm. #Loos 8:33-34
10Nej txhua tus uas hwm tus TSWV
thiab mloog Nws tus tubtxib tej lus,
txawm yog nej taug txojkev uas tsausntuj nti
los ncontsoov ciasiab rau tus TSWV thiab tsosiab plhuav rau nej tus Vajtswv.
11Nej txhua tus uas tuav tswvyim txov lwmtus,
nej tej tswvyim ntawd yuav rov los txov nej.
Tus TSWV yuav ua kom tej ntawd los raug nej;
nej yuav raug kev txomnyem loj kawg li.
Currently Selected:
Yaxayas 50: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
