Yaxayas 48
48
Vajtswv Yog Tus TSWV Rau Yav Tomntej
1Cov Yixalayees, uas yog Yudas cajces,
nej ciali mloog tej lus no:
Nej tuav tus TSWV lub npe coglus
thiab nej thov cov Yixalayees tus Vajtswv,
tiamsis nej twb tsis ncajncees rau nej tej lus ntawd.
2Nej hais tias nej yog cov pejxeem
uas nyob hauv lub nroog dawbhuv,
thiab tsosiab rau cov Yixalayees tus Vajtswv,
tus uas muaj lub npe hu ua tus TSWV uas muaj Hwjchim Loj Kawg Nkaus.
3Tus TSWV hais rau cov Yixalayees tias,
“Thaum ub Kuv twb hais lawm tias yuav muaj dabtsi tshwmsim los;
yogli ntawd, tibpliag ntshis xwb, Kuv thiaj ua kom tej ntawd tshwm los.
4Kuv yeej paub tias nej tawv ncauj npaum licas,
nej lub cajdab tawv npaum li hlau
thiab nej lub hauvpliaj tawv npaum li toojdag.
5Yogli ntawd Kuv thiaj xub qhia txog nej lub neej yav tomntej rau nej paub thaum ub lawm,
qhia uantej uas tej ntawd tshwmsim los,
kom nej khav tsis tau tias
yog nej tej mlom ntoo lossis mlom tooj ua kom tej ntawd tshwmsim los.
6“Nej twb hnov thiab pom tej ntawd lawm;
nej yuavtsum lees paub tias tej uas Kuv hais ntawd yeej muaj tseeb.
Zaumno Kuv yuav qhia tej yam tshiab uas tseem yuav muaj rau nej paub,
uas yog tej yam nej tsis tau paub dua li.
7No yog tej uas Kuv ua dua tshiab, tsis yog tej qub thaum ub;
yog tej uas nej yeej tsis tau hnov dua li.
Yog nej hnov lawm, nej yuav khav tias nej twb paub tag lawm.
8Nej yeej ibtxwm tsis hnov thiab yeej tsis totaub,
txij thaum ub los nej lub pobntseg yeej tsis qhib.
Kuv twb paub tias nej lub siab yeej tsis ncaj,
thiab nej yeej yog neeg ntxeevsiab thaum yug tau nej los lawm.
9“Vim Kuv saib rau saum Kuv lub npe,
Kuv thiaj cheem Kuv txoj kev chim tseg;
thiab thiaj tsis ua rau nej puastsuaj.
10Kuv tau muab nej nchuav dua tshiab,
tiamsis tsis yog zoo li nchuav nyiaj hauv lub yeejvub.
Kuv muab nej nchuav hauv lub yeejvub uas yog txoj kev nyuajsiab.
11Qhov uas Kuv ua no yog Kuv saib rau saum Kuv lub npe xwb.
Kuv yuav tsis pub leejtwg saib tsis taus Kuv lub npe,
lossis tsis pub leejtwg muaj feem koom Kuv tus tshwjchim li.”
Tus TSWV Xaiv Xailas Ua Thawjcoj
12Tus TSWV hais tias,
“Yakhauj, koj ciali mloog Kuv tej lus,
Yixalayees, tus uas Kuv tau hu lawm!
Kuv yog Vajtswv,
Kuv yog lub hauvpaus thiab yog lub ntsis. #Yaxaya 44:6; Tshwm 1:17; 22:13
13Lub ntiajteb yog Kuv txhais tes tsim,
thiab lub ntuj yog Kuv sab tes xis muab nthuav.
Thaum Kuv hu lub ntiajteb thiab lub ntuj,
ces tej ntawd txawm tshwm tuaj.
14“Nej sawvdaws ciali los sibsau uake thiab mloog Kuv hais!
Tej mlom ntawd yeej tsis muaj ib tug uas yuav hais tau
tias Xailas, tus uas Kuv tau xaiv ntawd, thiab nws cov tubrog yuav tawmtsam lub nroog Npanpiloos;
nws tsuas ua tej uas Kuv xav kom nws ua xwb.
15Kuv yog tus uas hais thiab yog tus hu Xailas;
Kuv coj nws los thiab ua kom nws vammeej.
16“Ciali txav los kom ze Kuv thiab mloog Kuv hais.
Kuv yeej qhia zaj no thaum chivkeeb los, yeej tsis zais li,
thiab yeej tshwm muaj tseeb rawsli Kuv tej lus.”
(Nimno tus TSWV uas kav ibpuas tsavyam twb muab Nws lub hwjchim rau kuv thiab txib kuv mus lawm.)
Tus TSWV Npaj Homphiaj Rau Nws Haivneeg
17Cov Yixalayees tus Vajtswv uas dawbhuv,
tus TSWV uas cawm nej, hais tias:
“Kuv yog tus TSWV uas yog nej tus Vajtswv,
tus uas qhia tej kev zoo rau nej,
thiab coj nej mus rau txoj kev uas tsimnyog nej taug.
18“Yav tas los kheevlam nej ua tibzoo mloog Kuv tej lus xaaj!
Mas kev thajyeeb yuav ntws laublug los rau nej
zoo li tus dej ntws tsis paub nqhuab.
Kev vammeej yuav los rau nej
zoo li tej nthwv dej ntas tom hiavtxwv.
19Nej cajces yuav huamvam coob suav tsis txheeb yam li tej xuabzeb,
Kuv yuav tsis rho lawv tej npe tawm lossis lawv yuav tsis raug puastsuaj li.”
20Ciali tawm hauv lub nroog Npanpiloos mus, ciali tawm mus lau!
Ciali zoosiab hlo tshajtawm nrov-nrov rau txhua qhov paub tias,
“Tus TSWV tau cawm Nws tus tubtxib Yixalayees dim lawm!” #Tshwm 18:4
21Thaum tus TSWV coj Nws haivneeg taug kev los hla tiaj suabpuam uas tshavntuj kub heev ntawd,
lawv yeej tsis nqhis dej li.
Nws ua kom dej txhawv hauv pobzeb los rau lawv haus;
Nws phua lub pobzeb, mas dej ciali tawm hauv los.
22Tus TSWV hais tias, “Cov neeg uas ua phem yeej tsis muaj kev kajsiab hlo li.” #Yaxaya 57:21
Currently Selected:
Yaxayas 48: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
