Kulolesibua 9
9
1Nu mugenzi weitano eidile monze, nu namonine ku lukenikeni luatukile muigulu luakolokile ga kisi: nu akasilue mutandulua wa muzinga utanakuzinda. 2Nuwe akanduide muzinga utanakuzinda; nu muki wabasaga mu muzinga, anga muki weiyambi inene lia keiya; nu kisongo kia busi nu muuza binine na wozo muki wabasaga mu muzinga. 3Nu nzige zabasile mu wozo muki nu zendile mu kisi; nu zakasilue magala, anga magala ma nkutu za kisi. 4Nu zatendilue buno tazidie nsamba za kisi, aba bintu bili bibisi, aba miti insania, tondo kubabazia bantu beteli na kamenyikilo ka Kalaga ga malanga mabo. 5Nu zakakizizibue buno tazibalekanie tugu zibababazie miezi etano; nu lubaba luazo luabezaga anga lubaba lua nkutu, gazikutua muntu. 6Nu mu bindi bibio bantu bakalonda lukuo, nu tabakalumona nunse; nu bakatunda kukua, nu lukuo lukabatina. 7Nu bisusania bia nzige biabezaga anga mpunda zikuenda ku bita; nu gantata ga matoe mazo gabezaga anga nkumbu za bukota za olo, nu malanga mazo mabezaga anga malanga ma bantu. 8Nu zabezaga na nzuili anga nzuili za bakikulu, nu meinyo mazo mabezaga anga meinyo ma bimbue. 9Nu zabezaga na ngabo ku bukuba anga ngabo za kiuma; nu muzumio wa biupi biazo wabezaga anga muzumio wa ngondangonda za kiuma za bita, anga mpunda ningi zikuenda ku bita. 10Nu zabezaga na mikila anga mikila za nkutu, nu tuluba; nu lulalo luazo luabezaga ku mikila zazo kubabazia bantu miezi etano. 11Zabezaga na mukota wazo, wozo mugenzi wa muzinga utanakuzinda: izina liage ku kilibelo, lili Abadono, nu ku kiGeleka lili Apoliono.
12Kabebe katangi katinga; nu kusila kua bubo kuabe tungo tubebe tubili.
13Nu mugenzi wa mutuba eidile monze, nu nongule kuiyuki liatukile ku mega ma kayulo ka olo keli lisa na Kalaga, 14liatendile ku mugenzi wa mutuba wabezaga na monze bune, Kandula migenzi enazi bakandilue ku luuzi lunene lua Ufalate. 15Nu migenzi enazi bakanduidue, babezaga balongekua ku nkungu nu ku kindi nu ku muezi nu ku muaka, kuita kindi kimozi kia bisatu kia bantu. 16Nu maganzo ma mazombo mababezaga ga mpunda mabezaga tununu makumi mabili mambizi tununu ikumi; nungule ku maganzo mabo. 17Nu bubo namonine ku mpunda ku kalolesio, nu babo babezaga beikala gantata gazo, babezaga na ngabo za keiya ga makuba, nu za kisimana, nu za kibiliti: lukita lua keiya: nu matoe ma mpunda mabezaga anga matoe ma bimbue, nu mu tunua tuazo muatukaga keiya nu muki wa kibiliti: 18nu kindi kimozi kia bisatu kia bantu kiakule na tubebe tutuno tusatu, na keiya nu na muki nu na kibiliti biabezaga bikutuka ku tunua tuazo. 19Kubuno magala ma zezo mpunda mabezaga mu tunua tuazo, nu mu mikila zazo: kubuno mikila zazo zabezaga anga nzoka, nu zabezaga na matoe; nu zababazizie nazo. 20Nu bango bantu bansania basigeide tabakua na tubebe tutuno, tabeiyanizie ku milimo za maboko mabo buno tabakumbamine basumbu, nu nkisi za olo, nu za feza, nu za kiuma kia nsubi, nu za makozi, nu za miti; zitakumona, aba zitakungua, aba zitakuenda; 21nu tabeiyanizie ku kuita kuabo, aba ku buganga buabo, aba ku butazi buabo, aba ku buibi buabo.
Currently Selected:
Kulolesibua 9: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
