Kulolesibua 10
10
Mugenzi Abezaga na Mukanda Mukeke.
1Nu namonine ku ungo mugenzi mubibu watukaga muigulu; avualikizibue kimpa; nu mumpilinda wabezaga geitoe liage, nu malanga mage mabezaga anga kisongo kia busi, nu masindi mage mabezaga anga ngulumina za keiya; 2nu abezaga na mukanda mukeke wakandulua mu kuboko kuage: nu abikile kugulu kuage kua seidume mu kitatenge, nu kugulu kuage kuaseikazi ku kisi; 3nu alalukile neiyuki inene, anga kugoluma kua kimbue: nu galalukile neiyuki mikulumino mutuba kamo zakulumine. 4Nu gakulumine mikulumino mutuba kamo, nabezaga nise buigi kusanza: nu nongule kuiyuki liatukile muigulu liatendile bune, Bika kamenyikilo ku bitondo bikukulumina mikulumino mutuba kamo, nu ntubisanze. 5Nu wozo mugenzi unamonineko wemana ga kitatenge nu ga kisi asakikile kuboko kuage kua seidume kuigulu; 6nu alumbide ku wozo ukulamaga ku nkiko na nkiko zitanakuzinda, wozo wabumbile igulu nu binsania bilimo, nu kisi nu binsania bili mukio, nu kitatenge nu binsania bilimo, buno ntalindile lingo limbizi: 7tondo mu bindi bibio bia iyuki lia mugenzi wa mutuba kamo, eseli buigi kuida monze, ukuzindilila kua kakungu ka Kalaga, anga musagu musoga wasambalide bakobe bage u balengania. 8Nu iyuki linungule kulio liatukaga muigulu, liantendile bune, Enda, utole wozo mukanda wakandulua ku kuboko kua mugenzi wemana ga kitatenge nu ga kisi. 9Nu nendile ku wozo mugenzi, namubuide bune, Nkase wozo mukanda mukeke. Nu ambuide bune, Gutole, nu gulie; nu wakuite lubaba munda, tondo mu kanua kobe wabe nse anga buki. 10Nu natolile wozo mukanda mukeke ku kuboko kua mugenzi, nu nagulile; nu wabezaga anga buki mu kanua kane; tondo ganagumenine, nda zane zabede lubaba. 11Nu bambuide bune, Watunganana kulengania lingo ku bantu beingi nu ku babilongo nu ku ba mitendezi nu ku bakota.
Currently Selected:
Kulolesibua 10: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
