FAA WULOAI KƐNƐ MA 9

1Gala ta ɣeelai doolu kelei zɛba sa é ná dɔ wui ʋɛ. Nà ɣɛɛzu gìɛ wɛlɛ sɔmɔ deka va kuloai gee‐zuvɛ é loo zui ma. Te ƃɛkpɛ zeɣei laavɛ mayiliɣii ʋeeni zéea. 2É ƃɛkpɛ zeɣei laa laoni sa. Na ɣɛɛzu duuli wulo zeɣei zu ɔ̀ ka è ɣɛ ŋabu‐loo zemele ƃakpa zu luuli. Duulii é ɣɛni wulozu zeɣei zu é foloi maa ƃidini é gee‐zuvɛ ƃidi. 3Na ɣɛɛzu kotoga tiɛ wulo duulii zu tiɛ va zui ma. Tɔwɔ te gaa‐ƃaa ʋeeni te ya è ɣɛ velei nɔ ŋaku ɣaaliitiɛ ta ɣaa‐ƃai la zui zu. 4Te boni te ma ga te mɛ lɛ ŋada ɣɛ guitiɛ va ɔɔ guluitiɛ ɔɔ kpɛtɛ ŋɛni mazii ta nɛpɛ. Kɛ̀ ta faa ɣɛ ga numai niitiɛ Gala na kɔlɔ‐laa‐ƃakpa ŋɛnii lɛ te lodala ga zée‐wo. 5Te ʋaani bu te ya ga te wãla‐lɔɔ wulo ga tiɛ ɣalo dooluo yee wu. Kɛ̀ te mɛ lɛ te vaa. Tɔwɔ wãla‐lɔi ta ɣɛ kulozu ga tiɛ towaa wulo è ɣɛ ŋaku ɣaali ɣa nu ŋii. 6Nà maziɛ su nu ƃuse ɣa ɣɛ saa ɣaa ziɛzu, tɔwɔ tɛ lɛ sɔlɔ woga. Ta ɣɛ saa maa‐wõi‐wõi kulozu, saa wɔ gíɛ vela te va.

7Kotogitiɛ te wuloai ɣɛ è ɣɛ sooni ka te maa ɣiliai kɔɔ‐wɔɔ ʋaa ma. Ŋɛni ta ɣɛni te wũmɔ ɔ̀ ka è ɣɛ masa bɔɔlɔgi kpɛtɛi ga zɛni. Ɔ̀ wɛlɛ te ɣaazuvɛtiɛ va è ɣɛ nu ƃuse. 8Te maa leɣaitiɛ wuloai ɣɛ è ɣɛ ŋaza nu wũ deɣa. Te yĩigɛitiɛ wuloai ɣɛ è ɣɛ zala yĩigɛ. 9Te ɣeke su vɛi ɣɛ ga ŋɛnii nii kuloai ga kɔɔ‐wɔɔ maa‐ɣili sɔɔlai nii kpɛtɛi ga kolu. Na ɣa ɣɛɛ na te wovegi zu li kuloai ɣɛ è ɣɛ kai nii ta daa lɔ soo va, natiɛ ta lama te laa lɔ sooni ba te ƃolo tiɛ li kɔɔ‐wɔɔ‐zuvɛ. 10Te wɔ̃gitiɛ wuloai ɣɛ ga ŋaku ɣaalia wɔ̃, te maloolɛi te va. Tɔwɔ gaa‐ƃai é ɣɛni te ya ga te ŋada zei nu ƃuse va ɣalo dooluoi yee wu, maɣaa‐ƃai ɣɛni te wɔ̃gitiɛ zu. 11Te maazu nu ɣa te ya ga ɣalaso gwalai ɣavele. Te maazu nui na ɣa ga Gala ta ɣeelai é ƃɛkpɛ zeɣei ʋaa ma. Ná daa‐zeigi ɣa Hiiƃulu woi zu ga Abadɔ̃, tiɛ tili Geliiki woi zu ga Apɔɔliã, na ɣa ga su‐ŋala‐ŋala‐bo nui.

12Kotogitiɛ ta wãla‐lɔi nii wulo na, kpalo maa wũgi levega ɣa na. Tɔwɔ felegɔ ɣa ɣɛ dɛ na wulu yíɛ va.

13Na ɣɛɛzu Gala ta ɣeelai dɔzita kelei yíɛ ná dɔ wui ʋɛ. Gala‐zeke‐kɛɛ vanagi kpɛtɛi ga zɛni é loni Gala daa wu, gè woo ta mɛnini sa é wulo gui laavɛtiɛ. 14É ɣɛni bosu Gala ta ɣeelai nii ma pui ɣɛni zéea yíɛ ɣɛ má, “Gala ta ɣeela naagɔitiɛ te ɣiliai ziɛ ƃakpa walai Yuufileiti laavɛ, te ʋũi.” 15Na ma te Gala ta ɣeela naagɔitiɛ ʋũini ga nu ƃuse ɣaa wɛi su sava te sei‐zu ɣila paa. Te ɣiliai ɣɛ te ɣavele ƃɛtɛi siɛgi na ʋaa ma. Te ɣavele ƃɛtɛi kwenagi na ʋaa ma ta ɣalogi na kwenagi ʋaa va ta foloi na ɣalogi ʋaa va é vɛɛ ɣalavai na va foloi ʋaa va. 16Soo‐wɔma zɔdasiitiɛ lii ge ɣɛni ga wulu puu‐puu sei‐zu wulu puugɔ ná zei‐zu fele. Gè te liigoi laa mɛnini. 17Tɔwɔ vele ɣa soitiɛ te maʋaa wuuni la gàazu. Nu‐ɣekegi‐zu wɔɔ‐wɔɔ maa‐ɣili sɔɔlai é ɣɛni soo‐ƃize veaitiɛ ma é ɣɛni ƃoeizu è ɣɛ ŋabu, yíɛ ƃoi è ɣɛ tɔnɔ‐ba wɔti dáa ga “saafai”, gáazu wuloai wɔnɔ ga bazi è ɣɛ fukɛi nii ŋabu ɣa zo ba. Na ɣa ɣɛɛ na soitiɛ wũgi ɣɛni ga zala wũ kavele. Ŋabu, duuli é vɛɛ fukɛ va yíɛ wulo te la. 18Faa ƃoei ŋɛni saagɔi niitiɛ te wuloni soitiɛ la, natiɛ ta ga ŋabu, duuli ta fukɛ, nu ƃuse ɣaa wɛi su sava ta ɣa te sei‐zu ɣila paani. 19Ƃɔvɛlaale soitiɛ ta ɣaa‐ƃai ɣa te laavɛ é vɛɛ te wɔ̃gitiɛ zu va. Te wɔ̃gitiɛ wulovɛ ga kaalia te mawũ ge te va. Natiɛ wɔ ka ta ŋada zei la numaa va.

20Nu ƃusei mataitiɛ tɛ lɛ ŋɛni te vaani faa ƃoei niitiɛ zu, natiɛ tɛ lɛ kɛɛni tɔ wulu ɣaa ʋe te ƃɛtɛ ŋɛniitiɛ va ɔ́ nɔ ɣɛ ga te ƃe gɔʋɛ yowũ ʋeliai va ta maa‐niini galagitiɛ te ƃɛtɛi ga zɛniga ta kaniga ta kpaaʋa ɣalaga é vɛɛ kwɔtia va ta gulua. Natiɛ ta ga galagi niitiɛ tɛ lɛ zooga tɔ wɛlɛ ɔɔ te faa mɛni ɔ́ nɔ ɣɛ ga te ziɛ. 21Numai niitiɛ ƃɔɔ tɛ lɛ wɔnɔ ƃalaa wulu ɣaa ʋeni ta nu‐vaa ʋaitiɛ va ta ta maa‐wɔlɔ‐wɔlɔ sale yeke‐kɛɛ. Tɛ lɛ wulu ɣaa ʋeni ta wɛ̃ɛ‐ziɛ‐bo fai va ɔ́ nɔ ɣɛ ga te wulu ɣaa ʋe ta wũmɔ ʋai va.

Currently Selected:

FAA WULOAI KƐNƐ MA 9: DN1971

Highlight

Copy

Compare