FAA WULOAI KƐNƐ MA 8
8
Kɔlɔ‐laa‐ƃakpa ŋɛnii dɔfela kelei
1Tei Baala Zuwui kɔlɔ‐laa‐ƃakpa ŋɛnii dɔfela kelei laa laoni, Gala ta ɣɛni ƃu ɔ́ zoo é ɣɛ ga ɣalava likpe. 2Na ɣɛɛzu gìɛ wɛlɛ Gala ta ɣeela lɔfela va niitiɛ ta lo Gala daa wu. Te puu lɔfela wɔ feeni te ya.
3Gala ta ɣeela ta ƃɔnɔ ge vaani é lo Gala‐zeke‐kɛɛ vanagi woba, gulu mala kũ‐nɛɛ‐nɛɛ gala ŋɛni yãka zéea kpɛtɛí ga zɛni. Te gulu mala kũ‐nɛɛ‐nɛɛ tamaa ʋeeni zéea ga é gala Gala‐zeke‐kɛɛ vanagi ɣa, kɛɛ ʋaa ma nà vɛɛ Gala na numaitiɛ ɣaazɔ ta Ɣala‐feliai va. 4Tɔwɔ gulu mala kũ‐nɛɛ‐nɛɛgi ɣala luulii vɛɛ Gala na dɔ numaitiɛ ta Ɣala‐feliai va te wuloni Gala ta ɣeelai ya é loni Gala daa wu tiɛ lɛ gee‐zuvɛ. 5Tei na ɣɛɛni, Gala ta ɣeelai é gulu mala kũ‐nɛɛ‐nɛɛgi ɣala ŋɛni yãkai ziɣini é daa ʋe ga ŋabui nii é siɣini Gala‐zeke‐kɛɛ vanagi ɣa Gala ta, é zɛba é pili zui zu. Gee ƃɛdɛ wɔ ge ɣɛni sa toozu ná li gìɛ lɛ ga kpakpaa, mea‐mea yíɛ kulo, zui yìɛ ƃeli yíɛ wu su.
Puitiɛ
6Na ɣɛɛzu puu lɔfelaitiɛ te ɣɛni Gala ta ɣeela lɔfelaitiɛ ya te ɣavele ƃɛtɛni ga te te ʋɛ.
7Gala ta ɣeela maa wũgi é ná dɔ wui ʋɛɛni nɔ, sakwɔti vɛɛ ŋabu va natiɛ tiɛ wu te zupuai ga ŋama tiɛ wu zui ma. Zui ɣaa wɛi su sava mazɛvɛ ɣila ge ɣalani sa, guluitiɛ ɣaa wei su sava te mazɛvɛ ɣila ge ɣala, gui wũduitiɛ ɣaazɔ te ɣala.
8Gala ta ɣeelai fele kelei ná dɔ wui ʋɛɛni. Tei na ɣɛɛni, ŋɛni ta ɣɛni na kuloai ga gizi gwala ŋabu bá. Ŋɛnii na vilini yuwu wu. 9Yuwu ɣaa wɛi su sava sei‐zu ɣila ge ɣɛɛni ga ŋama. Ʋulu ŋɛniitiɛ te yuwu wu gaa wɛi su sava sei‐zu ɣila ge zaani. Na ɣa ɣɛɛ na ziɛ‐ɣa‐ŋee gwalaitiɛ te ɣaa wɛi su sava mazɛvɛ ɣila su ŋala‐ŋalani.
10Gala ta ɣeelai sava kelei é ná dɔ wui ʋɛɛni wɔnɔ. Sɔmɔ deka wala wuloni gee wɔlɔgi zu sa yíɛ zo è ɣɛ sɔmɔ. Ziɛ ƃaazagitiɛ vɛɛ ziɛ ɣai koloitiɛ va te ɣaa wɛi su sava é looni te mazɛvɛ ɣila ga. 11Sɔmɔ dekai nii ná daa‐zeigi ɣa ga “Sale wãla”. Ziɛitiɛ ɣaa wɛi su sava é kɛɛni te zei‐zu ɣila ge wãla. Ziɛi é kpoale vea lamaa vaani, ƃɔvɛlaale sɔmɔ dekai kɛɛni é wãla.
12Gala ta ɣeelai naa kelei ná dɔ wui ʋɛɛni. Nà wɔ ka ɣɛɛ na foloi ɣaa wɛi su sava ŋada zeini mazɛvɛ ɣila ba. Nà nɔ ɣa é ɣɛɛni ga ɣalogi. Tɔ nɔ ɣa kɔnɔ é ɣɛɛni ga sɔmɔ dekaitiɛ. Nà ɣɛɛni ga te maʋoloitiɛ ɣaa wɛi su sava mazɛvɛ ɣile‐gile ge ƃidi. Gela‐bogai zu zɛligoi ɣaa wɛi ɣɛ su sava sei‐zu ɣila gɛ lɛ ŋɛni ŋada wodoa. Vele nɔ na é ɣɛɛni la ga kpidi.
13Kwɛ̀lɛzu gìɛ kooɣɛ ɣila goo mɛni yíɛ ƃɔɛ ga woo wala tɛ́i ƃɔɔ yíɛ wove. É ɣɛni ɣɛɛzu tea, “Kpalo‐oo, kpalo‐oo, kpalo‐oo, niitiɛ ʋaa ma te zui ɣa, puitiɛ ta ʋɛɛ na! Na ɣa ga pui zɔitiɛ Gala ta ɣeela saagɔitiɛ te vaazu fɛɛzu.”
Currently Selected:
FAA WULOAI KƐNƐ MA 8: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
