KƆLĨITIƐ 9

Gala na dɔ numaitiɛ ta ƃɔ‐ba ŋɛni

1Ɛ́ lɛ ga faa maa nɛɛ ga gè kɔlɔ wonɛ dɛ wo wɔ é vile Gala na dɔ numaitiɛ ta ŋɛni‐ɣaa‐kpɔ fai va wo vɛ, 2toku ge zei ga gè wo ɣavele‐ƃɛtɛ ʋai zu wɛ̃ni. Gà mayoka tevezu Masa‐doonia veaitiɛ ɣaazu é vile wo va gìɛ bo ga Akeea yui ɣavele ƃɛtɛɛ é ziɣi ƃɔɔ wãla‐ma ma. Tɔwɔ wo zɔƃɛlɛ‐wɔɔlɔ ʋai maʋai zu é te bɔɔlɔ zu te yii wu ziɣia. 3Kɛ̀ gà gé vaitiɛ levesu kɛɛ ʋaa ma yokagi gé tevea é vile wo va fai nii zu é mɛ lɛ ɣɛ ga mayãka. Na ma wo ɣɛ ga nu ta wo ɣavele ƃɛtɛ, è ɣɛ velei nɔ gè boga ga wa ɣɛɛ la. 4Ƃɔvɛlaale ani Masadooniaitiɛ te taniga ta vɛɛ na bà gé va te wɛlɛ na va ga wo ɣavele lɛ ƃɛtɛni, nà ɣa kɛ gé vɛnɛ ―dɛi ta wo pele laale. Na ɣa ga velei gé laa la ga wiɛ. 5Na ma gè ɣi gaa zia ma ga pagɛ gè bàitiɛ maa nɛɛnɛ te va tùo wo wɔ vɛ te ná ɣɛ ná luo te faa‐nɛɛ‐ɣɛɛ ŋɛnii nii maʋaa ɣaa zei. Na ɣa ga nii wo ki‐togi woga la, kɛɛ ʋaa ma é ɣɛ ga ŋɛnii maʋaa ɣaa ɣa wooli sa. Maʋaa mɛ lɛ wulo ga kɛlɛ‐gbɛdɛ ŋɛni‐ʋee ʋaa, kɛ̀ to mu é ɣɛ ga faa‐nɛi nii nu ɣa siɣi yii ma é kɛ.

6A ɣi zɛ nii zu. Na ɣa ga nui ɣá sii‐zii ŋɛni zei ga gile‐gile ga ki‐kpaa vele maɣai ma towaa gaa vai wulo nɔ ga gile‐gile. Kɛ̀ nui yá ɣi kulo ná dɔ zii‐zii ŋɛni ɣai zu é sei ga tama pele manui ɣa gaa vai wulo nɔ ga tama pele. 7Kɛni wo ɣile‐giledai ɣa kɛ nɔ è ɣɛ velei manui ɣa kpɛtɛ la ɣigi zu ga é kɛ. Ɛ́ lɛ ga manu kɛ ga ƃala pele gá ɔɔ é kɛ kɛlɛ‐gbɛdɛi maazu. Ƃɔvɛlaale Gala ge wõini ga nui yá faa‐nɛɛ ɣɛ ga kuu zu nɛɛ. 8Tɔwɔ zobo ka Gala bɛ ga é kɛ tuuyiɛ mazii ɣaazɔ ɣɛ wo ma ga su wɔɔlɔ, kɛɛ ʋaa ma ŋɛni zii ɣaazɔ ɣɛ wo ya ga kulo‐ɣɛɛ‐woga siɛ ta nɛpɛ su. Na ɣa ɣɛɛ na kavele zu ɣɛ wo vɛ ga gwala tii vagɔ ta nɛpɛ kɛɛ ʋaa zu. 9È ɣɛ velei ponɛi la Gala kɔlɔi zu mawoi ga

“Tɔ sɔɔlaa zu yɛzɛsu ƃɔɔ ɣaali.

Tɔ faa‐nɛɛ ɣɛɛzu maa‐wõi vea vɛ.

Na tuo vele vagɔi ɣa yɛ ma wɔlɔ‐wɔlɔ

ta wɔlɔ‐wɔlɔ.”

10Nui nii é mɔlɔ zuwui wulozu woza‐vili nui ʋaa ma yíɛ de wɔ̃nɔ kulo na mavele ma towaa mɔlɔ zuwui maa wɔɔlɔ. Wa luo vele vagɔ‐ɣɛɛ nii é ga mɔlɔ‐leveai é na maʋaa zu wɔɔlɔ ma. 11Wa ƃɛtɛ pelei ɣaazɔ zu wo ɣɛɛ ʋai ma ga gaazu‐wodo vea ƃakpa wala. Gé zaalai zu numaa ta mama fe Gala bɛ wo ɣaazu‐wodo ʋai nii ma. 12Tii nii ɣɛɛ ʋai lɛ nɔ Gala na dɔ numaitiɛ wuloa te ƃala‐ma ʋaa zu ɔ́ wɛ̃ɛ na va. Kɛ̀ towaa leve minɛ va é kɛ nu lamaa tiɛ mama fe Gala bɛ. 13Wa ɣɛ na ƃɔɔ lɛɛzu tii nii ɣɛɛ‐zu ga nui mazii wo le, ta Gala daa maa lɛ ga wo kolo wuloa Kolai mawoo niinɛ vagɔi nii zu wo kulozu la wiɛ bo. Ta dáa maa lɛ wɔnɔ ga wo kuloa ƃɔɔ yii zu wo te wɔɔ laa ɣɛ wo weligitiɛ va wo kɛ wɔnɔ ŋɛ na nu pɛ faa ma. 14Ta ɣɛ na wo maa‐wõi‐wõi kulozu ta ɣɛ Gala felizu wo ʋaa ma, toku ge zei maa‐wõi‐ɣaa ƃɔ‐ba walai va Gala ge boga ga wiɛ. 15Gala mama ná faa‐nɛɛ walai nii ʋaa ma nu lɛ bo pele ɣaa!

Currently Selected:

KƆLĨITIƐ 9: DN1971

Highlight

Copy

Compare