KƆLĨITIƐ 8

Gaazu‐wodo ʋaa‐nɛɛ‐ɣɛi

1Nà numaa, gé wõini wo faa wɛ̃ɛ é vile Gala na maa‐wõi‐ɣaa ƃɔ‐bai va dɛ́i Masadoonia Ɣala pɛlɛitiɛ wu. 2Ƃɔvɛlaale tei su‐wɔ̃ɔ kee ɣaa‐ƃaa woni ga tiɛ faa ƃoei zu, ta wuu‐zu‐nɛi ƃakpa walai vɛɛ te wala ɣɛɛ va bogɛi ga mɔɔlɛ vea nà kɛɛni te maʋaa wala leve ŋɛɛ pulu te ɣɛɛ vele ma ga nui gwala ɣaazu wodoai. 3Gà zoo gè mazeele woo ʋe ga zɔi é ɣɛni ga te zooda te feeni, te feeni ʋɔlɔ é leve minɛ va, ta ƃɔɔ tiɛ siɣi yii ma tiɛ kɛ. 4Te ɣɛni pee ʋeezu gé vɛ é ga te zɔƃɛlɛ ga gé ʋa bu te wɔɔ laa ɣɛ ŋɛni‐ʋee ʋai va Gala na dɔ numaitiɛ ʋaa ma ga kpɔ‐ba. 5Nii te kɛɛni gé ɣi gɛ lɛ ŋɛni ba ga tɔ kɛ. Na ɣa ga te ɣaʋuni te ƃɔɔ ʋe de maliɣii ya te ƃɔɔ ʋe kɔnɔ gé ya Gala zii‐mai mavele ma. 6Nii mavelei ma gé Taitɔ lɛnɛga ga è ɣɛ velei é kpɔ‐ba‐wo tii nii lɔɔ zeiya sa la wo zaama pagɛ é daa wulo. 7Wo ƃɔɔ wɔɔlɔɔ fai niitiɛ zu é leve nu pɛ ba. Natiɛ ta ga zee‐la‐ma, velei nu ɣa ƃɔɛ la, kele‐ɣele, nu zɔƃɛlɛ‐ɣɛɛ ʋai faa zu ga ƃɔɔƃɔɔ su pelei ɣaazɔ zu é vɛɛ wõilai va é wo ya gé ʋaa ma. A ƃɔɔ wɔɔlɔ ŋɛ na ƃalaa pɛ kpɔ‐ba‐wo tii nii zu.

8Gɛ̀ lɛ nii wosu ga daa vele wo ya ga tɔ. Kɛ̀ gà wa wõilai wo kɔ̃ɔsu zɔitiɛ ta ɣaama‐ɣɛɛ velei ma, kɛɛ ʋaa ma gè wɛlɛ na va ga tɔ ga ƃɔɔƃɔɔ su wõila. 9Wo de maliɣii Ziizɛ Kolai na maa‐wõi‐ɣaa ƃɔ‐bai wɛ̃ni. Velei ƃalaa é ɣɛni la ga kpɛtɛ nu, é ɣɛɛni ga mɔɔlɛ nu wo mazaƃu ma, kɛɛ ʋaa ma wo ɣɛ ga kpɛtɛ vea ná mɔɔlɛi zaala zu. 10Nii ɣa gè feezu ga tɛnɛ goi. Na ɣa ga pagɛ wo ʋaa ma sa ga fai wãla ma wo tɔɔ zeini, ɛ́ lɛ ŋɛni nɔ ga wo kɛ, kɛ̀ wo mawõi vili ƃalaa yii zu, a maʋai laa wulo. 11Wa nii ɣɛ kɛɛ ʋaa ma velei wo ɣavele ƃɛtɛi la ga mayii vili wo wuu zu, é zolowo ŋɛ na daa‐wulo ʋai ma wo vɛ. Wa kɛ è ɣɛ velei nɔ maziɛ‐bu la wo vɛ. 12Ani nɔ nui ɣavele ƃɛtɛvɛ ga é kɛ, zee‐zei‐bu ɣa ɣɛ bɛ́ nii liigoi ʋaa ma maziɛ‐bu bɛ́ ɛ́ lɛ ga nii liigoi maziɛ‐bu lɛ bɛ́. 13Nii gè bosu su‐wulo‐zu lɛ ga zɔitiɛ wui wulu ɣaa lei faa viiya yíɛ la wo wɔwɔ ma. 14Tɔ nɔ ga faa ɣaa‐wooli faa ŋada felegɔ pɛ pele. Ŋɛnii nii yá wulo na wulu wo ya nii zu, pagɛ nà te wulo te ƃala ʋaitiɛ zu, nii wɔgi yá wulo na wulu te ya ga siɛ ta nà é wo wulo wo ƃala ʋaitiɛ zu, kɛɛ ʋaa ma faitiɛ te ɣaa ɣɛ ga seli. 15È ɣɛ velei ponɛi la Gala kɔlɔi zu mawoi ga

“Nui nii é gwala ɣaa lɛɛni ba, ta lɛ wuloni zéea na wulu.

Zɔi wɔgi é gaa lɛɛni ba ga pɛnɛi, ta mavala gɛ lɛ

looni ma.”

Taitɔ ƃɔga baitiɛ

16Kɛ̀ Gala mama. Towa é pua Taitɔ ɣigi zu ga é ɣɛ ga gé ɣavele sɔƃɛlɛ‐ɣɛɛ ʋai zu wo ƃala‐zo‐ma ʋai zu. 17Ɛ́ lɛ nɔ yee zeini fai nii wu gé daani bɛ́ ɔ́ wɛ̃ɛ na va, kɛ̀ tei tɔwɔ tɔ ɣagi sɔƃɛlɛ é wo maʋaa zu, tɔ vaazu wo wɔ vɛ ga ƃɔɔ yee. 18Gé wɔi nii tɔwɔi wuloai Gala pɛlɛitiɛ ɣaazɔ wu woo niinɛ vagɔi‐wo faa zu gá na vɛɛzu bá ta tɔ te va. 19Ɛ́ lɛ nɔ wɛ̃ɛni na va. Gala pɛlɛitiɛ te yee ƃadoga bá ga é vɛɛ gé va gá tiɛni gíɛ ziɛ kpɔ‐ba‐wo tii nii ɣɛɛ ʋaa zu. Na ɣa ga tii nii gé kɛɛzu gíɛ lii la ga tuo de maliɣii na saala‐malai ʋaa ma ta gé wuu‐zu ʋaa vagɔi lɛɛ ʋai. 20Gá pulu ga nu ta nɛpɛ ge mɛ lɛ gé ɣɛɛ‐zɔ siɣi ɔ́ vile gaazu‐wodo ʋaa‐nɛi nii va gé mayekegi ɣɛɛzu. 21Toku ge zei ga nii é ga ƃaa‐la‐ma ʋaa nà ɣa gé pulu ga gé kɛ. Ɛ́ lɛ nɔ ga gé kɛ de maliɣii ɣaazu, kɛ̀ gé kɛ ƃalaa pɛ nu ƃusea ɣaazu. 22Gá wɔnɔ gé wɔi ta ƃɔnɔ pɛɛzu numai niitiɛ va. Na ɣa ga gé wɔi nii gé su wɔ̃ɔga ti‐ti gé wɛlɛ na va faa lamaa zu ga tɔ ga nui sɔƃɛlɛ wo maʋaa zu. Tɔ ga nui sɔƃɛlɛ wala wɔɔlɔi wo maʋaa zu é leve mamaa wũgi va, ƃɔvɛlaale dáavɛ ga wo maʋai ga gwala. 23Taitɔ na dɛi towa é ga fèle kelei é ga bɔ̀i nii gá tɔ gé ga tii‐ɣɛɛ vea wo ʋaa ma. Gé vaitiɛ ta dɛi ta ga Gala pɛlɛitiɛ ta ɣeela woo‐wo bea te ga Kolai na ƃaa‐la‐ma. 24Na ma a wa wõilai mazeele woo ʋe Gala pɛlɛitiɛ ɣaazu, gá yokagi gé tevezu é vile wo va numai niitiɛ ɣaazu wo na mazeele woo ʋe wɔnɔ.

Currently Selected:

KƆLĨITIƐ 8: DN1971

Highlight

Copy

Compare