Psalm 139
139
Da 139. Psalm.
Gott Vayst Alles Un Is Ivvahrawlich
Zumm foah-singah. En Psalm fumm Dawfit.
1Oh Hah, du hosht mich innahlich ausksucht,
un du kensht mich.
2Du vaysht's vann ich mich anna hokk, un vann ich uf shtay;
du vaysht mei gedanka funn veit ab.
3Du vaysht's vann ich naus gay, un vann ich mich anna layk;
du bisht bekand mitt awl mei vayya.
4Even eb en vatt uf mei zung is,
dann vaysht du's shund, oh Hah.
5Du bisht gans um mich rumm uf alli seida,
un haldsht dei hand ivvah mich.
6So eisicht is zu vundahboah un zu hohch fa mich,
ich kann dess nett begreifa.
7Vo kann ich hee gay, vekk funn deim Geisht?
Vo kann ich anna gay es du nett datt bisht?
8Vann ich nuff in da himmel gay, dann bisht du datt;
vann ich mich anna layk in's grawb, dann bisht du aw datt.
9Vann ich anna fleek vo da meiya-roht is,
adda im ausahshta say bleib,
10even datt dutt dei hand mich fiahra,
un dei rechtsi hand mich uf hayva.
11Vann ich sawwa dayt, “Loss es dunkla mich zu dekka,
un loss es licht um mich rumm sei vi nacht,”
12dann veah's dunkla nett dunkel zu diah,
un di nacht veah so hell es dawk,
fa's dunkla is vi licht zu diah.
13Du hosht mei innahlich leib gmacht,
un hosht mich zammah gedu in mei muddah iahra leib.
14Ich gebb dank zu diah,
veil ich furchtboah un vundahboahlich gmacht binn,
dei verka sinn vundahboah,
un dess vayst mei sayl goot.
15Mei gnocha voahra nett fashtekkeld funn diah,
vo ich ruich-kalda gmacht voah,
vo ich zammah gedu voah im muddahs-leib funn di eaht.
16Dei awwa henn mich ksenna eb ich zammah gedu voah,
un awl di dawwa es gevva voahra fa mich
voahra ufkshrivva in dei buch,
eb si blatz gnumma henn.
17Oh Gott, vi keshtlich sinn dei gedanka zu miah,
un vi feel funn si sinn's!
18Vann ich si zayla vett,
veahra si may es da sand.
Vann ich uf vekk, dann binn ich alsnoch bei diah.
19Oh Gott, vann du yusht di gottlohsa umbringa daytsht,
un di bloot-dashtichi mennah funn miah vekk gay dayda!
20Si sawwa leshtahrichi sacha geyyich dich,
un shvetza gottlohsi sacha veyyich dei nohma.
21Oh Hah, doon ich nett selli hassa es dich hassa?
Un doon ich nett selli niddah hayva es sich geyyich dich shtella?
22Ich habb nix es yusht hass fa si;
ich nemm si fa mei feinda sei.
23Gukk in mei innahlichah mensh, oh Gott, un sayn vass in meim hatz is,
broviah mich un sayn mei engshtlichi gedanka.
24Gukk un sayn eb ennichah gottlohsah vayk in miah is,
un fiah mich uf em ayvicha vayk.
Currently Selected:
Psalm 139: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
