Isaaya 54
54
Ruhanga okugarura abantu be abarikubonabonesibwa
1 #
Isa 62:4; 1 Sam 2:5; Gal 4:27. Iwe ngumba 'we, yeshongore,
Iwe otakazaaraga, teera akaari,
Oyeshongore n'eiraka rihango,
Iwe otakarumwaga;
Ahabw'okuba abaana b'otsigirweho nibakira ab'oine iba,
Nikwo MUKAMA arikugamba.
2 #
Isa 49:19. Hangusya omwanya gw'eihema ryawe,
Oreegye emikingo y'omu maju gaawe,
Otagira eki waima, yongyera aha mirunga yaawe,
Ohamye enkondo zaawe;
3 #
Kut 28:14. Ahabw'okuba muryayeshanzira aha rubaju rwa buryo n'orwa bumohso,
Oruzaaro rwawe rukubuure amahanga,
N'endebo ezaabaire ziri amatongo zituurwemu.
4 #
Isa 45:17. Otatiina, ahabw'okuba torihemuka;
Otashoberwa, ahabw'okuba toriitwa nshoni,
Kureka oryayebwa enshoni z'omu butsigazi bwawe,
Kandi ekijumo ky'obufaakazi bwawe torigaruka kukiijuka.
5 #
Isa 62:4, 5; Zek 14:9. Ahakuba Omuhangi waawe niwe baro,
MUKAMA ow'amahe niryo eiziina rye;
Kandi Orikwera wa Israeli niwe Mucunguzi waawe,
Naayetwa Ruhanga w'ensi yoona.
6 #
Isa 49:14. Ahakuba MUKAMA akwetsire
Nk'omukazi otsigirweho, ou omutima gwe gwijwire enaku,
Nk'omukazi oshenzirwe akiri muto,
Nikwo Ruhanga waawe arikugamba.
7 #
Isa 26:20. Ahabw'okuba mbaire nkutsigireho akaanya kakye;
Kwonka ndyakutaaruura, nkwiniire embabazi nyingi.
8Ahabw'okukugirira ekiniga kingi
Nkamara akaanya kakye nkwimire amaisho,
Kwonka ndyakugirira esaasi, nkwiniire rukundo etahwaho,
Nikwo MUKAMA, Omucunguzi waawe, arikugamba.
9 #
Kut 8:21; 9:11. Ahabw'okuba ebyo nibishusira eby'omu biro bya Noa;
Nk'oku naarahiire ku amaizi g'omu biro bye
Gatarigaruka kushandaara mu nsi,
Nikwo ndahiire ku ntarigaruka kukugirira kiniga
N'obu kwakuba okukukabukira.
10 #
Kub 25:12; Ezk 34:25. Ahakuba enshozi ziryarugaho,
N'ebibungo biihweho,
Kwonka embabazi zangye, ezitaruga ha rugyero, tizirikurugaho,
N'endagaano yangye ey'obusingye teriihwaho,
Nikwo MUKAMA okwiniire esaasi arikugamba.
11 #
Isa 51:21; Kush 21:19. Ai bambe iwe orikubonabonesibwa,
Okanagwa oku n'oku omuyaga, otarikuhuumurizibwa,
Reeba, amabaare gaawe ndyagasharuraho amabara marungi,
N'emisingi yaawe ngyeombekyese safiro.
12Amatungu gaawe ndyagombekyesa kalukedoni,
Kandi amarembo gaawe ngombekyese kabunkulo,
N'orugo rwawe rwona ndwombekyese amabaare g'obuguzi bwingi.
13 #
Isa 9:7; Zab 119:165; Yer 31:33, 34; Yoh 6:45. Batabani baawe boona baryayegyesibwa MUKAMA,
Kandi okugogyera kwabo kuryaba kwingi;
14Omu kuhikiirira nimwo orihamiibwa,
Okuhatwa kuryakuba hare,
Ahabw'okuba toritiina;
N'ebirikwitsa obwoba biryakuba hare,
Ahabw'okuba tibirikuhikaho.
15 #
Isa 8:9, 10. Ku haribaho owaimutsya engamba,
Ziryaba zitarugire ahariinye;
Orikwimukiza engamba aryakuzira.
16Reeba, mpangire omuheesi
Ojugutirira omuriro gw'amakara,
Akaihamu eby'okurwanisa;
Kandi mpangire omuhwerekyerezi kucwekyereza.
17Tihariho ky'okurwanisa, eki baheesire kukurwanisa, ekirikubaasa,
Kandi orurimi rwona oruriimuka kukutonganisa oryarusinga.
Obwo nibwo buhunguzi bw'abaheereza ba MUKAMA,
Kandi okwo nikwo kuhikiirira kwabo okurikuruga ahariinye,
Nikwo MUKAMA arikugamba.
Currently Selected:
Isaaya 54: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
