Isaaya 30
30
Eby'okuteisa abarikukwatanisa na Misri
1 #
Isa 1:2; 25:7; 29:15. MUKAMA naagira ati: Abaana abagomi baryareeba enaku,
Abeehanuuza aha bandi, bataanyehanuuzeho,
Abaragaana endagaano, kwonka etari y'Omwoyo gwangye,
Ngu babone kwongyera ekibi aha kindi;
2 #
Isa 31:1; 1 Bag 22:7; Yer 37:5. Abarikwimuka kushuuma Misri, bataanyehanwizeho,
Ngu beesigye amaani ga Faraho,
Basherure obwegamo omu kicuucu kya Misri!
3 #
Isa 20:5. Nikyo ago maani ga Faraho garibakwatsiza enshoni,
N'okwesiga ekicuucu kya Misri kukaba okuhemuka kwanyu.
4Ahabw'okuba abanyiginya be n'obu baraabe bari Zoani,
N'entumwa ze zihikire Hanesi,
5 #
Yer 2:36. Baryahemuka, ahabw'okuba baryashanga bari abantu
Abatarikubaasa kubagasira,
Kandi abatarikubaha buhwezi n'obu gaakuba amagoba,
Kureka ab'okubahemura n'okubajumisa.
6Eki nabi yaahanwire aha nyamaishwa z'omuri Negebu.
Nibaraba omu nsi y'akabi n'obusaasi,
Erikurugwamu entari y'enkazi n'enshija,
Erimu encwera n'enjoka z'obushegu oburikubabiirira,
Baheekyeise endogoya eby'obutungi byabo,
Bataire ebintu byabo aha mabango g'engamira,
Nibaza omu ihanga ry'abantu abataribagasira.
7 #
Isa 36:6. Ahakuba obuhwezi bwa Misri tibwine mutambo kandi ni busha;
Nikyo ndikugyetera eiziina
Rahabu oshutami kwonka.
8 #
Hab 2:2. Hati gyenda, okihandiikye aha kishate ky'eibumba,
Okihandiiye n'omu kitabo,
Kibe ek'obunaku oburiija,
Kigume kiboomesereze ebiro byona;
9Ahabw'okuba n'eihanga eririkugoma,
Abaana abarikubeiha,
Aboojo abarikwanga kuhurira ebiragiro bya MUKAMA,
10 #
1 Bag 22:13; Yer 11:21; 28:1-11; Amo 2:12. Abarikugambira abahanuuzi bati: Mutareeba,
Bakagira baanabi bati:
Mutatuhanuurira ebihikire,
Kureka mugume mutugambire ebyorobi,
Muhanuure eby'obugobya.
11Mutuhigize, muturugye omumaisho;
Titurikwenda kugaruka kuhurira eby'Orikwera wa Israeli.
12Nikyo Orikwera wa Israeli arikugirira ati:
Ahabw'okugaya ekigambo eki,
Mukeesiga okuhata n'okwehabagiza,
Mukaba nibyo mwayegamira,
13Okwo kutahikiirira kuryababeera
Nk'ekisiika kiraingwa ekishatukire, ekirikugogoma, ekiri haihi kugwa,
Eki okugwa kwakyo kubaho ahonaaho omu kaanya kakye;
14 #
Zab 2:9. Kandi kiryayatika nk'enyungu y'omubumbi oku eyatika
Akagyata atarikugibariirira,
N'aha ngusyo zaayo hatatsigareho rwa kuguhisa omuriro omu mahega,
Nari orw'okutahisa amaizi omu iziba.
15 #
Kur 14:14; Zab 81:11; Hos 14:1. Ahakuba oku nikwo Mukama RUHANGA Orikwera wa Israeli yaagizire ati:
Omu kugaruka n'omu kuhuumura nimwo murijunirwa,
Omu kutuuza n'omu kwesiga nimwo amaani gaanyu gariruga.
16 #
Isa 31:1, 3; Hos 14:3. Ngaaha! Nitwija kuhunigra aha mbaraasi;
Kwokwo muryahunga.
Muti: Nitwija kuhungira aha mbaraasi ezirikwiruka munonga;
N'ahabw'ekyo abaribakurata nabo baryaba abarikwiruka munonga.
17 #
Lev 26:17; Bir 28:25; 32:30. Abantu rukumi baryahunga okukangisa kw'omuntu omwe,
Abantu bataano ku baribakangisa, muryahunga,
Okuhitsya obu muritsigara muri nk'ekiti kitsimbirwe aha mutwe gw'orushozi,
Nari nk'ekiti ky'orurango kitsimbirwe omu kibungo.
18 #
Isa 5:16; 8:17; Zab 2:12; 2 Pet 3:9. Nikyo MUKAMA aritegyerereza, ngu abagirire embabazi,
Kandi nikyo ariheerwa ekitiinisa, ngu abagirire esaasi;
Ahabw'okuba MUKAMA ni Ruhanga ocwa emanja z'oburyo,
Abarikumutegyereza boona baine omugisha.
Emigisha y'Abaisraeli ey'omu biro ebiriija
19Iwe ihanga rya Saayuuni 'we, eritwire Yerusaalemu, torigaruka kurira. Ku arihurira eiraka ry'okutaka kwawe, taribura kukugirira mbabazi. Ku arikuhurira aryakugarukamu. 20#1 Bag 22:27. Kandi Mukama n'obu arikuha eby'okurya by'obusaasi n'amaizi g'okubonabonesibwa, Orikukwegyesa tarigaruka kweshereka, kureka amaisho gaawe garyaguma gamureebe. 21#Bir 5:32. Kandi ku muritoora aha mukono gwa buryo nari aha gwa bumosho, amatu gaanyu garyaguma nigahurira ekigambo nikibareetwa enyima nikigira kiti: Ogu nigwo muhanda, mube nigwo mwahamya. 22#Isa 2:20; 31:7; Hos 14:8. Kandi muryashiisha ebishushani byanyu ebibaizirwe ebishwekirwe efeeza, n'ebiheesirwe ebishwekirwe ezaabu. Muryabinagira kimwe nk'ebintu ebisiisikaire, mubigire muti: Murugyeho!
23 #
Zab 65:13; Yer 5:24. Embibo ei muribiba aryagigwisiza enjura, kandi ebi murihinga omu itaka biryayera, bibe bingi. Omu biro ebyo amasyo gaanyu garyariira omu mariisizo mahango, 24ente n'endogoya ezirikuhinga ziryarya eby'okurya ebirimu omwonyo, ebiheheziibwe engari n'entaara. 25Aha izooba ry'okwitirwaho baingi, eminaara ku eriba neesheenywa, orushozi rwona oruraingwa n'ekibungo kyona ekiraingwa, biryahimintikamu emigyera n'enshuro z'amaizi. 26#Isa 1:5, 6; 60:19, 20; Hos 6:1. Kandi aha izooba eri MUKAMA arishemberaho obuhuta bw'abantu be, akabakiza ebihonoka by'enkoni ze, okwaka kw'okwezi kuryaba nk'okujwa kw'eizooba, n'omushana gwaryo guryayeyongyera emirundi mushanju, gube nk'omushana gw'ebiro mushanju.
Okucwekyerezibwa kwa Asiria
27Reeba, eiziina rya MUKAMA niriruga hare,
Niryaka n'ekiniga kye, omu mwika mwingi ogurikucumbuuka;
Eminwa ye eijwire okuguubwa kubi,
N'orurimi rwe ruri nk'omuriro gurikurya busha.
28 #
Isa 8:8; 11:4; 37:29; Nah 1:8. Orwoya rwe ruri nk'omugyera gushandaire,
Ogurikuhika omuntu omu bitsya,
Kushungura amahanga n'orugari orurikucwekyereza,
N'okuta omu nshaya z'amahanga orukoba orurikuhabya.
29 #
Isa 44:8. Muryayeshongora ekyeshongoro nk'eki beeshongora nyekiro aha kiro ky'obugyenyi oburikwera; muryagira omuhimbo omu mutima nk'ogw'omuntu oine omukuri, orikuza aha rushozi rwa MUKAMA ahari Rukiri wa israeli. 30#Isa 28:2; 29:6. Kandi MUKAMA aryahuriza eiraka rye ry'ekitiinisa, ayorekyere okuteera kw'omukono gwe omu kiniga kye kingi n'omu kirimi ky'omuriro gurikurya busha, n'eshato, n'eihunga, n'orubaare. 31Abaasiria emitima eryabahwa omunda ahabw'okutiina eiraka rya MUKAMA, ku aribateera n'enkoni ye. 32#Isa 19:16. Kandi ku bariba nibabateera enkoni ezi MUKAMA ariragiira kubateera, haryabaho okuteera amataari n'enanga; aryabarwanisa naatigita omukono gwe. 33#2 Bag 23:10; Ezk 20:48; 24:9, 10. Ahakuba Tofeti ekateekateekwa okuruga ira, yaateekateekyerwa omugabe. Mbwenu MUKAMA agigizire mpango kandi ndaingwa, yaaba ekikoomi ky'omuriro gw'enku nyingi, kandi omwitsyo gwe, oguri nk'omugyera gw'obuganga bw'ekibiriiti, nigwo guhatweka.
Currently Selected:
Isaaya 30: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
