Isaaya 29
29
Okucwekyerezibwa kw'orurembo Arieli
1 #
2 Sam 5:9. Yeiwe, Arieli, Arieli,
Orurembo oru Daudi yaateiremu orusiisira!
Mwongyere omwaka aha mwaka,
Amagyenyi gabeho omu bunaku bwago;
2Kwonka hoona ndyabonabonesa Arieli,
Habeho okucura n'amaganya.
Kandi Arieli haryambeera nk'amahega ga Ruhanga.
3 #
2 Bag 25:1. Ndyakuteeraho ensiisira embaju zoona kukurwanisa,
Nkugotese eminaara,
Nkutuumeho eby'okukurwanisizaho.
4 #
Isa 17:13, 14. Bwanyima oryagarurwa ahansi, ogambire omu itaka,
Ebigambo byawe birugye ahansi omu mucuucu,
Eiraka ryawe rirugye okuzimu nk'ery'omuzimu,
Rigambire mpora omu mucuucu.
5Kwonka omutwe gw'abazigu baawe guryaba guri nk'omucuucu,
N'omutwe gw'abataine saasi nk'ebishushunga birikutuntumuka.
Nikwo biriba omuri ako kaanya.
6MUKAMA ow'amahe aryabateeza okuhinda kw'enkuba,
N'omutsitsa, n'endigito mpango,
N'akasooroora, n'eihunga, n'ebirimi by'omuriro gurikurya busha.
7 #
Yob 20:8; Zek 12:9. Omutwe gw'amahanga goona agarikurwanisa Arieli,
Boona abarikumurwanisa n'ekigo kye, bakamubonabonesa,
Baryaba nk'ekirooto, nari nkworekwa kwa nyekiro.
8Nk'oku omujara aroota naarya,
Akasisiimuka aine enjara,
Nari nk'oine eiriho oku aroota naanywa,
Akasisiimuka n'ekyaka akiriinie,
Okwo nikwo omutwe gw'amahanga goona
Agarikurwanisa Saayuuni gariba.
9Mwegire ebifa-mutima, mube byo!
Mwehumye, mube empumi!
Mwesinze, mutanyweire!
Mugwererane mutanyweire birikusinza!
10 #
Isa 6:10; Rom 11:8. Ahabw'okuba MUKAMA abashukireho
Omwoyo gw'oturo twingi,
Yaahumya amaisho gaanyu, nibo baanabi,
Yaatwekyerera emitwe yaanyu, nibo bahanuuzi.
11Okworekwa kwona kubahindukiire nk'ebigambo by'omu kitabo ekikwatanisiibwe akamanyiso. Abantu ku bakiha omuntu orikumanya kushoma, baamugira bati, Kishome, abagarukamu ati: Tindikubaasa kukishoma, ahabw'okuba kikwatanisiibwe akamanyiso. 12Kandi ku bakiha otarikumanya kushoma, baamugira bati, Kishome, abagarukamu ati: Tindikumanya kushoma.
13 #
Isa 58:2; Yer 12:2; Ezk 33:31; Mat 15:8, 9; Mak 7:6, 7; Kol 2:22. Mukama yaagira ati:
Abantu aba nibaanyirira haihi,
Bampa ekitiinisa n'akanwa kaabo n'eminwa yaabo,
Kwonka emitima yaabo endi hare,
Kandi okuntiina kwabo n'ekiragiro eki baayegyesiibwe abantu.
14 #
Yer 49:7; Hab 1:5; 1 Kor 1:19. N'ahabw'ekyo reeba, niinyija kukora omurimo gw'okutangaaza omuri aba bantu,
Omurimo gw'eihano kandi ogurikutangaariza kimwe;
Obwengye bw'abanyabwengye baabo buryahwaho,
N'okwetegyereza kw'abantu baabo abarikwetegyereza kuryasherekwa.
15 #
Isa 30:1; Yob 22:13; Ezk 8:12. Baryareeba enaku, abarukusherura munonga ah'okushereka MUKAMA enaama zaabo,
Abu emirimo yaabo eri omu mwirima,
Abarikugira bati: N'oha orikutureeba?
Kandi bati: Orikutumanya n'oha?
16 #
Isa 10:15; Rom 9:20. Ka nimumanya kucurika ebintu!
Omubumbi ashemereire kwinganisibwa n'eibumba?
Kikaareetera ekibumbirwe kugamba aha mubumbi kiti:
Twe yambumbire;
Nari shi ekyahangirwe kugamba ahari Ogwo owaakihangire
Kiti: Tarikwetegyereza.
17Timurikumanya ku hatsigaire akaanya kakye
Lebanooni kuhinduka omusiri gurikweza munonga,
N'omusiri gurikweza munonga kuba nk'ekibira?
18 #
Isa 35:5; Mat 11:5. Eryo izooba ebifa-matu biryahurira ebigambo by'omu kitabo,
N'empumi ziryahumuuka,
Zikire obuhumi n'omwirima;
19 #
Zef 3:12; Mat 5:3. N'abacureezi baryayeyongyera kushemerererwa omuri MUKAMA
N'abooro b'omu bantu baryayesiimira Orikwera wa Israeli,
20 #
Isa 28:22. Ahakuba abataine saasi baryaba busha,
N'abagayi baryahwaho,
Kandi abarikusherura oburyo bw'okukora eby'okutahikiirira
Baryamarwaho,
21 #
Amo 5:10, 12. Aboomesereza omuntu ekigambo nibamubeiherera,
Orikuhanira abantu omu marembo bakamutega omutego,
Kandi ohikiriire bakamwimisa ekimushemereire,
Nibamutura busha.
22 #
Kut 12:1-3. Nikyo MUKAMA owaacungwire Abrahamu arikugirira eby'enju ya Yakobo ati:
Yakobo tarigaruka kukwatwa nshoni,
N'aha maisho ge tiharihinduka kundi.
23 #
Isa 8:13; 60:21; Efe 2:10. Ahakuba ku arireeba abaana be abu naahangire
Bari omu nsi ye ahagati,
Baryahaisa eiziina ryangye ekitiinisa;
Kandi bayraha Orikwera wa Yakobo ekitiinisa,
Batiine Ruhanga wa Israeli.
24Abarikuhaba omu mitima baryahinduka abarikwetegyereza,
N'abarikwetomboita baikirize kwegyesibwa.
Currently Selected:
Isaaya 29: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
