Okuruga 23

Ebindi biragiro

1 # 1 Bag 21:10; Enf 19:5. Otaritwara enkuru z'ebishuba; otarikwatanisa n'omubi okuba mushinja w'eitima. 2#Yob 31:34; Luk 23:23. Otarikurata abaingi kukora ebibi; ku oryetwa kuba mushinja, otarigwera orubaju rw'abaingi okajurira eby'okusingisiriza orubanja; 3kandi otarigwera orubaju rw'omuntu, ngu ahabw'okuba n'omworo.

4 # Enf 25:21. Ku oribugana ente y'omuzigu waawe, nari endogoya ye ehabire, ogimutangire. 5Ku orishanga endogoya y'orikukwanga egwire n'omutwaro, otaryehuzya, okatsiga naafa kubi atyo, kureka omuhwere kugiimutsya.

6 # Yob 31:13. Otariita orubanja rw'omworo w'owaanyu, yaaba naatongana. 7#Efe 4:25. Oyetantare ekigambo kyona eky'ebishuba; kandi otariita otaine rubanja kandi ohikiriire; ahabw'okuba omubi tindimwihaho rubanja. 8Otarirya enguzi, ahakuba enguzi eita amaisho g'abarikureeba, kandi ekiikamya ebigambo by'abataine rubanja.

9Otariita kubi omunyaihanga, haza kunu noomanya omutima gw'omunyaihanga; ahabw'okuba naimwe mukaba muri abanyaihanga omu nsi ya Misri.

10Oryamara emyaka mukaaga noohinga emisiri yaawe, kandi nooshaaruura ebi oyerizemu; 11kwonka omu mwaka gwa mushanju ogirekye eraare, abooro barye ebyemerizemu; kandi ebiritsigaramu biriibwe enyamaishwa. Okwo nikwo oritwaza omusiri gwawe ogw'emizaabibu, n'ogw'emizeituuni.

12 # Luk 13:14, 15. Omu biro mukaaga obe nimwo waakorera emirimo yaawe; aha kiro kya mushanju ohuumure, ente yaawe n'endogoya yaawe zihuumure, mutabani w'omuzaana waawe n'omunyaihanga bagarukwemu amaani. 13Mute omutima aha bi mbagambiire byona; mutarigira obu mugambire aha maziina ga baaruhanga abandi, kandi gatarihurirwa omu kanwa kaanyu.

Ebiragiro by'amagyenyi makuru ashatu omu mwaka

14 # Bir 16:16. Oryaguma ogire obugyenyi bw'ebiro bikuru ahabwangye kashatu omu mwaka. 15Oryagira obugyenyi bw'emigaati etatumbisiibwe; omare ebiro mushanju noorya emigaati etatumbisiibwe, nk'oku naakuragiire, omu bunaku obwatairweho omu kwezi Abibu, ahakuba nikwo waarugiiremu Misri; hatarigira owaija omu maisho gangye engaro nsha. 16Kandi oryagira obugyenyi bw'eigyesha ry'ebi waahingire omu misiri, nigwo muganuro gw'ebi waahendekyeire; kandi ku oriheza kushaaruura byona eby'omu misiri yaawe ebi waahendekyeire aha muheru gw'omwaka, oryagira obugyenyi bw'eishaaruura. 17Oyetwa omushaija weena aryaija areebwe omu maisho ga MUKAMA Ruhanga kashatu omu mwaka.

18Otarihonga eshagama y'ekitambo, eki ntambiirwe, hamwe n'omugaati ogutumbisiibwe; kandi ebishaju by'obugyenyi bwangye otaribiraaza okuhitsya omu kasheeshe.

19 # Enf 3:9. Omuganuro gw'ebirikubanza kwera omu misiri yaawe, oryaguma ogureete omu nju ya MUKAMA Ruhanga waawe. Otariteeka omwana gw'embuzi omu mahenehene ga nyinagwo.

Mukama okubaha maraika w'okubeebembera

20Reeba, nintuma maraika okukwebembera, n'okukurinda omu muhanda, akakuhitsya omu mwanya ogu naakuteekateekyeire. 21#Efe 4:30; 1 Yoh 5:16. Omworobere, ohurire eiraka rye, otamugwisa kubi; ahakuba tarisaasira bicumuro byanyu; ahabw'okuba eiziina ryangye riri omuriwe. 22Kwonka ku orihurira eiraka rye, otaireho omutima, waakora byona ebi ndikugamba, obwo ndyaba omuzigu w'abazigu baawe, n'omubisha w'ababisha baawe. 23#Yos 24:8. Ahakuba maraika wangye aryakwebembera, akuhitsye omu Baamori, Abahiiti, Abaperizi, Abanyakanaani, Abahiivi n'Abayebusi, mbamareho. 24Otariramya baaruhanga baabo, otaribaheereza, n'obu kwakuba okutwaza nkabo; kureka oryabahwerekyerereza kimwe, n'enyomyo zaabo ez'amabaare ozisheenyagure. 25#Bir 7:15. Muryaheereza MUKAMA Ruhanga waanyu, nawe aryaha eby'okurya byawe n'amaizi gaawe omugisha; kandi ndyaiha endwara omuriimwe. 26Tihaine orirugwamu enda, nari oriba engumba omu nsi yaawe; kandi ndyahitsya omubaro gw'ebiro byawe.

27 # Bir 2:25; Yos 2:9, 11. Ndyayohereza okutiinisa kwangye kukwebembere, mpahaaze emitima y'abantu boona abu orihikamu, ndeetere abazigu baawe boona kukuhunga. 28Kandi ndyayohereza enwa, zikwebembere, nizo ziribinga Abahiivi n'Abanyakanaani n'Abahiiti omu maisho gaawe. 29#Bir 7:22. Kwonka tindibabinga mu maisho gaawe kuruga omu nsi omu mwaka gumwe gwonka, ensi etakaaba ekifurukwa, n'enyamaishwa z'omu ihamba zikakanya, zikakunyangaraza. 30Kureka ndyababinga mporampora omu maisho gaawe, okuhitsya obu orikanya, okahungura ensi. 31#1 Bag 4:21. Kandi ndyakuteeraho omwatano okuruga aha Nyanja erikutukura okuhika aha Nyanja y'Abafilistia, n'okuruga aha ihamba okuhika aha mugyera Furaati; ahakuba ndyahayo abantu abatwire omu nsi egyo omu mikono yaawe, obabingye barugye omu maisho gaawe. 32Otariragaana nabo endagaano n'obu kwakuba okuragaana na baaruhanga baabo. 33#Bir 12:30; Yos 23:13. Batariguma omu nsi yaawe, nyentsya bakakuncumuzaho; ahabw'okuba ku oriheereza baaruhanga baabo, buzimazima kiryakubeera omutego.

Currently Selected:

Okuruga 23: RR64

Highlight

Copy

Compare