Okuruga 22

Ebindi biragiro

1 # 2 Sam 12:6; Mat 18:25; Efe 4:28. Omuntu ku ariiba ente nari entaama, yaagiita nari yaagitunda, egyo nte aryagiriha ente itaano, kandi egyo ntaama agirihe entaama ina. Aryariha; kwonka ku ariba ataine kantu, aryatundwa ahabw'obushuma bwe.

2Omushuma ku arishangwa naafumura enju, baamuteera, yaafa, tihaine origiibwaho orubanja ahabw'eshagama ye; 3kwonka ku barimwita bwaseesire, baryagiibwaho orubanja ahabw'eshagama ye. 4#Enf 6:31. Ekiibirwe ku barishanga akiine kikihuriire, yaaba nte, nari endogoya nari entaama, aryagiriha ibiri.

5Omuntu ku aryonesa nkana omusiri gw'ondi, nari omusiri gwe ogw'emizaabibu; nari ku aritsibura amatungo ge, gaayona omusiri gw'ondiijo, aryamuriha aha bi ahingire ebirikukira oburungi, nari amurihe aha byana by'emizaabibu eby'omu musiri gwe ebirikukira oburungi. 6Omuriro ku guryaka, gwakwata amahwa, gwayotsya ebiba by'engano, nari ezikyemereire, nari omusiri gwona, owaatweka ogwo muriro aryariha byona ebyasya.

7Omuntu ku aribiitsya mutaahi we empiiha nari ebindi bintu, byaibirwa omu nju ye, obiibire ku ariboneka, amurihe kabiri. 8Kwonka obiibire ku aribura, mukama w'enju aryairira Ruhanga haihi, kimanywe ku atarakwatsire ha bintu bya mutaahi we. 9#2 Bus 19:10. Ahakuba okuryangatanisa ekintu kyona, yaaba nte nari endogoya nari entaama, nari ekijwaro nari ekintu kyona ekibuzire, eki nyinakyo yaahamya ati: Nikyo eki; orubanja rwabo bombi ruryatonganirwa omu maisho ga Ruhanga; ou Ruhanga aricwera orubanja rukamusinga, aryariha mutaahi we kabiri. 10Omuntu ku arihereka mutaahi we endogoya nari ente nari entaama, nari ekitungirwe kyona ngu akiriise, kyafa, nari kyagira oku kyaba, nari kyatwarwa hataine okireebire, 11#Heb 6:16. habeho okurahira MUKAMA ahagati yaabo bombi, kiherekwa ku atarakwatsire ha kintu kya mutaahi we; mukama waakyo aryaikiriza okwo kurahira, onu arekye kuriha. 12Kwonka ku kiriibirwa owa kiherekwa, aryariha mukama waakyo. 13Ku kiritaanyagurwa enyamaishwa, areete ekiriira kyakyo kibe eky'okuhamya ku kiri ekye; obwo taririha kitaanyagwirwe. 14Omuntu ku aritiiza ekintu kyona ekya mutaahi we, kyasiisikara, nari kyafa, mukama waakyo atariho, buzimazima nyakukitiizibwa aryakiriha. 15Kwonka mukama waakyo ku ariba ariho, tarikiriha. Kandi ku kiriba kiguririirwe, kiryagwana n'eki baakiguririire.

16 # Bir 22:28. Omuntu ku aribeihabeiha omwishiki otakamanyaga mushaija, kandi otarikugambwa bugyenyi, yaabyama nawe, aryamujuga, amushwere. 17Kwonka ishe ku aryangira kimwe kumumuhingira, aryariha enjugano nk'ezi bajuga omwishiki.

18Otariikiriza omurogikazi kugumaho.

19Oribyama n'enyamaishwa weena, aitwe.

20 # Kub 25:2. Oritambira Ruhanga ondiijo weena ekitambo, atari MUKAMA, acwekyererezibwe kimwe.

21 # Lev 19:33, 34. Omunyaihanga otarimukora kubi, n'obu kwakuba okumuhata; ahakuba naimwe mukaba muri abanyaihanga omu nsi ya Misri. 22#Isa 1:17. Mutaribonabonesa omufaakazi weena nari efuuzi. 23#Bir 15:9; Yak 5:4. Ku murigira eki mwabaitsa, bantakira, buzimazima ndyahurira okutaka kwabo, 24ngirire imwe ekiniga kingi, mbaitse rurara; abakazi baanyu babe abafaakazi, n'abaana baanyu babe efuuzi.

25 # Neh 5:7; Ezk 18:8. Ku origuza omworo weena omu bantu bangye empiiha, otarimutwaza nk'abaihuza boona oku bagira, kandi otarimushaba enshaagi. 26#Amo 2:8. Ku oriba waakwatiriziibwe omwenda gwa mutaahi waawe, otarirenzya eizooba otagumugaruriire; 27ahabw'okuba nigwo ayeshweka gwonka; nikyo kijwaro ky'omubiri gwe. Noogira ngu aryayeshweka ki? Kandi ku arintakira, ndyamuhurira; ahakuba ndi omunyambabazi.

28 # Mub 10:20; 2 Pet 2:10. Otarijuma Ruhanga, n'obu kwakuba okukyeena omutegyeki w'eihanga ryawe.

29 # Enf 3:9. Otarikyerererwa kuntoijera ahari byona ebi oshaarwire, kandi n'aha by'okunywa ebirugire omu manyuukiro gaawe. Omujigaijo omuri batabani baawe oryamumpa. 30Kandi nikwo oritwaza ente zaawe n'entaama zaawe; omujigaijo gwayo guryamara ebiro mushanju na nyinagwo; aha kiro kya munaana oryaguntoijera. 31#Ezk 4:14. Muryaba abantu abaanyereziibwe; n'ahabw'ekyo mutarirya enyama n'ekintu kyona eki enyamaishwa eriire, ekatsiga omu ishwa; muryaguma mukitambikire embwa.

Currently Selected:

Okuruga 22: RR64

Highlight

Copy

Compare