Abaefeso 4

1 # Kol 1:10. N'ahabw'ekyo nyowe, embohe ahabwa Mukama, nimbeeshengereza mugyendere omu buryo obushemereire okwetwa oku mwayetsirwe, 2#Kol 3:12. mwebundaarize n'obucureezi bwona, nimwetwara, nimugumiriririzana omuri rukundo, 3nimwezirika kurinda obumwe bw'Omwoyo, muteerainwe omurunga gw'obusingye. 4Hariho omubiri gumwe, n'Omwoyo omwe, nk'oku mwayeteirwe amatsiko gamwe omu kwetwa kwanyu, 5Omukama omwe, okwikiriza kumwe, okubatizibwa kumwe, 6Ruhanga omwe, Tataitwe twena, orikukira boona, okoresa boona, kandi ori omuri boona. 7#1 Kor 12:11. Kwonka omuntu weena omuriitwe akaheebwa embabazi nk'ekigyero ky'ekiconco kya Kristo oku kiri. 8#Zab 68:18. Nikyo kyagambiirwe ngu:

Ku yaatembire omu iguru, akatwara eminyago,

Yaagabira abantu ebiconco.

9 # Yoh 3:13. (Beitu ekigambo eki ngu, Akatemba, nikishoboororwa kita? Tikirikumanyisa ngu, Akabanza kushuuma okuzimu? 10Ogwo owaashuumire niwe yaatembire, akaza ahaiguru munonga aharikweshumba eiguru ryona, ngu abone kuhikiiriza byona.) 11Kandi akaha abamwe kuba entumwa, abandi baanabi, abandi ababuurizi b'engiri, abandi kuba abariisa n'abeegyesa, 12ngu abarikwera bateekateekyerwe omurimo gw'okuheereza, babone kwombeka omubiri gwa Kristo, 13#Kol 1:28. okuhitsya obu twena turihika aha kugira obumwe bw'okwikiriza, n'okuhika aha kumanya Omwana wa Ruhanga, okuhitsya obu turiba abantu bakuru, tukahika aha bukuru obw'orugyero rwa Kristo oruhikire, 14#Heb 13:9. ngu turekye kuguma turi abaana, nituza oku n'oku, nitutwarwa buri muyaga gw'enyegyesa n'oburyarya bw'abantu n'obugobya bwabo n'obwengye bwona bw'okutuhabisa. 15#Kol 1:18. Kureka tugambe amazima omu kukunda, omuri byona tukurire omuri Yesu, niwe Mutwe; 16#Kol 2:19. omu Mutwe ogwo nimwo omubiri gwona guteeranirwa gye, gukahamibwa hamwe emitsi y'engingo zoona, nk'oku zihwerana, buri rugingo rwaba nirukora eki rwahangiirwe; okwo nikwo omubiri gwona gukura, gukeeyombeka omuri rukundo.

Omuntu owa ira n'omuntu omusya oku barikushusha

17N'ahabw'ekyo eki ndikugamba kandi nkahamya omuri Mukama waitu n'eki; murekye kugyenda nk'oku Abanyamahanga bagyenda, nibakuratira ebiteekateeko byabo ebitaine mugasho; 18#1 Pet 1:14. obwengye bwabo buri omu mwirima, obutamanya oburi omuribo n'obugangaazi bw'omu mitima yaabo bibataaniise n'amagara agarikuruga ahari Ruhanga; 19kandi bari nk'ebiti, beetaahize omu by'okurigira okubi, n'omu murur gw'okukora ebihagaro eby'emiringo yoona. 20Kwonka imwe tikwo mwayegire Kristo mutyo, 21ku muraabe niwe mwahuriire, mukeegyesibwa omuriwe nk'oku amazima gaba omuri Yesu. 22#Kol 3:9. Ebyo nibibeegyesa aha by'emicwe yaanyu eya ira, ngu mujuure omuntu waanyu owa ira, orikujunzibwa okwetenga okurikuhabisa, 23#Rom 12:2. muhindurwe basya omu mwoyo gw'obwengye bwanyu, 24mujware omuntu ondiijo omusya, owaahangirwe omu nshusha ya Ruhanga omu kuhikiirira n'okwera okw'amazima.

25 # Zek 8:16. N'ahabw'ekyo mujuure ebishuba, omuntu weena agambe amazima na mutaahi we; ahabw'okuba turi engingo za bagyenzi baitu. 26#Yak 1:19, 20. Mugire ekiniga, kwonka murekye kushiisha; eizooba rirekye kurenga mukikiine; 27murekye kuha Sitaane omwanya. 28#1 Tes 4:11. Omushuma arekye kugaruka kwiba, kureka akore n'amaani, naakoresa emikono ye emirimo mirungi, abone kutunga eby'okuha abooro. 29#Kol 3:16, 17. Omu kanwa baanyu hatarirugamu ekigambo kyona ekibi; kureka mugambe ebirungi ebirikubaasa kukuza abantu ahu bishemereire kugambirwa, bibone kuhaisa abarikubihurira omugisha. 30#Isa 63:10. Kandi mutarigwisa kubi Omwoyo Orikwera wa Ruhanga, owaabateereirweho kuba akamanyiso okuhitsya aha kiro ky'okucungurirwaho. 31Obushaarizi bwona n'ekiniga n'okuguubwa kubi n'oruyombo n'okujumiirana, hamwe n'eihari ryona biihwe omuriimwe. 32#Mat 18:22-35; Kol 3:12, 13. Mukorerane gye, mugirirane embabazi, kandi musaasirane, nk'oku Ruhanga yaabasaasiire omuri Kristo.

Currently Selected:

Abaefeso 4: RR64

Highlight

Copy

Compare