Abaefeso 5

Okugyendera omu mwirima, n'okugyendera omu mushana

1N'ahabw'ekyo mukuratire Ruhanga nk'abaana abarikukundwa. 2#Kur 29:18. Kandi mugyendere omu kukunda nk'oku Kristo yaatukunzire, akeehayo ahabwaitu okuba empongano n'ekitambo ahari Ruhanga, omugaju ogurikutaamirana. 3Kwonka obushambani n'ekihagaro kyona n'okwetenga kwona bitarigambwaho omuriimwe, mube nk'oku abarikwera bashemereire kuba. 4#Kol 3:8. Omu kugamba kwanyu murekye kugamba ebirikwitsa enshoni n'eby'obushema n'eby'okushetsya ebitahikire; kureka musiima Ruhanga. 5#1 Kor 6:9, 10. Kwonka eki mukumanyire kimwe, ngu tihariho mushambani n'obu yaakuba okora ebihagaro n'obu yaakuba omwetengi, niwe oramya ebishushani, oriheebwa omugabo omu bukama bwa Kristo na Ruhanga. 6Hatagira omuntu owaababeihabeihesa ebigambo ebitaine mugahso; ahabw'okuba ebibi ebyo nibyo bireeta ekiniga kya Ruhanga aha batarikuhurira. 7N'ahabw'ekyo mutarikwatanisa nabo; 8#1 Pet 2:9; Yoh 12:36. ahakuba ira mukaba muri omwirima, kwonka hati muri omushana omuri Mukama; mugume mugyende nk'abaana b'omushana; 9ahabw'okuba ebyana by'omushana bireeberwa omu burungi bwona n'omu kuhikiirira n'omu mazima; 10#Rom 12:2. kandi mwetegyereze ebirikusiimwa Mukama. 11Mutarikwatanisa n'emirimo y'omwirima etarikwana; kureka mugihane. 12#Rom 1:24. Ahakuba ebi abo bakorera omu mubonano, nangwa n'okubigambaho kwonka, n'eky'enshoni. 13#Yoh 3:20, 21. Kwonka byona, ku byakirwa omushana, bireebwa; ahakuba kyona ekyakirwa omushana kikareebwa, kiba omushana; 14nikyo kirikugambirwa ngu:

Sisiimuka, iwe ogwejegyeire, ozookye omu bafu,

Kristo akwakire.

15N'ahabw'ekyo mwerinde, mumanye oku murikugyenda, mutagyenda nk'abataine bwengye, kureka nk'abanyabwengye, 16mutafiisa busha omwanya, ahakuba ebiro ebi ni bibi. 17#Rom 12:2. N'ahabw'ekyo mutaba abashema, kureka mumanye buzima ebi Mukama waitu arikwenda. 18#Luk 21:34; Enf 20:1. Mutarisinda viinyo erimu okujagarara, kureka mwijure Omwoyo. 19Mugambirane zaaburi n'ebyeshongoro n'ebyevugo eby'Omwoyo, nimweshongorera Mukama n'emitima yaanyu yoona, nimuteera enanga, 20#Kol 3:17. nimusiima Ruhanga Isheboona obutoosha ahabwa byona omu iziina rya Mukama waitu Yesu Kristo, 21#1 Pet 5:5. nimworoberana ahabw'okutiina Kristo.

Emitwarize emirungi y'abashaija n'abakazi

22 # 1 Pet 3:1. Imwe abakazi, mworobere baabaroimwe nk'oku mworobera Mukama. 23#1 Kor 11:3. Ahakuba omushaija niwe mutwe gw'omukazi, nk'oku Kristo ari Omutwe gw'ekanisa, omubiri gwe; kandi niwe Mujuni waayo. 24Nk'oku ekanisa eyorobera Kristo, n'abakazi babe nikwo baayorobera abashaija baabo omuri byona. 25Kandi imwe abashaija, mukunde abakazi baanyu, nk'oku Kristo yaakunzire ekanisa, akeehayo ahabwayo, 26#Tit 3:5. ngu agyeeze, aherize kugishemeza ahabw'okugyogyesa amaizi n'Ekigambo kye; 27ngu ekanisa egyo ebone kumurikwa omu maisho ge eri ey'ekitiinisa, etaine ibara n'obu gwakuba omufunya, nari ekintu kyona ekirikushusha kityo, kureka ebe erikwera etaine kamogo. 28Nikwo n'abashaija bashemereire kukunda abakazi baabo nke'mibiri yaabo bonka. Okunda omukazi we, biri ayekunzire; 29ahakuba tihariho muntu oyanga omubiri gwe, kureka aguriisa, agucuma, nk'oku Kristo agira ekanisa; 30#1 Kor 6:15. ahabw'okuba turi engingo z'omubiri gwe. 31Nikyo omushaija atsigiraho ishe na nyina, akateeranwa n'omukazi we, bombi bakaba omubiri gumwe. 32#Kush 19:7. Egi n'enaama nkuru; kwonka nyowe ningigyeranisa ahari Kristo n'ekanisa. 33N'obu kiraabe kiri kityo, omuntu weena omuriimwe akunde omukazi we, nk'oku ayekunda; n'omukazi nawe ashemereire kutiina iba.

Currently Selected:

Abaefeso 5: RR64

Highlight

Copy

Compare