ARoma 8

Egumi mwa Muneba Woweela

1Mowindo dhiinova kudha okala okoniwa wa athu eli mwa Yesu Kirixtu. 2Vowi nlamulo na Muneba Woweela, nnanivaha egumi mwa Yesu Kirixtu, nihigitapula mmalamuloni a yoothega ni a okwa. 3Mulugu ohiirana dhedho Malamulo a Mozezi dhahaandiliiwa wiirana, mwaha wi Malamulo ayo yahilodhosiwa ni omuthu weehu wootedemanela dhootakala. Mulugu ohukona yoothega mmwiilini, voomurumiha Mwaanaye mwa mwiili wona muthu oothega. Yoothega eyo ehibwanyula mwa omuthu. 4Mulugu ohiirana nda wi wogoowa walamuleliwa ni Malamulo a Mozezi naande waakwaniha. Nihaanda waakwaniha ndo mwaha wi dhiinova kannahara omuthu weehu, mbwenye nnahara Muneba Woweela.

5Athu enahara epaddi ya omuthu, moobuwelelo eewa enatedemanela dha omuthu. Mbwenye athu enahara Muneba Woweela, moobuwelelo eewa enoobuwelela dhedho dhinafuna Muneba Woweela. 6Ohela moobuwelelo a omuthu fuukwawene, mbwenye ohela moobuwelelo dhedho dhinafuna Muneba Woweela, onodhiiha egumi ni murenddele. 7Moobuwelelo a omuthu omwiiddani ni Mulugu, mwaha wi kineehela vati va Malamulo aaye. Owoga mwa ebaribari, kinaakwaniha. 8Ole onakala mwa omuthu kanaanda omuhagalaliha Mulugu.

9Mbwenye nyo kamunakala mwa omuthu. Munakala mwa Muneba Woweela, akala Muneba oyo wa Mulugu onakala mwa nyo. Mbwenye akalavo ohinna Muneba wa Kirixtu, ebaribareene kahuwo a Kirixtu. 10Akala Kirixtu oli mwa nyo, naari mwiili dheenyu dhigakwile mwaha wa dhoothega, munovahiwa egumi ni Muneba Woweela mwaha wi Mulugu onowuwiirani owogoowa. 11Muneba wa oyene amvenyihile Yesu muukwani wakala mwa nyo, oyene amvenyihile Kirixtu muukwani onoodha avahe teto egumi mwiili dheenyu dhookwa, odheela mwa Muneba waaye onakala mwa nyo.

12Mowindo addibilaga, arogoraga, nihikalana mangawa, mangawa ayo kahuwo wi niharege dha omuthu. 13Vowi akala munahara mukalelo oyene wa omuthu, munoodha mukwe; mbwenye akala ni nikamihedho na Muneba Woweela munoopa meerelo eenyu ootakala, munoodha mukalena egumi.

14Athu aatene ayene Muneba wa Mulugu onaasogoleliiwa, bi ahima a Mulugu. 15Muneba waakeliliinyu kunookalihani adhaari wi moovege dila biili. Moohiyaniha, mwaakelile Muneba onowiirihani wi mwiithaniwege ahima a Mulugu. Odheela mwa Muneba oyo nnowundda, niiraga: <<Aba!#8.15 Aba enatapulela babani mu ewogelo ya eAramayiku. Babani!>> 16Mwiinyeene Muneba Woweela onowiirela onamoona wa mirima dheehu wi nili ahima a Mulugu. 17Vano akala nili ahima a Mulugu, nnoodha naakele vamohi ni Kirixtu, mareeliho yanilogoleleliiye. Nnoodha naakele vamohi ni Kirixtu akala nnorabula ni oliye wi nthithimihiwe vamohi ni oliye.

Nthithimiho nenddo nnadhiihu naakele

18Miyo gihikalana ebaribari wi goyi enooniihu dhiinova kinaligana nivang'onong'ono ni nthithimiho nenddo Mulugu nnisasanyedheliiye. 19Dhoopaddusiwa dhaatedhene dhinajejiha ni ofunesesa wi Mulugu aavuhulele anaaye voweela. 20Vowi dhoopaddusiwa dhahigonjihiwa ni dhoohunoneya, ehili ofuna weewa mbwenye Mulugu deerihile wi dhigonjihe. Ahiirana ndo ni ejejihedho 21wi dhoopaddusiwa ndo dhinoodha dhitapuliwe muudhaarini woovudda ni waakela mootapuwa nthithimiho na ahima a Mulugu.

22Nihinona wi ofiyedha dhiinova dhoopaddusiwa dhaatedhene dhinowundda ni dhoovoreya wona mwihiyana mudhidhi wa obala. 23Vano kahuwo dhoopaddusiwave dhinaandda, eehi, mbwenye teto hiyo ninna dhoovaha dhowambeela dha Muneba Woweela, nnowundda mmirimani, nijejihedhaga wi Mulugu anithome okala anaaye, ela sowi wooboliwa wa mwiili dheehu. 24Fumoojejihedha mwemo nivulumusiwiihu. Vano noonaga dhinajejihiihu, kahuwo ojejiha. Onajejihedha enooniiye baani? 25Mbwenye akala nnojejihedha dhedho dhihinooniihu, nnojejihedha nrabulelaga ni ovilela.

26Mwa mukalelo mmohive, Muneba Woweela ononikamihedha mwa olodhowa weehu. Vowi hiyo kannonile olobela wona munafuneyeliiwa. Mbwenye Muneba Woweela mwiinya ononilobelela ni wiikubanyiha woohuwogeya. 27Vano Mulugu onoona dha muwari mwa mirima dha athu, ohunona dhoofuna dha Muneba Woweela, mwaha wi onowaalobelela athu oweela mirima wona Mulugu munafuneliiye.

28Hiyo nihinona wi Mulugu onoweeddiha dhego dhaatedhene mwapama wa ale enamudhivela, ayene enawiithaniiye mooligana ni moobuwelelo aaye. 29Vowi Mulugu athu yaasakuliiye wale-wale, oliye ahaathoma wi ekale wona oofwanafwana ni Mwaanaye wi Mwaana oyo akale owambeela mwa addibila ni arogora ajinji. 30Mulugu kakule waathomave teto ahawiithana, vawiithaniliiye teto ahawiira owogoowa, vawiiriliiye owogoowa teto ahaathithimiha.

Odhivela wa Mulugu footikiniha

31Ki vano nnawoge ddi mwa dhedhi? Akala Mulugu oli mwa hiyo, onaanigonjihe baani? 32Ole ohunikooddihedhe Mwaana aaye-aaye, mbwenye ahimveleela wa hiyo aatene, kananivahe dhaatedhene mwa mahala? 33Onaasumele ale Mulugu yaasakuliiye baani? Kalivo! Vowi di Mulugu mwiinyeene onawiira owogoowa. 34Onaakone baani? Kalivo! Vowi Yesu Kirixtu, oyene akwile, avenyihiwa muukwani, oyene okaraatile omoononi wooja wa Mulugu, di Yesu oyene onanilobelela. 35Ki onaanimwalanihe ni odhivela wa Kirixtu baani? Enakale goyi, naari dhoovoreya, naari oharahariwa, naari dala, naari osiwa, naari dhowoopiha, naari okwa? Nivang'onong'ono! 36Wona munawogela Maleba Ootaleleya, yiiraga:

<<Mulugu, mwaha wowuudhivelani nyo,

malabo maatene nnajejihedha opiwa,

nneeriwa wona mabila enajejihedhiwana omapiwelo>>. # 8.36 Masaalimu 44.22.

37Mbwenye mwa dhaatedhene dhedhi nili oogonjiha mookwaranya, odheela wa ole onidhivele. 38Ebaribareene gihinona mohaanganyedha wi kavili yego enaanimwalanihe ni odhivela waaye. Naari okwa, naari egumi, naari angero, naari mineba dhootakala, naari dhego dhiliwo, naari dhoosogolo, naari kopolo dhimohi, 39naari dha odhulu, naari oddiiha wa vati, naari yego emoheene yoopaddusiwa kidha enimwalaniha ni odhivela wa Mulugu oli mwa Yesu Kirixtu, Nabwiya eehu.

Currently Selected:

ARoma 8: tke

Highlight

Copy