ARoma 7

Musibe wa matelo

1Addibilaga, arogoraga, ginawoga ni nyo munonile dha malamulo. Muhunona pama wi Malamulo enalamula dha muthu agali mugumi baahi. 2Pumwemo: Nlamulo nnawoga wi mwihiyana ooteliwa doomageya ni mamune mudhidhi waatene agali mugumi. Vano mulobwanaya akwa, mwihiyana onotapuwa mmalamuloni nnawoga dha matelo. 3Mowindo ateliwa ni mulobwana mmohi, mamune agali mugumi, mwihiyana oyo nlamulo nnamwiira ooraruwa. Mbwenye mamune akwa, mwihiyana ole ohutapuwa mmalamuloni a matelo, mowindo ateliwa ni mulobwana mmohi kanakala namararuwa.

4Amudhaaga, emodha-modhave nyo teto muli ookwa vowiiwanana ni Malamulo, vowi nyo muhukwa vamohi ni Kirixtu. Ela yaali wi mukale a mmohi, ole ovenyihiwe muukwani. Muli a Kirixtu wi mvahe dhoovaha wa Mulugu.

5Vowi valamuliwiihu ni omuthu weehu, dhikwaminigwa dhoothegiha, dhedho Malamulo dhatatamuliiwa, dhalaba mwa hiyo, mowindo noovaha dhoovaha dhanithukulela okwa. 6Mbwenye dhiinova nihitapuwa mMalamuloni. Nili ookwa mMalamuloni, ayene wale yanimaga. Dhiinova Muneba Woweela ononikamihedha omwiimelela Mulugu mwa dila exa, ehili mwa dila yawale ele yooharaga Malamulo oolebiwa.

Malamulo a Mulugu ni yoothega

7Vano niwoge ddi? Niwoge wi Malamulo a Mulugu si yoothega? Nivang'onong'ono! Ebaribareene Malamulo ayo ehiginoniha yoothega. Vowi kagaanone otakala wa osilila, nlamulo naheere nihiwoga, niira: <<Kusilile>>.#7.7 Okuma 20.17; Deteronomiyo 5.21. 8Mwaha wa nlamulo nddo, yoothega yahifwanya mpatha ovenyiha mwa miyo makalelo a osilila oohiyana-hiyana. Vowi vihili Malamulo, yoothega ehikwa. 9Wale ganna egumi yoohunona Malamulo. Mbwenye vevo vambeeliimi onona nlamulo, yoothega yahambeela oliba, mowindo miyo okwa. 10Vano nlamulo nddo nafwaneele waafiyiha athu wiigumini, nihigifiyiha omakwelo. 11Vowi yoothega egafwanyile mpatha wavahile nlamulo, mwa nlamulo nddo, yoothega yahiginyengetha, ogipa.

12Mohaanganyedha, Malamulo a Mulugu boweela teto kadda nlamulo thoweela, nowogoowa, napama. 13Ela sowi yego yapama ehigithukulela omakwelo? Nivang'onong'ono! Mbwenye yoothega sigipile voolabiha yego yapama. Mowindo, odheela mwa nlamulo, makalelo a ebaribari a yoothega ehooneyihiwa voweela wi sootakala mookwaranya.

Makalelo meenddi enawana muwari mwa muthu

14Nihinona wi Malamulo a Mulugu ba omulugu. Mbwenye miyo gili mwa omuthu, ogulihiwe wona mudhaari a yoothega. 15Kaginanonelamo nde dhineeriimi. Vowi kagineerana dhinafuniimi wiirana, mbwenye dhineeddaniimina sineeriimina. 16Akala gineerana dhihinafuniimi, ginarumeedhela wi Malamulo a Mulugu bapama. 17Mowindo kahuwo miyo gineerana yabure, mbwenye yoothega enakala mwa miyo. 18Gihinona wi mwa miyo kamunakala yego yapama, ela sowi omuthu waaga. Gihinona ndo mwaha wi naari gifunaga wiirana dhapama, kaginaanda wiirana. 19Kagineerana dhapama dhinafuniimi, mbwenye gineerana dhootakala dhihinafuniimi, ndo ginowiirana. 20Akala ginowiirana dhedho dhihinafuniimi, kahuwo miyo oneerana, mbwenye yoothega enakala mwa miyo sineerana.

21Ndala ginowoona nlamulo ndda: Gaafunaga wiirana dhapama, ginafwanya dhootakala vakukuuve vaaga. 22Murima waaga onohagalala ni Malamulo a Mulugu, 23mbwenye ginowoona muwari mwaaga wi nihikalawo nlamulo nimohi nnawana ni nlamulo nnarumeedhiimi mmoobuweloni mwaaga, nlamulo nimohi nddo nnogiiriha okala mudhaari a nlamulo na yoothega enakala muwari mwaaga. 24Ooddilu di miyo! Onaagitapule baani mwiili waaga ola onagithukulela omakwelo? 25Ginomutthettheela Mulugu onivulumusile odheela mwa Nabwiya eehu Yesu Kirixtu! Mowindo ginofuna omwiimelela Mulugu mmoobuweleloni mwaaga, mbwenye muwari mwa omuthu waaga, ginahara nlamulo na yoothega.

Currently Selected:

ARoma 7: tke

Highlight

Copy