ARoma 9
9
Mulugu ni nlogo nasakuliiye
1Ginawoga ebaribari mwa Kirixtu, kaginaratha. Murima waaga, vamohi ni Muneba Woweela, onowiirela onamoona wi 2gihikanna okubanya wuulubale teto ginovoreyiwa moohuhiyedhedha mmurimani mwaaga mwaha wa amudhaaga, aEzarayeli. 3Gahaakwanihege waakamihedha aliwa, goorumeedha oddubiwa, gimwalanihiwe ni Kirixtu mwaha wa odhivela wa addibilaga a nlogo naaga na omuthu. 4Aliwa ba aEzarayeli; aliwa Mulugu ahaasakula wi ekale anaaye; wa aliwa ahawooniha nthithimiho naaye. Ni aliwa ahisasanya nipangano no waandana, waavaha Malamulo, ahaasuuziha weebedha teto ahaavaha dhoororomeliha dhaaye.#9.4 Moone Okuma 4.22; Deteronomiyo 7.6; 14.1-2. 5AEzarayeli anamabaliwelamo a makolo eehu: Abarahamu, Ezaaki ni Yakobo. Kirixtu obaliwe mwa nlogo nendda, nawogaga dha omuthu waaye, oliye di Mulugu onalamula dhaatedhene, dooreelihiwa ofiyedha okala ni okala. Ameni.
6Kahuwo wi Mulugu kaakwanihile wiirana dharoromelihiiye. Vowi kahuwo anamabaliwelamo aatene a nlogo na aEzarayeli eli aEzarayeli a ebaribari. 7Kahuwo wi anamabaliwelamo aatene a Abarahamu bi anaaye. Vowi Mulugu ahimwiirela: <<Ahima a Ezaaki weekiiwa bineethaniwege anamabaliwelamo aawo>>.#9.7 Wambeela 21.12. 8Ela enatapulela wi kahuwo ahima aatene ebaliwe ni Abarahamu eli ahima a Mulugu. Mbwenye ahima oororomelihiwa weekiiwa bineelengeliwa anamabaliwelamo a ebaribari a Abarahamu. 9Vowi Mulugu ahimuroromeliha oliye, wiira: <<Vavira yaaka ginowela, Saara oneere ombala mwaana-mulobwana>>.#9.9 Wambeela 18.10, 14.
10Kahuwo osakuliwave wa Ezaaki teto ahima abiili a Rabeka babiiwa aali mmohive, nikolo neehu Ezaaki;#9.10 Moone Wambeela 25.21. 11-12naari anapata ayo ehinabaliwe, ehineerena yapama naari yootakala, Mulugu ahimwaaddelaga Rabeka, wiira: <<Mwaana owambeela obaliwa onoodha amwiimelelege amung'onong'onoya>>.#9.11-12 Wambeela 25.23. Mulugu ahiirana dhedhi wi dhoofuna dhaaye dha omusakula muthu dhidhowegeve, kawaali mwaha wa dhowiira dha muthu, mbwenye mwaha wa ole onawiithana athu. 13Wona Maleba Ootaleleya munawogeliiwa, yiiraga: <<Yakobo gahimusakula, mbwenye Esawu gahimukoodda>>.#9.13 Malakiya 1.2-3.
14Ki vano, nnawoge ddi? Mwa Mulugu muhukala dhohogoowa? Nivang'onong'ono! 15Oliye ahimwaaddela Mozezi, wiira: <<Ginoodha gimweeddiwele thagaraga oyene ginamfuniimi omweeddiwela thagaraga, ginoodha gimukurumuwele oyene ginamfuniimi omukurumuwela>>.#9.15 Okuma 33.19. 16Mowindo osakula wa Mulugu kunadheela mwa dhoofuna dha muthu, naari dhinaxixiiye wiirana, mbwenye dhinadheela mwa ole winna thagaraga oli Mulugu. 17Vowi Maleba Ootaleleya yiire Mulugu ahiwoga ni Farawo, wiira: <<Guhuuvaha omwene wi ni we goonihe kopolo dhaaga teto wi ndina naaga nivuwihiwe elabo yaatene ya vati>>.#9.17 Okuma 9.16. 18Mowindo Mulugu onomweeddiwela thagaraga muthu onamfuniiye, onomvaaddiha murima onamfuniiye.#9.18 Moone Okuma 4.21; 7.3; 9.12; 14.4, 17.
Owali ni thagaraga dha Mulugu
19Mowindo mmohi oneere ogikoha, eerege: <<Dhakala ndo, ki Mulugu onanikonela ddi? Ki baani onaapambihe ofuna wa Mulugu?>> 20Muthu, we oli aani wi ovaanyihanege ni Mulugu? Yowuubiwa kinamukoha wuubile, yiira: <<Oguubele ddi mowinda?>> 21Namuuba kanna owodha wowuuba ni ologo mmohive dhibale biili, emohi yoolabihana dhooriiheya, emohiwa yoolabihana dhoonyemuwa?
22Si dhedho Mulugu dhiiriliiye. Afunile wooniha owali waaye teto wi kopolo dhaaye dhinoneye. Mowindo ahivilela vajinji wa ale yafwaneelele orabulihiwa, wona ebale yoonyemuwa, ayene yaatolosiwe. 23Mulugu ahifuna teto wooniha nthithimiho naaye nuulubale nikuthuleliiye, wa ale yaweeddiweliiye thagaraga, wona ebale yooriiheya, nili ale yaasasanyedhiiye wale wi yaakele nthithimiho naaye. 24Vowi hiyo nili ale Mulugu yawiithaniliiye, oohukala ookumela wa aZhudewu weekiiwa, mbwenye teto ookumela wa athu a malogo mamohi. 25Dhili wona Mulugu munawogeliiye muniivuru na Ozeya wi:
<<Ginoodha githome: <Nlogo naaga>,
ale ehili a nlogo naaga,
ginoodha gimuthome: <Oodhivela aaga>,
ole gahamudhiveliimi. # 9.25 Ozeya 2.23.
26 Vano mburo mmohive waaddeliwiiwa,
yiira: <Kamuli nlogo naaga>,
vevo enoodha ethomiwe:
<Ahima a Mulugu eegumi> >>. # 9.26 Ozeya 1.10.
27Teto namavuhulela Ezaya ahiwoga moogweliha madhu dha a Ezarayeli, wiira:
<<Naari a Ezarayeli yinjivileve wona museenga wa munyaza,
athu oohala vang'ono binaadhe evulumusiwe.
28 Vowi Nabwiya onoodha aathonge athu a elabo
ya vati mowaaguva, mowaakwanela>>. # 9.27-28 Ezaya 10.22-23.
29 Nda dhili wona mwavuhulele Ezaya wale, eera:
<<Nabwiya a Anyakoddo a Odhulu aheere ahinihiyedha
anamabaliwelamo neere obwanyuliwa
wona Soddoma ni Gomora>>. # 9.29 Ezaya 1.9.
Ezarayeli ni Muselu Wapama
30Ki vevo niwoge ddi? Niwoge wi ale yahaali aZhudewu, yahasayela wiiriwa owogoowa, yahaanda wiiriwa owogoowa voororomela. 31Mbwenye aEzarayeli yasayela wiiriwa owogoowa voohara Malamulo, kayaakwanihile. 32Mwaha bwaddi? Mwaha wi yasayela wiiriwa owogoowa mwa dhowiira dheewa, ehili mwa nroromelo. Mowindo yahikwakwathuwa vanibweni nookwakwathusa. 33Wona mulebeliwiiwa, yiira:
<<Keeng'anani, miyo ginohela muZiyoni, # 9.33 Ziyoni naali ndina nimohi na Zheruzalemi.
nibwe nookwakwathusa,#9.33 Nibwe nookwakwathusa Naari wi: nibwe noovoreyiha. nibwe nddo nootongwiha,
ole onamuroromela oliye kadha akalana manyazo>>. # 9.33 Ezaya 8.14; 28.16.
Currently Selected:
ARoma 9: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
