ARoma 12

Egumi exa ya eKirixtu

1Mowindo, addibilaga, arogoraga, ginowuukokomezani odheela thagaraga dha Mulugu wi mwiipeleke wona mukutho wa egumi, woweela, woomudhivela Mulugu. Oyene bu mukalelo weenyu wa ebaribari womweebedha mwa muneba. 2Kamutajihe makalelo a athu a vati vano, mbwenye mukale oosadduliwa odheela osadduliwa wa moobuwelelo eenyu wi odheela mooxixa munosuuza ofuna wa Mulugu oli opama, odhivela, waakwanela.

3Odheela mahala givahiwiimi ginowuwaaddelani kadda muthu a mwa nyo wi mwihiyiirege ookwaranya mwemo mukaleliinyu. Moohiyaniha, muubuwelege moofwanafwana ni ebaribari, mooligana ni wunnuwa wa nroromelo Mulugu nimvahiliiye kadda muthu a mwa nyo. 4Mmwiilini mweehu nihikalana yaano dhijinji, yaano nda dhinolaba moohiyana-hiyana. 5Emodha-modhave hiyo nnaroromela naari nigalive ajinji nili mwiili mmohive mwa Kirixtu, kadda muthu doomagelelana ni amohi. 6Nihikalana mvahi dhoohiyana-hiyana mooligana munivahele Mulugu mwa owoma murima waaye. Akalavo winna mvahi woovuwiha mutheenga wa Mulugu, avuwihege mooligana ni nroromelo naaye. 7Akalavo winna mvahi wowiimelela, eemelelege. Akalavo winna mvahi woosuuziha, asuuzihege. 8Akala mvahi woolibiha, alibihege. Akala mvahi woovaha, avahege ni madada oofeewa. Ole oli musogoleli, eeveleelege mmabasani aaye. Ole winna mvahi wowooniha thagaraga, oonihege moohagalala.

Dhoofuneya mwiigumini ya eKirixtu

9Odhivela okalege wa ebaribari. Mwiiddanege ni dhabure; mukubaarelege dhapama. 10Mudhivelanege mwa ebaribari wona addibila, mwiilibihedhe wi moonihege nriiho mmohi ni mukwaaye okwaranya we vaweeka. 11Mwiiveleelege moohugoma, mukalege oopaha mwa muneba, mmwiimelelege Nabwiya. 12Muhagalalege ni ojejihedha weenyu. Mvilelege vaari va orabula, mulobelege mudhidhi dhaatedhene. 13Mugawanege dhinniinyuna ni oweela mirima eli oorabula. Mwawiithanelege aleddo mmavade mweenyu.

14Mwaareelihege ayene enooharaharani; mwaareelihege, kamwaaddubege. 15Muhagalalege ni ale enahagalala, muunddege ni ale enaandda. 16Mwiiwananege pama teto kamwiithukulelege, mbwenye mwaandanege ni athu bure. Kamwiyiirege wona atthottho. 17Muthu owiirelani yootakala, kammuwelihedhe yootakala. Xixani wiirana dhedho athu aatene dhinooniiwa wi sapama. 18Mwiilibihedhege wi mukalege mmurenddeleni ni athu aatene, dhakala dhowaandeya. 19Oodhivela aaga, kamuwelihedhege yootakala, mbwenye mwihiye owali wa Mulugu olabe. Vowi dhihilebiwa wi: <<Nabwiya wiire: <Wuundda kunyawunya fwaaga, onadhe aawelihedhe di miyo> >>.#12.19 Deteronomiyo 32.35. 20Moohiyaniha, wona munawogela madhu a Mulugu: <<Akala mwiiddani aawo ohukalana dala, omvahe yooja. Akala ohukalana nthona, omvahe yoong'wa. Weera ndo, onamuugelela makala a munddo vamuru vaaye>>.#12.20 Poroveribiyo 25.21-22. 21Kamugonjihiwe ni dhootakala, mbwenye mugonjihe dhootakala vowiirana dhapama.

Currently Selected:

ARoma 12: tke

Highlight

Copy