ARoma 13

Mwawiiwelelege anamalamula

1Athu aatene yawiiwelelege apogo enalamulela elabo, mwaha wi kavili oolamula ohukumele wa Mulugu. Teto oolamula eliwo ekaraatihiwe ni Mulugu. 2Mowindo muthu onakoodda wawiiwelela oolamula, onakoodda nde Mulugu dhikaraatihiliiye. Ayene enakoodda enowaakela othongiwa. 3Anamalamula kinooviwa ni athu a meerelo apama, mbwenye enooviwa ni athu a meerelo ootakala. We onofuna wi ohumoovege oolamula? Wiiregena opama, ndo oneere otamaaleliwa. 4Vowi namalamula di mwiimeleli a Mulugu mwa opama waawo. Mbwenye akala onowiirana dhootakala woove, vowi ohukalana supaadda wi oorabulihena. Oliye di mwiimeleli a Mulugu, namaandda kunyawunya wi adhena owali wa Mulugu wa ale eneeranaave dhootakala. 5Mowindo mwawiiwelelege anamalamula, ohuli mwahave wa owali wa Mulugu, mbwenye teto mwaha wowiiwelela onamoona wa mmurimani.

6Mwahaya buuyene munaliveliinyu musoko, vowi anamalamula amwiimeleli a Mulugu wi ekamihedhege mulogo, yiimelelagave malabweene mabasa ala. 7Vano mpelekege wa aatene dhedho dhinafwaneelela: Akala musoko, mulive musoko; akala dhoosokela, musokele; akala oriiha, muriihege; akala othithimiha, muthithimihege.

Waadhivela amwaaddamani

8Kamukalegena mangawa ni athu, ehili mangawa oodhivelana ni athu aatene. Vowi onamudhivela mwaaddamani onoharihamo Malamulo a Mulugu maatene. 9Vowi Malamulo eneera: <<Kuraruwe, kupe, kawiiye, kukalele nrima>>, malamulo ala ni mamohi maatene enamorela munlamuloni ndda, nneera: <<Waadhivelege amwaaddamani wona muneedhiveliiwe wamwiinya>>.#13.9 Levitiku 19.18. 10Odhivela kunamwiirela mwaaddamani yootakala, mowindo odhivela fuwaakwaneliha wa Malamulo.

Nlabo na Nabwiya nihaaddamela

11Mwiirena dhaatedhene dhedho mwaha wi muhunona mudhidhi ola, ehifiya wora wi mvenyihiwe mukoveni. Vowi ovulumusiwa weehu oli vakukuuve okwaranya vambeeliihu ororomela. 12Mahiyu ehivira, osa ohaaddamela. Vano kabeni nihiye meerelo a muyiihini, nithukule yeela dhoowanana wi niwanena mowaara. 13Meeddelo eehu ekale oofwaneelela wona wa athu oweedda mutana. Nihiye mathanga abure, olezela, ojeberuwe, oraruwa, okangana, nihidda. 14Vano mmuware Nabwiya Yesu Kirixtu. Muhuubuwelelege ohagalaliha dhikwaminigwa dheenyu dhootakala.

Currently Selected:

ARoma 13: tke

Highlight

Copy