Isaaya 43
43
Essuubi ly'okuzza Isiraeri obuggya
1Naye kaakano bw'atyo bw'ayogera Mukama
eyakutonda, ggwe Yakobo,
era eyakubumba, ggwe Isiraeri,
nti, “Totya, kubanga nkununudde,
nakuyita erinnya lyo, oli wange.#Lub 32:28
2Bw'onooyitanga mu mazzi, nnaabeeranga naawe;
ne mu migga, tegirikusaanyawo;
bw'onootambulanga okuyita mu muliro, toosiriirenga;
so n'omuliro tegulyakira ku ggwe.#Zab 66:12, Dan 3:25,27
3Kubanga nze ndi Mukama Katonda wo,
Omutukuvu wa Isiraeri, omulokozi wo;
n'awaayo Misiri okuba ekinunulo kyo,
Kuusi ne Seba ku lulwo.#Is 45:14
4Kubanga wali wa muwendo mungi mu maaso gange,
era wa kitiibwa, nange nnakwagala;
kyendiva mpaayo abasajja ku lulwo
n'amawanga ku lw'obulamu bwo.
5Totya; kubanga nze ndi wamu naawe;
ndireeta ezzadde lyo okuliggya ebuvanjuba
ne nkukuŋŋaanya okuva ebugwanjuba;#Zab 107:3, Is 49:12, Yer 30:10,11
6ndigamba obukiikakkono nti, Waayo b'olina;
n'obukiikaddyo nti, Tobagaanira;
leeta batabani bange okuva ewala
ne bawala bange okuva ku nkomerero y'ensi;
7buli muntu eyatuumibwa erinnya lyange
era gwe nnatondera ekitiibwa kyange;
gwe nnabumba, gwe nnatonda.”
8Fulumya abo abalina amaaso naye nga bazibe,
abaggavu b'amatu abalina amatu.#Is 42:19
9Amawanga gonna gakuŋŋaanyizibwe wamu
n'abantu bajje;
ani ku bo ayinza okubuulira ekyo
n'atulaga ebyasooka okubaawo?
Leka baleete abajulizi baabwe okukakasa nti baali batuufu,
oba abawulira bagambe nti, “ Bya mazima.”#Is 41:1,21,22
10Mmwe muli bajulirwa bange, bw'ayogera Mukama,
n'omuweereza wange gwe nnalonda;
mulyoke mumanye munzikirize
mutegeere nga nze nzuuyo;
tewali Katonda eyabumbibwa okusooka nze,
so tewaliba alinziririra.#Is 41:4; 44:8
11Nze, nze mwene, nze Mukama;
so tewali mulokozi wabula nze.#Is 45:21, Kos 13:4
12Nze n'abuulira era n'alokola era n'alaga,
so tewabanga mu mmwe katonda mulala;
kye mubeeredde abajulirwa bange, bw'ayogera Mukama.
13Weewaawo, okuva mu nnaku ez'edda, Nze nzuuyo;
so tewali ayinza okuwonya omuntu mu mukono gwange;
Bwe nkola omulimu, ani okuguziyiza?#Zab 90:2, Is 14:27, Yok 8:58, Yob 9:12
14Bw'atyo bw'ayogera Mukama,
omununuzi wammwe, Omutukuvu wa Isiraeri,
nti Ku lwammwe n'atuma e Babbulooni,
era ndibaserengesa bonna ng'abadduse,
be Bakaludaaya, mu byombo eby'okusanyuka kwabwe.#Is 47:1
15Nze ndi Mukama, Omutukuvu wammwe,
Omutonzi wa Isiraeri, Kabaka wammwe.
16Bw'atyo bw'ayogera Mukama,
akuba oluguudo mu nnyanja
n'ekkubo mu mazzi ag'amaanyi;#Kuv 14:21,22, Zab 77:19, Is 51:10
17afulumya eggaali n'embalaasi,
eggye n'obuyinza;
bagalamira wamu, tebaligolokoka;
bazikiridde, bazikidde ng'enfuuzi;#Kuv 14:9, Zab 76:6
18nti Temujjukira ebyasooka okubaawo,
so temulowooza bigambo bya dda.#Yer 16:14
19Laba, nkola ekintu ekiggya;
kaakano kitandise okulabika, temukiraba?
ndikuba oluguudo ne mu lukoola,
ne ndeeta emigga mu ddungu.#Is 35:8; 41:18; 48:21, Kub 21:5
20Ensolo ez'omu nsiko zirinzisaamu ekitiibwa,
ebibe ne bamaaya;
kubanga ngaba amazzi mu lukoola
n'emigga mu ddungu,
okunywesa abantu bange, abalonde bange;#Is 49:10
21abantu be nneebumbira nzekka
boolesenga ettendo lyange.#Zab 79:13, 1 Peet 2:9
22Naye tonkaabiranga, ggwe Yakobo;
naye wantamwa, ggwe Isiraeri.
23Tondeetedde ndiga ez'ebiweebwayo ebyokebwa;
so tonzisaamu kitiibwa na ssaddaaka zo.
Sikukaluubirizanga nga nkusaba ebiweebwayo,
wadde okukukooya n'obubaane.#Am 5:25, Mi 6:3
24Tonguliranga mmuli mpoomerevu na ffeeza,
so tonzikusanga na masavu ga ssaddaaka zo;
naye ggwe onkoyesezza n'ebibi byo,
n'onteganya n'obutali butuukirivu bwo.#Yer 6:20
25Nze, nze mwene, nze nzuuyo
asangula ebyonoono byo ku lwange nze;
so sirijjukira bibi byo.#Is 44:22, Ez 36:25,26
26Njijukiza; tuwoze ffembi;
leeta ensonga yo olyoke oweebwe obutuukirivu.#Is 1:18
27Kitaawo eyasooka yayonoona
n'abawolereza bo bansobya.#Yer 5:31, Ez 16:3
28Kyendiva nswaza abakulu ab'omu watukuvu,
era ndiwaayo Yakobo okuzikirizibwa ne Isiraeri okuswazibwa.#Yer 24:9, Kung 2:2
Currently Selected:
Isaaya 43: LBR
Highlight
Copy
Compare
Share
Want to have your highlights saved across all your devices? Sign up or sign in
All rights are reserved to the Bible Society of Uganda.
