Romans 15
15
Iviġakkich Allat Iliŋnułhiñaŋiḷaaq
1Tavra uvagut suaŋaruaguut ukpiġutiptiŋni, qiñuiġḷuta ikayugaksraġigivut tamatkua suaŋaitchuat ukpiġunmiŋni, iviġagniaqsiññaŋaiġḷuta uvaptiŋnun. 2Atausiullaaluta iluqata iviġagniaġlavut siḷallivut anniqsuqsaġlugich, suaŋasiyumaut ukpiġunmiŋni. 3#Ps 69.9.Qanuq Christ inmiñun iviġagniaqsiññaŋaitchuq. Aglausimaruq Bible-ni inna, “Iñuich uqamaqłuktaqtuat ilipkun, Aapaaŋ, uqamaqłuktaġvigiŋagaanŋa uvaŋałhaaq.” 4Iluqaġmiŋ aglausimaruat Bible-ni iŋiḷġaan, aglaagurut iḷisautisaqłuta qiñuirrunmik qapiŋaisaaqłutalu, niġiuquvluta iñuggunmik isuitchuamik. 5God-im qiñuisitkaatigut quviasaaqłutalu. Aasii ilaan iñuupkaġlisi aŋuyautaiḷḷusi avanmun, nalaupiaġlugu Christ iñuutqutaa ilivsiññun. 6Tainna iñuuguvsi, iluqasi atautchisun iñuktun nanġaġumiñaġniaġiksi God, Aapaŋa Atanipta Jesus Christ.
Tusaayugaaġiksuat Alġaqsruutaurut Jew-guŋitchuanun
7Taamna pisigilugu, paġlatisitchi avanmun, tainnatuttauq Christ paġlaŋagaasi, God nanġausiaqaquvlugu. 8Itqaumasiuŋ Christ kivgaliutiŋaruq Jew-guruanun, salapqiġukługu God-im ukpiġnaqtilaaŋa, suli taŋŋiqsaqługich unniqsuqłiisit God-im unniqsuqłiisigiŋakkaŋich maŋŋuŋiññun, 9#2 S 22.50; Ps 18.49.suli Jew-guŋitchuanun nanġaquvlugu God nagliktuutaagun. Taamna aglausimaruq Bible-ni inna,
“Nanġaġniaġikpiñ akunġanni Jew-guŋitchuat,
atuġluŋalu nanġautinik iliŋnun.”
10 #
Dt 32.43. Aglausimammiuq inna Bible-ni,
“Ilivsi Jew-guŋitchuasii, quviasuqatigisigik iñuŋi God-im.”
11 #
Ps 117.1. Suli aglausimammiuq,
“Nanġaqsiuŋ Ataniq, iluqasi Jew-guŋitchuasii.
Suli iñupayaurat nanġaġlirruŋ Ataniq.”
12 #
Is 11.10. Aglautiŋammigaa suli Isaiah-m inna,
“Maŋŋuqaqtuaq Jesse-mik qaiñiaqtuq.
Suaŋŋatinigniaqtuq aasii atanniqsimalugich Jew-guŋitchuat.
Ilaa pisigilugu Jew-guŋitchuat niġiuktuaguniaqtut.”
13Taavrumatuq niġiuksruiruam God-im, quviasuutiqpaqaqtillisi tutqiutiqpaqaqtillusiḷu ukpiqsimaaġnivsiññi. Tavraasii qapiŋasiñiaŋitchusi niġiuktuallavsi, qapiŋaisaaqtiqaqłusi Ilitqusiġiksuamik iḷuvsiññiittuamik.
Paul Taluqsraŋirrutaa Tuyuqami
14Uvaŋa nalupqigiŋitkiga ilivsi iluqasi iñuuniaġluataqtilaaqsi iḷisimatilaaqsiḷu tamatkuniŋa sunik tuyuutimni uqautigikkamnik, iḷisaurriyumiñaqsivḷusiḷu allanik. 15Aglaaġiŋagitka taluqsraiqł̣uŋa tamatkua itqaumayumiñaqsisaqługich ilivsiññun, qanuq God nagliktuutiqpaqaqłuni uvamnun, 16alġaqsruiriġuŋagaaŋa quliaqtuaġitquvlugich tusaayugaaġiksuat Christ Jesus-kun Jew-guŋitchuanun. Aŋaiyyuliqsiqpaktun aitchuiruatun aitchuutinik God-mun tupiġmi aŋaiyyuviŋmi, tainnatun God-mun savaktauvluŋa aitchuimmiuŋa God-mun tamatkuniŋa Jew-guŋitchuanik, akuqtuiruanik ilaan tusaayugaaġiksuaŋiñik. Aasii iliŋich akuqtuġnaġumiñaqsiŋarut ilaanun, qanuq ilaaguaŋagai ilaanun Ilitqusiġiksuaŋata. 17Savaqatauniqama Christ-mun, uqaqpagaaġutigiyumiñaġiga savaurriñiġa God-mik. 18Qanuq uqavigaaġutigisuŋitkiga sunapayaaq uvaŋa savaaġiraġa, aglaan suna Christ-gum savaaġiŋaraŋa uvapkuaqługu, Jew-guŋitchuat ukpiqtillasivḷugich. Taamna piŋagaa alġaqsruiñipkun iñuulluataġnipkullu 19aliuġnaqtuatigullu ukpiġnaqsiḷiqługu tusaayugaaġiksuaq, suaŋŋataagullu Ilitqusiġiksuam. Alġaqsruiŋaruŋa tusaayugaaġiksuamik Christ-kun sumiḷiqaa Jerusalem-miñ Illyricum-munaglaan. 20Alġaqsruiñiapiaġataqtuŋa tusaayugaaġiksuamik iñuŋnun quliaqtuaġurriqaŋaitchuanun Christ-mik. Alġaqsruisuŋitchuŋa allat iñuich alġaqsruivigiŋakkaŋannun qaŋapak. 21#Is 52.15.Ikayuutausuktuŋa taŋŋiġñiksraŋannun aglausimaruat Bible-ni inna,
“Tamatkua iñuich qaŋaunnii quliaqtuaġurriqaŋaitchuat,
quliaqtuaġurrauniaqtut, suli iñuich qaŋaunnii tusaaŋaitchuat ilaanik,
iḷitchuġiniaqtut ilaanik.”
Paul Rome-mugumaalliqsuq
22 #
Ro 1.13. Tavra taamna pisigivlugu qaiñaiḷutaġa ilivsiññun. 23Aasii paŋmapak alġaqsruiviksraiġutikama makkunani nunaaqqiñi, suli iñugiaktuani ukiuni ullakkumaalġataŋagaluaqavsi, 24tautugumalaaġivsi nalaullusi Spain-muksaġuma. Ikayuquyumaruŋa ilivsiññun iglauniksramni takuruutillaqqaaġluta sivikitchuami. 25#1 Co 16.1-4.Paŋmapak-aglaan uvva, Jerusalem-muŋniaqtuŋa manniraġluŋa ikayuutiksranik ukpiqtuanun. 26Qanuq ukpiqtuat Macedonia-mi Greece-miḷu nagliktuutiqaŋarut iḷiappauruanun ukpiqtuanun Jerusalem-miittuanun, aitchuivḷutiŋ ikayuġukługich. 27#1 Co 9.11.Iviġaumagiŋagaat tainna pigumiŋ. Suli piyummatigiłhaaŋagaat akiiḷaqtuqtuaguvlutiŋ iliŋiññun, qanuq Jew-guŋitchuat aitchuusiaqaŋavlutiŋ annaunmik Jew-guruatigun, Jew-guŋitchuat ikayugaksraġigaich Jew-guruat tuyuġlugich maniŋñik. 28Tavraasii taamna pianikkupku, qaisanikkupkich maniich iliŋiññun, Spain-mun iglausaġniaqtuŋa nalaullusi. 29Iḷisimaruŋa ullakkuvsi anniqsuusiaqaġniaqtusi, qanuq ukpiġurri Christ-mun suaŋasiḷaaqtauniaqtuq.
30Aniqatiit, atausiŋŋuqatauŋarusi Christ-mun, suli Ilitqusiġiksuam piviuttaqqutipkaġaasi avanmun. Taamna tainnainman, apiġipiaġataġivsi aŋaiyyutipiaġataquvluŋa God-mun, 31annaurrautquluŋa ukpiŋaitchuaniñ Judea-mittuaniñ, taapkualu aitchuutit ukpiqtuanun Jerusalem-mi akuqtuqulugich. 32Tavraasii ullagniaġivsi quviasugluŋa, Atanġum pisuutigikpagu, aasii qapiŋaisaaġusiaqaġluŋa ilivsiññiñ. 33God-im aitchuiruam tutqiunmik itqatigilisi iluqasi ataramik. Amen.
Currently Selected:
Romans 15: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
