Romans 14
14
Isivġiġñagu Aniqatin
1 #
Col 2.16. Kiñaliqaa suaŋaitkaluaŋŋaan ukpiġutaa, paġlasiuŋ aŋaiyyuliqiruat kasimaniŋannun. Uqavaaqatigisuŋaġnagich sunik ukpiġiraqaġniŋat. 2Iñuich iḷaŋich ukpiqtut niġiḷḷanivḷutiŋ qanusiḷimaanik niqipianik. Allattauq iñuich suaŋaitchuat ukpiġunmiŋni isumaqaqtut God-mun akuqtuġniaġnivḷutiŋ pisigilugich niqigikkatiŋ ukpiġunmiktuttauq, naurianik aasii kisianik niqiqaqłutiŋ. 3Iñuich niġiḷḷaruat qanusiḷimaanik niqinik isummatiginatiŋ nalaułhamaaġasugalutiŋ nauriałhiñanik niqiqaqtuaniñ. Aasiivsauq iñuich nauriałhiñanik niqiqaġumiŋ, uqallausiġinagich qanusipayaanik niġiḷḷaruat killuliqiniḷugich, qanuq God-im akuqtuŋammigai. 4Kiñaliqaa nalaunŋaruamik uqallakkumiñaitchuq iñuum allam kivgaŋa killuliqinigumiuŋ. Ilaan nanmiñiq atanġata nalaunŋarualiñiaġaa naagga killuliqirualiñiaġaa. Isivġiqsiqaġniaqtuq Ataniġmik nalaunŋarualiḷugu, qanuq God-im ikayuġniaġaa nalaunŋarualiqiyumiñaqsiḷugu.
5Iñuich iḷaŋich isumaqaqtut uvlut nalunaiqsaŋich Jew-guruat, aŋaiyyuniksrauvlugich nakuułhaaġnivḷugich allaniñ uvluniñ. Allalli isumaqaqtut uvlupayaurat atinivḷugich aŋaiyyuvigiruni Ataniq. Iñupayaaq piḷi, nalupqisuŋaiġḷuni nalaunŋarualiqitilaamiñik. 6Iñuich aŋaiyyuruat Ataniġmun nalunaiqsauruani uvluni, aŋaiyyurut nanġaġukługu Ataniq. Iñuich niġiḷḷaruat qanusipayaanik niqinik, niġirut iviġagniaqługu Ataniq, qanuq quyyavigigaat God niqitiŋ quyyatigivlugich. Aasiivsauq iñuich niqiqaqtuat naurianik kisiŋiññik, niġimmiut iviġagniaqługu Ataniq, qanuq iliŋisa quyyavigimmigaat God niqimikkun. 7Iñuuruksrauŋitchugut iviġagniaqsiññaġluta uvaptiŋnun, suli tuquyumiñaiñmiugut isumapianiaptiktun. 8Iñuuŋŋapta iñuurugut iviġagukługu Ataniq, suli tuqugaluaġmigupta, tuquniaġmiugut ilaan pisuutaagun. Tavraasii iñuugaluaġupta naagga tuqugaluaġupta, Atanġum pigigaatigut. 9Taamna pisigivlugu Christ tuquŋaruq suli aŋivḷuni tuqqunmiñ, ilaa Ataniġitquvluni uvaptiŋnun iñuuŋŋapta tuquguptalu. 10#2 Co 5.10.Uqalliaruksrauŋitchusi aniqatisi killukuaġniḷugich, aasiiḷivsauq ilivsi uqalliaruksrauŋiñmiusi nalaułhaaġniḷusi aniqatiivsiññiñ. Iluqata makittuksrauniaqtugut God-im isivġiivianun iñuŋnik. 11#Is 45.23.Sivuniġivlugu taamna aglausimaruq Bible-ni inna,
“Nalupqinaisilaaŋatun iñuutilaaġma,
uqallaktuq Ataniq, iñupayaat punniaqtut sivuqqamnun,
aasii iñupayaat nanġaġniaġaanŋa God-auniḷuŋa.”
12Tavra iluqapayaurapta uqaġviginiaġikput God qanuq piŋatilaaptiŋnik iñuuŋŋapta.
Piḷuksipkaġnagu Aniqatin
13Tamatkua tainnainniġmata, tavraŋŋaaglaan aniqatiivut uqausiġiŋaiġḷavut killukuaqtaġniḷugich, aglaan qaunagiłhaaqta agvisausuŋiḷḷuta aniqatipta piḷuksiñiksraŋanun. 14Iḷisimaruŋa ukpiġunmalu Ataniġmun Jesus-mun nalupqisuktinŋitkaaŋa, sumik piisilaaŋanik killuliqutauyumiñaqtuamik niġiruni niqipiamik. Aglaan iñuk isumagumi killuliqiniaġasugaluni niġiruksrauŋitchuq, qanuq killukuaġutauniaqtuq ilaanun. 15Niġiñiġuvich aniqarvich isummatigikkaŋanik niġiraksrauŋiññivḷugu aasii isumanŋutchakługu, piviuttaġiŋaiġñiġiñ aniqatin. Suksraunġiġñagu aniqatin Christ tuqqutiŋakkaŋa niġiḷutin isummatigikkaŋanik pigiitchuaguvlugu. 16Suna piññagu iłuigutchautiginiakkaŋa aniqarvich, iḷisimaluġiñ unnii nalaunŋatilaaŋanik ilivich pigupku. 17Qanuq naumaniqsraq ukpiqtuat aŋalatittuat God-mun, piraksraŋat niġikkaptiguaŋitchuq imikkaptigullu, aglaan iñuuluni nalaunŋaruakun, pigilugu aŋuyautairrun, quviasuullu Ilitqusiġiksuakun. 18Iñuk savaurriruaq Christ-mik iñuuvluni tainna, God-im iviġaumagigaa, iñuiḷḷu iviġaumagimmigaat.
19Tavraasii pisa supayaamik aŋuyautaiññaqtuamik sivunmuktuutauyumiñaqtuamiglu ukpiġunmun. 20Pisigigiññaġlugu niġiḷḷaniq qanusipayaamik niqimik, maqunnagu God-im savaaŋa. Killuliqutauŋiḷḷuqtuq unnii niġiñiq qanusipayaanik niqinik, killuliqutauruq allat piḷuksipkaġuvsigik niġikkavsigun. 21Killukuaŋaruq niqipiaqtuqtuni taaŋŋiqiruniḷu suli supayaakkaluamik piuni piḷuksipkautauyumiñaqtuamik aniqatinun. 22Qanusipayaamik ukpiġutiqaġuvich niġiñikun niqipianik, nalupqinaigilugu piyumautin iviġaktilaaŋanik God, uqavaaġutigiŋaiġḷugu avanmun. Quviasugli iñuk iłuigutchaŋitchuaq inmiñik sukun pikkaġmigun. 23Aglaan iñuk niġiruaq niqipiamik isummatigillaan killukuaġutaunivḷugu, piḷuksiruq, qanuq iñuuŋitchuq tuvraġlugu ukpiġikkani. Qanuq sunapayaaq piguptigu ukpiġikkaqput nalautkaluaġnagu piḷuutauruq.
Currently Selected:
Romans 14: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
