Romans 13
13
Kamaksriñiq Ataniġnaqutiqaqtuanik
1Iñupayaaq kamakkutiqaġli ataniġnaqutiqaqtuanun. Qanuq kiñaliqaa ataniġnaqutiqaġumiñaitchuq God-im aitchuŋisuaqpani. Iluqatiŋ ataniġnaqutit ittuat God-im inillaŋagai. 2Taamna pisigivlugu iñuk akiḷḷiḷiqsuiruaq ataniġnaqusiraqtuanik, akiḷḷiḷiqsuġai God-im inillaktaŋi, aasii iñuich akiḷḷiḷiqsuutiruat tatavsaqtauniaqtut. 3Qanuq kiñaliqaa iñuuruaq nalaunŋaruakun sivuuqqataitchuq ataniġnaqusiraqtuanik, aglaan kisimiŋ tamatkua iñuumaqłuktuat. Sivuuġagisuŋitkuvsiuŋ ataniġnaqusiraqtuaq, iñuulluataġitchi aasii ilaata iviġaumaginiaġaasi. 4Qanuq God-im kivgaġigaa anniqsuqsaqłusi. Killuliqiguvsi, sivuuqqatiqaġitchi, qanuq suaŋŋatiqaqtuq tatavsaiyumiñaqłuni. Ilaa kivgauruq God-mun, tatavsaiyumiñaqłuni pisigilugu God killuliqirauruanun. 5Tavraasii iluqasi kamaksriruksraupiaqtusi tatavsaqtauŋitchumausi, taamnatualuuŋiñmiuq, iḷisimarusi ilivsiññi nalaunŋatilaaŋanik kamaksriruni. 6#Mt 22.21; Mk 12.17; Lk 20.25.Taamna suli pisigilugu, akiḷiiruksraupiaqtusi taxes-nik kavammanun. Akiḷiusiqirit God-im kivgaġigai aasii savaaqtiŋ pigiññaġaat. 7Akiḷiisitchi iluqaiññun ataniġnaqusiraqtuanun qanutupayaaq piqaqtuksraukpata. Akiḷiisitchi akiḷiutinik kavammanun suli akiḷiġḷugich tax-iutit tauqsiqavsi suġauttanik. Qiksigilugich tamatkua qiksigiraksrauruat, suli isummatigilluataġlugich isummatigilluatagaksrauruat.
Nalaunŋaruakun Iñuuniaġniq Avanmun
8Akiiḷaġnagu kiñapayaaq supayauramik. Piviuttaqqutisitchi avanmun, qanuq iñuk piviuttaqsriruaq siḷallimiñik, kamaksripiallaktuq pitquranik. 9#Ex 20.14; Dt 5.18; Ex 20.13; Dt 5.17; Ex 20.15; Dt 5.19; Ex 20.17; Dt 5.21; Lv 19.18.Qanuq pitqurat qaisauruat Moses-kun piraksriġaatigut inna. “Allatuġnak, Iñuaġnak, Tiglignak, Kaviuġnak,” suli allallu pitqurat. Taapkua iluqaisa tapusimagai uuma pitquram, “Piviuttaġiuŋ siḷalliñ iliktun iḷiḷugu.” 10Piviuttaġikapku siḷalliñ, pigiitchuamik piḷaitkiñ, tavra piviuttaqsriruam kamagipiallakkai pitqurat.
11Aasiisuli annaurrauniksraq, Christ qiḷaŋmuutikpatigut, qallił̣haaqtuq paŋmapak ukpiqtuaġuqqaaġniptiŋniñ. Tavra iñuuruksraurusi nalaunŋaruakun, pisigilugu Christ qaiyasiñiŋa. Taamna ittuq itiġviksrakun itiqtuatun siñigniġmiñ. 12Unnuaq pilluaqsiruatun ittuq, qausaġatauraqtuatun. Taamna pisigilugu, aġiulavut piḷuusiqutauruat piraġautchich, piraġautchisun ittuat taaqsimman, aasii piḷugu nalaunŋaruaq, uvlumi piraġausisun. Irrusiqaġitchi aŋuyaktitun itqanaitchuatun aŋuyautigiyumavlugu nalaunŋaruaq. 13Iñuulluataqta iñupayaanun tautukkumiñaqsiḷugu sunapayaaq pikkaqput nakuutilaaŋanik. Imiŋasiŋaiġḷuta piallaŋaiġḷutalu, allatuqtauŋaiġḷuta pitquraiḷaŋaiġḷutalu, qanaaġutiŋaiġḷuta killuqsraŋaiġḷutalu. 14Aglaan iñuusitchi tuvrapiaġlugu iñuusiġitqukkaŋa Atanġum Jesus Christ. Sivunniuġnasi pisuiqsitchuglugich pigiitchuat pisuguutisi.
Currently Selected:
Romans 13: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
