2 Corinthians 6
6
1Uvagut savaqatigiigñiqapta God-lu, apiġipiaġivsi anniqsuusiaqaquvlusi God-im nagliktuutiqpaŋagun. 2#Is 49.8.Qanuq Bible-ni God uqallaŋaruq,
“Piviksraq nalautinman, iviġaumagiŋagiga naalaġniñiksraġa ilivsiññik.
Uvaŋa ikayuŋagivsi annaurrauniksraqsi tikiñman.”
Uvva paŋmapak God-im akuqtuiviksraŋa uvaptiŋnik nalautittuq. Uvva paŋmapak annaurrauniksraq nalautittuq.
3Iñuuniḷuktugut atausiq unnii iñuk ukpiqsaiḷisuŋił̣ł̣ugu Ataniġmun, naġġunaqtuaq paqitquyumaŋił̣ł̣ugu alġaqsruiñiptigun. 4Uvagut kivgauniḷuktugut God-mun akuqtuġnaġukłuta supayaakun, manimmiḷgutikun, iłuiḷḷiuġutikkaluakullu siġḷiġniuġutitigullu navianniuġutitigullu, 5#Ac 16.23.ipiġaqtuqsiġñikullu tigutaaqtaunikullu sanmiraiñikullu qinnakłutiŋ tatiruanik, siġġaqutikullu siñiksraiḷḷiuġnikullu unnuani quviqtaiḷivḷuni kaaksiuniġmiḷu. 6Uvagut suli iñuuniḷuktugut piḷuksitchaiḷivḷuta, iḷisimalluataġumavlugich God-im iḷumun ittuaŋi, qiñuił̣ł̣uta, piaqłuktaiŋił̣ł̣uta, iñuuvluta Ilitqusiġiksuam suaŋŋataagun, piviuttaġipiaqługich iñuich, 7uqaqłuta iḷumutun, iñuuvluta God-im suaŋŋataagun, nalaunŋasipkaqtauŋavluta sivuġaani God-im naamaruanik satkuliqsaurugut aŋuyautigiyumiñaqługu nalaunŋaruaq. 8Piḷḷuataqtuagurugut suli Ataniġmun, iñuich isummatigilluataġaluaqpatigut, naagga isummatigigaluaqpatigut suuŋiḷauniḷuta, iñuich nanġaġaluaqpatigut naagga pasigaluaqpatigut. Piŋŋuaqtualigaluaġaatigut aasii uvagut pitqiksiġaŋitchugut. 9Iñuich unnii naluruatun uvaptiŋnik iḷiuqłuta, naagga uvva iḷisimanaġluataġaluaġmiugut, tuquaqsiruatun iḷiuqtauvluta, uvvauvagut iñuummiugut, tatavsaqtauruatun naagga tuqutaulaiñmiugut. 10Isummatigiraummiugut isumaaqtualivḷuta, naaggauvva ataramik quviasuktugut, iḷiappaurualivḷuta, naagga uvva aitchuiyugaqtugut iñugiaktuanik quviasaaġusianik allanun, suġauttaitkaluaġmiugut, naaggauvva piqaqtugut iluqaiññik qiḷaŋmiŋŋaqtauruanik quviasaaġusianik.
11Iḷauraatkaa Corinth-mi, nunummisiŋitkivsi uqallautiksraptiŋnik ilivsiññun. Saġiagigivsi piviuttaġivlusiḷu. 12Iḷauraaġiigutilluatamik piqaŋiññiġupta avanmun, uvaŋa iḷammiuġutiga ilivsiññun patchisauŋitchuq ilivsi, aglaan iḷammiuġurri patchisauyumiñaqtuq. 13Piviuttaġisiŋa uvaŋa piviuttaqsrisiptun ilivsiññik. Uqautigivsi uvaŋa nanmiñiq miqłiqtuġiruatun iḷivḷusi.
Kiliktuusiat Ukpiġutaiññikun
14Piqasiqsuġnagich ukpiŋaitchuat piraġausiŋiññi, qanuq tamatkua nalaunŋaruat iñuich piruksrauŋitchut sunik piḷuusiqirauruat pisuukkaŋiññik, qaummauptauq piqatigiyumiñaiñmagu atautchikun taaqtuaq. 15Christ-gum atisiqatigiyumiñaqpauŋ Belial tuunġaq? Naumi. Tainnatuttauq ukpiqtuaguruaq sumik piqasiqsuutiviksramiñik piiñmiuq ukpiŋaitchuamun. 16#1 Co 3.16; 6.19; Lv 26.12; Ez 37.27.Taapkunatuttauq God-im aŋaiyyuvikpaŋa imaqaġumiñaiñmiuq iñuuraqpaŋmik. Uvagut ukpiqtuaguruaguut God-im aŋaiyyuvikpaŋatun ittugut, qanuq ilaa iñuuruq iḷuptiŋni, Bible-ni uqallausiġmisun inna,
“Uvaŋa iñuuniaqtuŋa iḷuŋiññi,
suli kukiḷugluŋa akunġanni.
Uvaŋa God-iginiaġaanŋa
aasiiḷi iliŋich uvaŋa iñugilugich.
17 #
Is 52.11. Taamna pisigilugu, piqasiqsuġnagich ukpiŋaitchuat piraġausiŋiññi.
Avinŋasitchi iliŋiññiñ.
Uvaŋa Ataniq piraksriġivsi.
Piqqayaanagich pigiitchuat piraġausiŋich,
aasii iviġaumaniaqtuŋa akuqtuġlusi.
18 #
2 S 7.14; 1 Ch 17.13; Is 43.6; Jr 31.9. Suli Aapauluŋa ilivsiññun,
ilivsiḷiasii uvaŋa iġñiġilusi panigilusiḷu,
uvaŋa uqallaktuŋa Ataniq sapiġñaġniqsrauruaq.”
Currently Selected:
2 Corinthians 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
