2 Corinthians 5
5
1Qanuq iḷisimarugut tupqich iñuuvigikkavut nunami maqutaugaluaqpata, timivut, igluqpaqaqtugut qiḷaŋmi maqutauyumiñaitchuanik, God-im savaaŋiñik, iñuich savaaġiŋisaŋiññik. 2Uumani paŋmapak timigikkaptiŋni iiqtualiġuurugut, piḷaiġuuvluta, piyummipiaġataġaqtugut allaŋŋuqtautquyumavlugich timit qiḷaŋmiŋŋaqtauruaġuġlugich, 3qanuq ilitqusił̣hiñauyumaaŋitchugut timaiḷḷuta. 4Iñuuŋŋapta makkunani tupiġni, iñugruiññauvluta timiptiŋni, iiqtuaġuurugut iłuiḷḷiuġutiqaqłuta. Mattaġumałhaaŋitkaluaġivut makua tuqullaruat timivut, aglaan atiyumałhaaqługich nutauruat timiksravut, tuqqun simmiḷiġumauq iñuggunmik. 5Taavrumuŋauvva God-im itqanaiyaġaatigut, suli ilaan aitchuŋagaatigut Ilitqusiġiksuamiñik, uvaptiŋnun nalupqigitquŋił̣ł̣ugu.
6Tavraasii ataramik qapiŋaisaaġusiaqaġluataġuurugut. Iḷisimarugut iñuuŋŋapta makkunani iñugruiññauruani timini, niguqsimarugut Ataniġmiñ, 7iñuuvluta ukpiġutikun, ilaa tautuaġiŋił̣ł̣ugu. 8Qapiŋaisaaġusiaqaġluataqtugut, aasii timigikaptiŋniñ piitchumałhaaġaluaqtugut aimaaġukkaluaqłuta piqatigilugu Ataniq. 9Tavraasii, aimaaġaluaġupta piqatigilugu Ataniq, naagga piitkaluaġupta ilaaniñ, ataramik iviġaumaniḷupiaġikput. 10#Ro 14.10.Qanuq iluqata niptaqtuksraupiaqtugut sivuġaanun Christ aasii isivġiqsauluta, atausiullaaluta, akiḷiusiaqaġumaugut sutigun piŋaraptigun iñuuŋŋapta timigikkaptiŋni nunami, nakuuruatigun naagga pigiitchuatigun.
Christ Avilaitqasiuġaatigut God-mun
11Taamna tainnainman, puttuqsrivḷuta Atanġum qiksigiraksrautilaaŋanik, uvagut ukpiqusaaġivut iñuich. God iḷisimaruq ukpiġnaqtilaaptiŋnik alġaqsruiñiptiŋni, aasiivsauq puttuqsritquyumagiga taamna ilivsiññun. 12Uvagut akuqtuġnaqsiñiavsaaŋitchugut uvaptiŋnik ilivsiññun, aglaan kanŋugiyumiñaiqsinniḷuksiññaqtugut, ilivsi kiggutiksraqaquvlusi iñuŋnun kamasaaġutiqaqtuanun iñuich qiññaŋannik, puttuqsrisuŋaġnagu qanupiaq itilaaŋat iḷumiŋni. 13Kinnaġuqpisa uvagut? Tainna iñuich iḷaŋisa uqautigigaatigut. Kinnaġuġniġupta, taamna nanġautauruq God-mun. Qaurimmaġiiġñiġupta, anniqsuusiaqautiginiaġiksi. 14Iluqaisa savaavut pigivut, pisigivlugu Christ piviuttaqqutiqpaŋa uvaptiŋnun. Nalupqigiŋaiŋagikput Christ tuqqurriŋatilaaŋa iñupayaanik, tavraasii iluqaġmiŋ tuquŋarut. 15Iḷiŋavluta tuquqatigiŋaruatun Christ, uvagut tavraŋŋaaglaan uvaptiŋnułhiñaq iñuuŋaiqsuksraurugut aglaan pisilugu Christ tuquŋaruaq aasii aŋipkaqtauvluni pisigivluta.
16Tavra paŋmapaŋmiñ aglaan, isummatigiŋaiġikput kiñaliqaa qaałhiñamigun qiññaŋaniñ. Qaŋauvlugu isummatigisuuŋagaluaġuptigu Christ iñugruiññatun iḷivḷugu, tainna isummatigillaiŋagikput. 17Tavraasii, kiñaliqaa atausiŋŋuqataukami Christ-mun, nutaaġuqtauruq. Taimanisun inŋaiqsuq tavraŋŋaaglaan, qanuq sivulliich piḷġusikaaŋi piiqsut, aasii ilaa nutaaġuqtauvluni suraġaġnipayaamiñi. 18Iluqaġmi taamna nutaaġuqtauniq qairuq God-miñ, iḷauraaliuqtuamiñ uvaptiŋnik inmiñun Christ-kun, aasii aitchuqłuta savaamik alġaqsruutigitquvlugu ilaan iḷauraaliullatilaani iñuŋnik. 19Sivuniġigiga Christ tuqqutaagun, God-im iḷauraaliuŋagai nunam iñuŋi, pasiŋaiqł̣ugich piḷuutiŋisigun. Aasii ilaan piksraqtaaġiŋagaatigut alġaqsruutigitquvlugu uqaluksrirrutini iḷauraaliuġnikun God-mik. 20Tavra uvagut Christ kivgaġigaatigut, aasii God-im atuġaatigut uqautitquvlusi. Apiġipiaġivsi, Christ arakłipiaġataġmatun ilivsiññik, iḷauraaliutisitchi God-mun. 21God-im Christ piḷuutaiñŋaruaq atausiŋŋuqatigipkaŋagaa piḷuunmun, uvagut atausiŋŋuqatauŋaruaguut Christ-mun, atausiŋŋuqatigiŋagikput God-im nalaunŋataa.
Currently Selected:
2 Corinthians 5: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
