2 Corinthians 7
7
1Piginiqaptigik taapkua unniqsuqłiisit, piviuttaġirauruasii, salummaqta uvaptiŋnik piḷuutipayaaniñ timiptiŋnullu ilitqutchiptiŋnullu salumaiḷḷisauruaniñ sivuġaani God-im. Iñuuniḷukta kiikaa piḷuutaiññiaġluta, qanuq qiksigigikput God.
Paul Quviasuktuq
2Saġiagisigut piviuttaġilutalu. Pimaqłuiŋaitchugut iñuŋmik. Asiñuurriŋaitchugut iñuŋmik. Ivayaġniŋaitchugut iñuŋmik. 3Taamna uqallausiġiŋitkiga suaksaġlusi naagga pasiḷusi. Uqallautiŋagivsi sivuani piviuttaġivaił̣ł̣usi atausiŋŋuqatigiŋanivḷusi iñuuqatigiikkaluaġupta naagga tuquqatigiikkaluaġupta. 4Ukpiġiqpakkivsi, suuramikunnii kanŋugiŋitkivsi. Qapiŋaisaaġutauqpaktusi uvamnun, quviatchaktitpakłuŋa iłuiḷḷiuġnimni.
5 #
2 Co 2.13. Tikitkaluaqaptaunnii Macedonia-mun, piḷaiŋiaqsiaġviitchugut, iłuiḷḷiuqtitaukaptaaglaan qanusipayaakun, nagliksaaqtitaunikun ukpinaitchuaniñ, isumaaluutiptalu ukpiqtuanun. 6Aglaan God-im, qapiŋaisaaqłiisuuruam tamatkuniŋa nikatchaktitauruanik, qapiŋaisaaŋagaatigut Titus qaipkaqługu uvaptiŋnun. 7Qapiŋaisaaġusiaqaŋiñmiugut qaiñiŋanik kisianik, aglaallu pisigivlugu ilaan qapiŋaisaaġusiaŋa ilivsiññiñ, ilaan quliaqtuaġutivluta ilivsiññun kipiġniuttaġinivḷuŋa tautugukłuŋa, isumaaluutivsigullu sutigun piruatigun ilivsiññi, suli kipiġniuġutivsiññik iviġagukłuŋa, quviatchavsaapiksuaŋaruŋa tamatkua tusaayugaaġikapkich. 8Isumaaġutigiŋaiġiga tuyuŋaniġa ilivsiññun, nunuurallakkaluaŋaruŋa iḷitchuġiqqaaqama qanutun isumaatchautiginiqavsigik tuyuutitka. Aglaan isumaaqtitkaasi sivikitchuamik. 9Tavraasii quviasuktuŋa, pisigisuŋaġnagu isumaatchaktitauniqsi, aglaan isumaatchautiginiqavsigik piḷuutisi aasii isumalitqikł̣usi. Tainnatchim isumaaġutim qaġġisillammasi God-mun, anniŋitkivsi. 10God-im iñuk isumaaliqsinmagu piḷuutit pisigivlugich, aasii isumalitqikł̣uni iñuum nunuuraġilaitkaa taamna qanuq qaġġirigisuugaa ilaan annaunmun. Aglaalli ukpiŋaitchuam isumaaġutaa tuqqutauruq. 11Ilivsiññik iḷitchuġiŋarusi qanutun anniqsuusiaqaġnaqtilaaŋanik isumaaġunmiñ God-im pipkaġmagu. Qanutupayauraq isumalitqiŋarusi. Qanutun piyummatiniŋarusi patchisausuŋił̣ł̣usi. Qanutun uumigiliqsigiŋagiksi piḷuun. Qanutun annaŋasuktigiliqł̣usi iḷaanni pigiitchuaq piimmaġiksipiaŋaiññasugalugu, qanutun kipiġniuttaġivlugu piiġukługu. Qanutun tatavsaŋagiksi piḷuusiqiri. Qanusipayaakun iḷisimanaqsiŋarusi nalautilaavsiññik pasiñaġumiñaiqł̣usi taavrumuuna.
12Tuyuŋagivsi tainna tuyuusivsun sivuġaani God-im puttuqsritquvlusi qanutupayauraq piviuttaqqutiqaqtilaavsiññik uvaptiŋnun. Taamna sivunniuġutigiŋagiga ikayułhaaqsasuŋaġnaguunnii iñuk piḷuksiruaq, naaggaunnii iñuk killukuaġusiaqaqtuaq. 13Tavraasii qapiŋaisaaqtauŋaruŋa. Aasii kisian qapiŋaisaaġusiaġa piqutigiŋitkiga, aglaallu quviasuqatigiłhaaqługu Titus pisigivlugu ilivsi tagialasaaŋiññiqavsiuŋ. 14Qanuq uvaŋa nanġaŋagivsi ilaanun aasii ilaan inmiñik iḷitchuġivlugu nanġaiñiġa ilivsiññik iḷumun itilaaŋanik. Tainnatuttauq supayaurat uqautitka ilivsiññun iḷumun inmatun, tainnatun nanġaqavsi Titus-mun, nanġaiñiġa iḷumun inŋammiuq. 15Aasii ilaan piviuttaġilivsaaŋagaasi itqaqamiuŋ iluqavsi kamakkutiqaġniqsi inmiñun, piyumapiaqavsigiglu iluqaisa piraksriutiŋi. 16Qanutun quviasuktigiruŋa, qanuq nalupqigiŋaiġivsi supayaatigun kamaksriñiaqtilaavsiññik.
Currently Selected:
2 Corinthians 7: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
