2 Corinthians 4
4
Piqpaŋnaqtuat Aitchuusiat Puuqaqtuat Qikuyyanik
1Aitchuusiaqaġniqapta nagliktuutaagun God-im, qanutun aliuġnaqtigiruamik alġaqsruutigiraksramik uqaluksrirrusiamik, nikatchagluta aġiulaitchugut. 2Paaqsaaŋagiga kiñaliqaa alġaqsruiruaq suqpanaqsiḷiqłuni naagga iḷumun inŋitchuamik, naagga pisaasuġmiaġutikun, naagga allaŋŋuqtiqługu God-im uqalua. Tainna uvaŋa piḷaitchuŋa. Aglaan alġaqsruisuuruŋa iḷumutun, sivuġaani God-im pimmatun. Iluqaġmiŋ iḷisimaruat uvamnik, taamna aŋiġumiñaġaat iḷumun inniḷugu. 3Aasii tusaayugaaġiksuaq alġaqsruutigikkaġa talutuġniqpan kimulliqaa, talutuġniqsuq kisiiññun tamatkunuŋa suksraunġiqsauniaqtuanun. 4Tamatkua ukpiliŋaitchuat kaŋiqsitchaiḷiraġai tusaayugaaġiksuamik god-iŋata mattuma nunam, Tuunġaum. Ayaupkaqtitauruatun ittut, tautuquŋił̣ł̣ugu qiḷaŋmiŋŋaqtauruaq qaumanġa Christ, God-itun ittuam. 5Alġaqsruutigigikput Jesus Christ Atanġunivḷugu. Alġaqsruutigiŋitchuŋa uvamnik. Uvagut ilivsi kivgaġigiptigut Jesus pisigivlugu. 6#Gn 1.3.God-im uqallaŋaruam uumiŋa, “Qaummaum simmausiġḷiuŋ taaqtuaq,” kaŋiqsipkaŋagaatigut aliuġnaqtuamik kamanautaanik Christ. Ilaimña ilaan simmausikkaŋa taaqtuaŋa uummatipta ilaan qaumaniġmiñik, uvaptiŋnun iḷitchuġipkaqługu ilaan qaumanini takunnaqaptigu Jesus kiiñaŋa.
7Aglaan uvva pigigikput taamna piqpaŋnaqtuaq aitchuusiaq puuqaqsiññaqługu nunamiñ savaanik timiptiŋnik, sunauvva tautuquvlugu iñupayaanun taamna sapiġñaqtuaq suaŋŋan iḷuptiŋniittuaq God-miñ piruagutilaaŋanik, uvaptiŋniñ pisuŋaġnani. 8Qanusipayaakun iłuiḷḷiuqtitaugaluaġaqtugut, akiiḷipkalaitchugut. Qanuqsausiiqsitaugaluaġmiraqtugut, uiŋasiḷaitchugut. 9Nagliksaaqtitaugaluaqapta suksraalaiñmigaatigut. Ilauvagut akiḷḷivsa ulġutkaluakkaŋatigut, aglaan tuqunŋił̣ł̣uta. 10Tavraasii ataramik anayanniuqtuaqtugut tuqutauniksramun, Jesus-tuttauq iḷisimanaqsitquvlugu iñuulipkaġuutilaaqput Jesus-mun iñuuruamun iḷuptiŋni. 11Iñuuniqtutilaaptiktun, itqanaitchugut tuquyumiñaqłuta Jesus pisigilugu. Tamauŋanun aglaan tuqutauŋaiñŋuraqpata iḷisimanaqtitkivut Jesus-mun iñuuruamun iḷuptiŋni iñuulimatilaaŋiññik tuquyumaaqtuat timivut. 12Anayanniuqtuaqtugut tuqqunmiñ pisigivlugu alġaqsruiñiqput, ilivsi piqaquvlusi isuitchuamik iñuggunmik.
13 #
Ps 116.10. Uqautigigikput taluqsraiqł̣uta ukpiġikkaqput, tainnatchimiktauq ukpiġutiqaqłuta iñuktun aglaŋaruatun Bible-ni inna, “Ukpilianikama uqarraqsiŋaruŋa.” 14Nalupqigiŋitkikput God aŋipkaiŋaruaq Ataniġmik Jesus-mik, aŋipkaiyumiñaqtilaaŋaniktauq uvaptiŋnik atausiŋŋuqatauŋaruanik Jesus-mun, aasii qaġġisiluta piqatigilusi ilaan irviŋmiñun. 15Iluqaan igḷutukkaġa anniqsuutauruq ilivsiññun, iñuvsaat kiikaa annaurraummata God-im nagliktuutiqpaŋagun, quyyativsaaksraqaqtusi God-mun, aasii ilaa nanġausiaqavsaalgiḷḷuni.
Iñuuniq Ukpiġutiqaqłuni
16Tavraasii nikatchagluta aġiulaitchugut. Timivut piyyuġuqsaiññaġaluaqtillugich, uvagupiaqput iḷuptiŋniittuaq suaŋasiḷaaqtauviiññaġuuruq nutauruamik iñuggunmik uvlutuaġman. 17Tamatkua iłuiḷḷiuġutivut paŋmapak suuvigruaŋitchut sivisuŋitchullu, itqanaiyaqsiññaġaatigut nakuaqsrisigitquvlugich God-im kamanaġniqsrat quviasuutiksrirrutiŋi uvaptiŋnun isuitchuamun. 18Qanuq qiñiqtuiññaŋitkikput suna tautugnaqtuaq, aglaan ukpiġutikun qiñiqtuiññaġikput tautugnaitchuaq, qanuq suna tautugnaqtuaq piiġumaaqtuq, aglaan suna tautugnaitchuaq isuksraitchuq.
Currently Selected:
2 Corinthians 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
