Nsaki 3

Silaa le diɛɛmulen caa biyɔɔ

1Puapilɛa nia, la síŋnùn vanaa pɛɛkaa sɛ́lɔ́ɔ́ taw le, kani la sínà maa naa co pɛɛkoo-a, yamɛi nɛi i hiawnin ikalu. 2Kani naa vanaa bɔɔ-bɔɔ n co boŋilan o nɛilan taw coo. Te vanndo boŋ o sɔɛi sondoei nin te, mɛɛ vana peelun o dɛnndan nin-ndo co kon ni, o nɔla vɛlɛ mò manda dialun ndɔn kpow. 3Kani te n luei pɛ kalafoo soa o lasondo haliko ma tosa ɲɛ naa n yeema-o, mɛɛ dialun ndan kpow naa n co hiŋ kon lende ni. 4La tofa vɔ vɛlɛ dɛ̀ndɛ̀lan, la co bɛɛ labɛndu-bɛndu nuaa, mì hoeyii fùkù-fùkùei va lan ɲindɔɔ, ɲɛ-pɔmbɔɔ pum nuaa kínɛí ɲindu lan mɛɛ vana tɛɛngaa dɛ̀ndɔ̀ɔ́ pila yeema yɛ ni. 5Lende koni i co a diɛɛmulen ni, dialii pɔmbɔɛi le co ni, kɛ mì le kuundian le sɔɔn bɛndon taw tosaa.

La tofa vɔ mɛɛ yinnde pɔmbɔlen le loam bundɛ bɛndoo yɛ. 6Nduyɛ, diɛɛmulen bɛɛ yinnden le co ni. Ceen dɛnɛ sandaa lepɛŋndo le co o dialun naan nin ni. Le co diallon kpow nɔɔliaa mì le va vanacieeyɛi nɛi kpow lomɔɔ. O Ɲánndávàà yinnde ndɔle len le fula ni. 7Kani vanacieo tiwba mo tosa hɛnan ndɔɔ visia yondoa, yowva, ɲaa sasun lɛŋ-nda a visia peea súúlan kpow coo, nduyɛ mò tosá hɛnan ndɔɔ nda coo. 8Kɛ vana-vana tiw-vɔ ba diɛɛmulen biyɔɔ le. Ɲɛ vɔɔn co muulɔnndo tuŋ-ndo le co ni, le co lepiaalen ca a ɲɛ lolo nɔla mò dii vana-o. 9A len naa n mel Mɛlɛka Fuɲaa balika ni, a len koni naa n mɛɛniaa vɛlɛ vanndacieea cɔwnun a velan Hala-o-a ni. 10O sondo pilɔɔ nin duaalan a mɛɛniaalan la co fulaa ni. Puapilɛa nia, o bɛnda mò tosan lende le. 11Soon kólaa pilɔɔ nɔla pá mò soli mɛmma kɛndɛan a ma lolɛiyan o tɛɛngii pilɛi? 12Puapilɛa nia, buumbuuo nɔla pá mò kom oliveon, te kon te mì rɛsɛnndo kom buumbuuon? Soon mɛmma ihɛllan ma co fulaa nin-ndo bɛɛ nɔla lɛ mo soli mɛmma kɛndɛan te.

Kɔlkalu fula o halataala-o

13Nɛ̀ɛ́-nɛ̀ co yɛ vana kɔlkaloo a vana sinaa dɛnɔɔ o niaa tɛɛn? Vana kon bɛnda mò cɔm o kela ndɔ kɛndɔɔ nin maa dɛnnda ndɔlan la fula o tuisinndo nin a o kɔlkaloo nin. 14Kɛ te la nɔ pɛ paŋala vɔɔndo a sɛɛngianndan niaa o lakɔl, mɛɛ la kuundian mì la dimí còòlan a toɲaa o kɔɔ le. 15Kɔlkalu vaa lende co kɔlkalu fula coocoo le, kɛ kɔlkalu ceendo, kɔlkalu n'faloo a kɔlkalu ɲinaa co kon ni. 16Kani nɛɛ paŋalaa a sɛɛngianndan la co-a, lon koni dɛnɛ laasiɛiyo a dɛnnda vɔɔnnda súú-súù ka la co vɛlɛ ni. 17O diandaa kɔlkalu fula coocoo-o co vɔ fɔlɔn ni, o kon kɔɔli kɔlkalu kɔlɲuloo a kɔlkalu fɛ́ɛ́-fɛ́ɛ́o, o kindù tɛɛlɔn te, o pɛ a ɲííye a kɔmnde kɛndɛlen, o hiyàn vannda le, o muulun te. 18Kɔmnde dɛnɛ sandaa le saŋnun o kɔlɲuloo nin, vanaa yeema kɔlɲuloo-a saŋ-nden ni.

Currently Selected:

Nsaki 3: BKG

Highlight

Copy

Compare