Nsaki 4

Canyɛi ceende

1Kuɛɛ nɛ sɔngɔlan a cɔlɔbala co niaa tɛɛn-ndan la co yɛ fulaa? Vɛ̀ɛ̀ o co o yeeman co niaa cɔlɔbaa o lakɔl-lon nin te? 2La co ɲɔɔn hɔlten fulaa, kɛ la co mun sɔla le. La co yeemɛi le vanndacieea diwvo, la yeema ɲɔɔn, kɛ la co mun sɔla le. La co sɔngɔlan a cɔlɔbalan, kɛ la co ɲɛ-ɲɛ sɔla le. Kani la co ɲuna le. 3La co ɲunaa, kɛ la co sɔla le, kani la co caa ɲunaa le, le yeemɛi niɛi tosaa daama niaa co ɲunaa ni. 4Éé niaa vanaa laasiannda ha! Vɛ̀ɛ̀ la co sina le maa, yeemɛi ceendo ho i siinguu vana yaamɔɔ Hala-o ni? Lelan, vana yeema pɛ le vaa caaŋoo ceendo, ndu siŋnun yaamɔɔ Hala-o. 5La yiyan te maa fondo fúú o sɛvan-ndo dimi aa: «Kɔl Hala luei naa nin-ndo, o kaola ndu taw a paŋalaa.» 6Kɛ nduyɛ, kɛndɛi Hala co naa tosallo-e co i bɔɔ, kani o dimin vɛlɛ aa: «Hala co vanaa kuundiannda cɔlɔbaa, kɛ o co vanaa tuisin tootoo-a kɛndɛi tosallo.» 7Lelan, la tuisin Hala o labɛngunin. La simul ɲina vɔɔndo, o ɲaanunnin niaa. 8La sɔɔnguu Hala ikɛi, ndu bɛɛ sɔɔnguunin niaa ikɛi. La dindi bala niaalan, niaa vanaa lahakia ha! La dindi kɔlta niaalan, niaa vanaa kɔlta tiɔn-tiɔnda ha! 9La sínán kɔɛi niɛi. Mɔnɛi bíí niaa, mì la caŋ. Mamɔɔ niaa bɛnda mò siŋnun mɔnɛi, mì kɔlkɛndɛ niaa siŋnun kɔl tambɛiyo. 10La tuisin tootoo Mɛlɛka o hɔl, mò heelu niaa.

La kialu caanda iyama le

11Puapilɛa niaa, la congan vellaa-velle le. Vana congu pɛ puapilɔɔ, te kon te vana yaala pɛ puapilɔɔ, mɛɛ ndu congu tɔŋndo mo yaala tɔŋ kalaa. Nduyɛ, taa kelu pɛ tɔŋndo iyama, mɛɛ a co vana biyaa tɔŋ te, yaamɔɔ tɔŋndo n co ni. 12Nduyɛ, Hala ndu pilɛ kpé handu tɔŋndo ni, ndu pilɛ kpé tiw vɛlɛ ba yaman kiolɔɔ ni. Ndu pilɛ kpé nɔla ciindiaa a tɛɛmbuuo ni. Kɛ nɔm yɛ, nɛ̀ɛ̀ n co yɛ, nɔm co caanda yaalaa-o?

Vana-vana sina siɔdii lacio le

13Niaa co sisa dimio-a aa: «Hau, te kon te siɔdii, n kɔanin o kobi vaa nuaa nin. N ciinin vɔsio pilɛ lon, n tosanin yulalen ndon mì n sɔla tɔnɔɔ», 14la sínà bɛɛ mɛɛ ceen niaa vanin siɔdii le. Maa hangulu niaa co ni, o fula pɛ le telen bingi o kon kɔɔli o kiolu. 15O bɛnda mì la dimi fisa aa: «Te Mɛlɛka cɛl pɛ, n vanin yoomu mì n tosa dɛnɛ vaa nuaa, te kon te dɛnɛ celen.» 16Kɛ sisa, la co kuundianndo o yiyannda niaala yongalan nin. Kuundian vaa lende kpow vɔw ni. 17Te vanndo sina pɛ le dɛnɛ kɛndɔɔ tosaa, te o tosa ndu le, mɛɛ o cua hakio o ken nin.

Currently Selected:

Nsaki 4: BKG

Highlight

Copy

Compare