Nsaki 2

Vanndacieea kpow kpen-kpen nda co ni

1Puapilɛa nia, niaa laalan Maalii naa Yeesu Krista biiloo bɛnda-o-a, la hiyàn vannda le. 2Te vanndo luɛi pɛ niaa tɛɛn a kelan n'sianion o n'su mò nɔ volɔɔla kɛndɛ-kɛndɛlan lekɔɔ, mì vana bala fondoo bɛɛ luɛi a volɔɔla nɔɔlɛilan lekɔɔ, 3te la handu pɛ hɔlten vana nɔ volɔɔla kɛndɛ-kɛndɛlan lekɔɔ-o coo, mì la dimul ndu aa: «Nɔm sei, cal nanu o fonda lebɛɛo ho», mì la dimùl vana bala fondoo aa: «Nɔm sei, sim o nda», te kon te aa: «Cal nɛɛ ya kɛsì pelun nun-nda», 4vɛ̀ɛ̀ o co hiyanndo le niaa tosa kon niaa pila tɛɛn te? O co yamaa nɔ yiyannda vɔɔnndan-nda le niaa siŋnun o kon te?

5Puapilɛa nia hɛnan ya-a, la yaŋ-ndɔ nilan. Vɛ̀ɛ̀ o co hɛlio le Hala hɛli vanaa bala fondoa o ceendo nin le nda siinguuo vanaa bolofaa o laalanndo nin te? O hɛli nda haliko ma sɔla Masale o yiilu vanaa kaola ndu-a kpemaa len. 6Niaa yɛ, la co vanaa bala fondoa bɛ̀ɛ̀lan tɛɛmbuuo. Vɛ̀ɛ̀ o co vanaa bolofaa le a co niaa mɔnɛi lueiyo le? Vɛ̀ɛ̀ nda le a co niaa yɔɔ o fondala kialaa n'yamalan te? 7Vɛ̀ɛ̀ nda le a co diola kɛndɛla niaa sɔla lan yeowlan te?

8Nduyɛ, te la bii pɛ tɔŋ lemasaa mɛɛ o sɛvan-ndo dimi yɛ aa: «Kaola caanda maa nɔm pila», mɛɛ la co caa vilio. 9Kɛ te la hiyàn pɛ vannda, hakio niaa co tosa kon ni, mɛɛ tɔŋndo yaala niaa maa vanaa tɛɛmbua tɔŋnda niaa co o kon ni. 10Kani vanndo bii bɛɛ tɔŋndan kpow, kɛ o tɛɛmbuu pɛ silaa o pilɛ, mɛɛ tɔŋndan kpow o tɛɛmbuu lende ni. 11Kani vana dimi aa suunda loo, ndu ko dimi vɛlɛ ni aa dii vanaciee le. Nduyɛ, te nɔm suunda le, kɛ mà dii vanacieo, mɛɛ a siŋnun vana tɛɛmbuu tɔŋndan kpow-vo. 12La sòó mì la kela maa vanaa sɔlanin yamɛi kilullo mɛɛ tɔŋ ihɔɔya co yɛ-a. 13Kani ɲíí venin o yamɛi kiolɔɔ le vanaa tuinun caanda iɲíí le-a le. Ɲííye hiow yamɛi kialɛi polon.

Laalanndo a dɛnndan

14Puapilɛa nia, ɔ́ɔ̀ tɔnɔ co le dimio maa vanndo nɔ laalanndo-o, te o peelu ndu a dɛnndan te? Laalan vaa lende nɔla pá mò ciindiáá vana? 15Te puapilɛ vanapɔnɔɔ te kon vanalanɔɔ va pɛ a fɛ́lio, mà nɔ balo le dioo lepalaa-lepala le, 16mì vana pilɛ o niaa tɛɛn dimul nda aa: «La kɔ a kɔlɲuloo. La kɔ hangu mì la pim!» Te la yɔngu nda ɲɛm diallon nɔ makoo-on te, yɛɛ nɛ ken nɛŋi yɛ? 17Lende koni laalanndo bɛɛ co ni. Te dɛnndan la co lenin te, mɛɛ o vílɛíyo laalan kon co o ndu pila nin ni.

18Kɛ vana pum diminin aa: «Nɔm, a nɔ laalanndo, ya bɛɛ, i nɔ dɛnndan. Cɔm ya laalan nɔmndo o va a dɛnɛ le, mì ya ya cɔm nɔm laalan nuu o dɛnndan nin. 19A laalan maa Hala ndu pilɛ kpé co ni? A caa laalan lende. Ɲinaa bɛɛ laalan lende mà va ɲiiyaa.» 20Nɔm diɔmndo ho, a yeema lekɛ́ndɛi ma sina maa laalan dɛnndan la co nin too nɛŋi mako le? 21Vɛ̀ɛ̀ o co le dɛnndan te fuɲa naa mamaa Abraham siŋnun vana sandaa, le tùú o soli Isaak po ndɔ sálàá o fonda-loamaa-lasálàá coo-o le? 22A ce maa laalanndo a dɛnnda ndɔlan la va vallo tosaa latulu ni. O kon le dɛnndan, mí laalanndo peelun. 23Nuaa o sɛvan-ndo peelun ni aa:

«Abraham laalan Hala,

mí kon cɔmnun ndu coo maa dɛnɛ sandaa,

má veelu ndu aa caangoo Hala.»

24La co cɔu maa le dɛnndan vanacieo siŋnun vana sandaa ni, o co le laalanndo daama le.

25Vɛ̀ɛ̀ o co le dɛnndan te Rahab, vanalanɔ suundɛiyo siŋnun vana sandaa le tùú o sɛɛna kiilaa, mó mingi nda o nɛi celen-ndo le? 26Mɛɛ dialun yoomu co nin toon co n'vílɛ́iyon yɛ, lende koni laalan dɛnndan la co nin too co o vílɛ́iyo ni.

Currently Selected:

Nsaki 2: BKG

Highlight

Copy

Compare