Hebreea 12

Hala co Fuɲa naa ni

1Seiya balu naa sɛ́lɔ́ɔ́, lelan n viòwnún ɲɛ co naa kuunaa kɔlan-ndo a haki simbulun naa-o, mì n ɲaanun háá o kilta naalan mɛɛlulan. 2N tofan Yeesu tuŋ. Ndu o ba laalanndo kandun ni, ndu o ba o mɛɛlu ni. Mó cɛl le vuo o yɔm singafilaa coo, o ci siɛmbula lan ɲɛ-ɲɛ le. Kani o va ɲaale o va hunɔɔ sɔla-o cɔu, nduyɛ sunsun o co icali Hala o ba kɛndɔɔ coo.

Kindikindinndo

3La yiyan ndɔ, mí vanaa lahakia simul ndu. Kɛ mó biwnun. Lelan, la vu n'dial te. 4Kani la simul-lɔ hakio háá piɔ́mndo le. 5Vɛ̀ɛ̀ la pɔɛɛnun sɔɔn Hala dimul niaa le niaa yoomuan lueiyo maa cuavaa ndɔ-on?

«Po nuu, Mɛlɛka saangiaa nɔm pɛ le dɛnɛ vɔɔn n tosa-o, ca sɔɛi ken sɔɛi taanin te.

Te o soo pɛ nɔm, vu n'dial te.

6Kani vànà Mɛlɛka kaola-o, ndu o saangiaa le dɛnɛ vɔɔn ndɔɔ ni,

cuavaa ndɔa o lɔaa a sionnden ni.»

7La biwnun sangaa, le niaa silaa ni. Maa cuavaa ndɔ Hala co niaa biyɔɔ ni. Kani ɔ́ɔ̀ hɔ́ɔ́ fuɲa ndɔ saangiaa le tɛɛmbuu ndɔɔ loo? 8Te la sɔla sangaa le tɛɛmbuula niaalan maa cuavaa ndɔa le, mɛɛ la co cuavaa ndɔ kpeekpei le. 9Naa n nɔ fuɲaa n'falua, a va pɛ naa saangiaa le tɛɛmbuula naalan, n ke nda bɛɛlen. Vɛ niko n tuisin a fuɲaa naa Hala, mì n va yoomu le? 10Fuɲaa naa nda, le telen bingi koni ndáà saangiaa naa le tɛɛmbuu naa ni, a va yiyanndo maa lende ndóò naŋ ni. Kɛ Hala ndu, le naŋɔɔ naa o saangiaa naa le tɛɛmbuula naalan ni, haliko mi naa bɛɛ n dendu maa ndu. 11Sanga oo sanga nda tuisi pɛ vanndo coo le tɛɛmbuu ndɔɔ, o telen kon bɛngu, kɔllo vana kon tambu ni, vana niŋ kɔl te. Kɛ o kon kɔɔli, vana kon sɔla kɔlɲuloo, o tosa dɛnɛ sandaa.

Sɔɔn mɛɛlan a kanalanndan

12Lelan la siɛndi bala niaala sangɛilan, mì la simi vula co niaa ɲiiyaa lan. 13La toosiaa nɛila sandaalan le pelun niaan, haliko vana co tindaa-o mal nɛiyo le, kɛ mò sengu.

14La kindin le vaa o kɔlɲuloo nin a vannda kpow, mì la va a diandaa. Kani te o co o dindinndo nin te, vana-vana cinin Maalii le. 15La caa dɛ! Vana-vana fula o kɛndɛi Hala-e bɛngu le. Vana-vana va maa tɔlɔɔ vɔɔn vul o tɔlɔɔ kɛndɔɔ tɛɛn mò tɛɛmbuu ndu-o le. 16La caa taw! Màá vana-vana va niaa tɛɛn vana laasianndo mò kɛɛ ɲɛm Hala-on yii luɛyɔɔ maa Esau le, kani le ɲɛdiaa dio lepilɔɔ kpé, mó pisi fonda ndɔ ikaasonyaa. 17La sínà maa o mɛɛlulan, telen ndóò yeema le duaa sɔlaa fuɲa ndɔ o ba-o, o sɔla fonda le. A caŋ o caŋndo kpow, fuɲa ndɔ tiw lɛ ba diomndo yɛlɛmaa le.

18Niaa, o co ɲɛ vana nɔla pilanndo-o le niaa sɔɔnguu ikɛi le, yinnde bɛndule ve lon te, ɲumma n'kpungba ma ve lon te, ɲumma bɛndu ma ve lon te, hoeyii fùkù-fùkùi ve lon te, 19bulu ve isɔɔ lon te, vanaa tui vana isɔɔ lon te. Israɛlla tueyɔɔ diomndo pum, a cɛl lɛ le diom celen nilan yaŋɔɔ le. 20Kani ndáà cɛl le dimio aa: «Vana-vana pilan pɛ pembei, o va bɛɛ cɔloo ni, o bɛnda mà vii ndu a powtan, mò vi.» 21Siòònde ndíì bii vana a ɲɛ nda va cɔu-vo ni. Mí Moise dimi aa: «Siòònde co ya bɔɔ, i co ɲiiyaa.»

22Kɛ mí la sɔɔnguu o pembei Siɔn a o kobi Hala nɔ yoomoo o ba-o ikɛi, Yerusalɛm co o halataala-o, nɛɛ mɛlɛkaa co sɛ́lɛ́ a cuu cɔm te-a co-a. 23Mí la sɔɔnguu o bɔŋan cuavaa tasea Hala-a, a diola ndalan la co lasɛvaalan o halataala-a pɛɛn, mí la sɔɔnguu Hala co vana kialaa iyamaa le vanndacieea-o ikɛi, mí la sɔɔnguu kɔlta vanaa sandaa tiwnun-nda ikɛi. 24Mí la sɔɔnguu Yeesu ikɛi, o co kpema sɛnɛiyo a kooma ndɔma fasaŋan-ndan tɛɛn-ndo, má co sɔɛi hiovɔɔ kooma Abɛl-lan coo-an.

25La caa dɛ! La kɛɛ diom vana co sɔɛi o niaa lo-o le. Kani vanaa kɛɛ sɔɛi vana va nda kanalanndo o lɛŋnden coo-o-a helun dɛnɛ palaa ndóò bɛnda le nda delɔɔ coo-o le. Konin te naa, vɛ̀ɛ̀ naa n hialun yɛnin, te n mulul pɛ diom vana fula o halataala le naa kanalanndo-o kɔɔ? 26O paandoo nin, mí diom ndɔɔ tosa mí lɛŋnden le ɲiiya. Sunsun yɛ, o yiilu naa kpemaa aa: «I co vɛlɛ tosa mì lɛŋnden le ɲiiya, kɛ halataalaa vɛlɛ bɛɛ.» 27Dimi kon lende aa: «vɛlɛ» kon co dimio ni maa ɲɛm cɔwnun-ndon, n nɔla tambeiyon, mun hiawnin. O kon mì ɲɛm nɔla itambu loon mun lo.

28Lelan, le mɛɛ naa n sɔlanin masale hiilunnin te len yɛ, n sinàn kɛndɛi mì n melnun Hala balika, mì n tosalan ndu baalaa mɛɛ hɛnan ndɔɔ co yɛ, o siòònde a o ndu vou nin. 29Kani yinnde tɛɛmbua len Hala naa co ni.

Currently Selected:

Hebreea 12: BKG

Highlight

Copy

Compare