Hebreea 11

Laalanndo

1Laalanndo co sinaa ni maa ɲɛm vana kɛsi kɔllo coo-on toɲaa lekɛ́ndɛi n co ni, nduyɛ maa vana co mun sɔla. Seile ɲɛm vana co cɔ a lehɔl te-on o co ni. 2Le laalanndo vannda sɔla seile kɛndɛlen sindɛ ni.

3N laalàn Hala, lelan naa n bii bila ni maa a Sɔɛi Hala cɔw ceendo ni. O kon mí ɲɛm vana ca-on toosian a kpaaya ɲɛm vana ci le-on.

4Mí Abɛl solul Hala sálà hiow naŋɔɔ a laalanndo, mó hiaw sálà Kaɛn-ndo naŋɔɔ. Le laalan ndɔɔ, mí Hala ca ndu vana sandaa, mó hini kɔl a ɲɛm o solul ndu sálàá-on. Abɛl co bɛɛ o vílɛ́iyo, kɛ nduyɛ le laalan ndɔɔ, o co vɔ sɔɛi.

5A laalanndo, mí Enɔk hel o halataala, o ci piɔ́mndo le. Vana ci lɛ ndu le, mí Hala heelun ndu ikɛi. Sɛbɛ Hala-o dimi maa lɔ́ɔ́ pá mó hel, Enɔk ndóò hɛnan Hala. 6Nduyɛ, te o co a laalanndo le, vana-vana nɔla Hala hɛnan te. Kani, vana va pɛ Hala sɔɔnguuo ikɛi, fɔ mò laalan maa Hala co, maa o salanin vanaa co ndu nuwviaa-a.

7Le laalan Noe ndóò nɔ-o, mí Hala cɔm ndu dɛnnda vanaa ci vɔ le lan. Mí Noe luɛi sɔɛi Hala-e yii, mó toosiaa dɛ̀ndɛ̀ mamɛn bɛndoo le yungu ndɔɔ ciindiaa. Le hee, mí Noe cɔm maa dɛnnda vanndacieea o ceendo coo la niŋ te. O kon mí Hala ca ndu vana sandaa le laalan ndɔɔ.

8A laalanndo Abraham cɛl veelu Hala-o ni, mó kɔa o lɛŋnde Hala yiilu ndu kpemaa le ndu len keo kɛ́ɔ len nin, ndóò sínà vɔ bɛɛ lon te, mó kɔa. 9A laalanndo, mó kɔ cal o sumialle o lɛŋnde Hala ndóò dimul ndu le ndu keo len nin. Mó kɔ cal lon o cɛila-kolala-toandaalan nin nda Isaak a Yakɔb. Nda bɛɛ, kpema pilɛ kon ndóò yiinun le nda. 10Kani Abraham va cumndo le kɔlan o kobi nda caa kila ɲɛkɛndɛi-yo nin, o Hala pila tuu mó tangul-lo.

11Le laalan Abraham ndóò laalan Hala-o o sɔla kpaayaa le hɔ́ɔ́ violɔɔ ni. O va nin bɛɛ o yuuvɛiyo taw-taw. Sara laa ndɔ ve vɛlɛ vana vialaa le, kɛ ndóò laalan maa vana lo o lediom coo-o Hala co ni. 12Lelan fuɲa-mama pilɔɔ, Abraham ndóò nɔla lɛ hoo hɔ́ɔ́ violɔɔ loo, mó vialu cuawva sɛ́lɛ́ bɛndoo maa loeon o halataala, te kon te maa siòònndon o mɛmma ihɛllan kɔngɔ, vana nɔla nda cɔm te.

13Nda kpede o laalanndo nin nda lo ni má vu. A sɔla ɲɛm Hala dimi le yɔngoo-on te, telen kon vannun ndɔ lándán, kɛ mí ɲɔɔ tosan vanáà ca ko aa ndáà ce nin dɛnnda kalalan o peelɔnndo. Má dimul vannda kpendekele maa mialla a vanaa hiawnannda nda yɔŋnun o lɛŋnden nden coo ni. 14Vanaa co sɔɛi lendea, mɛɛ nda co cɔmndo vakpa maa kɔltan la co nda o lɛŋnde celen, lɛŋnde co le nda len. 15Te o lɛŋii nda cɛn nin-nde kɔltan láà va nda ni, a va nɛilan nuwviaa le muungoo lon. 16Kɛ o kpeekpeiyo nin, a lɛŋnde hiow lɛŋnde len naŋɔɔ len o kɔɔ nda va sɔɛi ni, halataala pɛɛn. Lelan siɛmbula bii Hala le ndu veeloo aa Hala ndaa le, kani mó toosial nda kobio.

17A laalanndo Abraham cɛ̀l sindɛ le Isaak sálàá solio ni, telen Hala tɔɔndan ndu-o. Mó cɛl le po ndɔ pilɔɔ sálàá solio, nduyɛ a ndu Hala yiilu Abraham kpemaa ni. 18Mí Hala ndóò dimul ndu aa: «A Isaak n sɔlanin cuavaa-imamaa solinin diola nɔmndan tɔ́ɔ́-a ni.» 19Kɛ mí Abraham yiyan o kɔl ndɔɔ nin maa Hala nɔ kpaaya o mingi Isaak yoomu-o. Lelan mí Hala mingul ndu po ndɔɔ, mí ken yɔŋnun tuulaa pum.

20A laalanndo Isaak dɔw Yakɔb nda Esau duaa le siɔdii ndaa ni.

21A laalanndo Yakɔb dɔw poaa Yosɛf-a a pilɛn-pilɛnnda duaa ni lɔ́ɔ́ pá mó vu ni, mó tiindan o tindà ndɔɔ coo, mó biilu Hala.

22A laalanndo Yosɛf soo a fula Israɛlla o lɛŋnde Esipte len nin o kɔɔ telen o va le vuo-o ni, mó cɔm nda mɛɛ ndáà bɛnda le tosaa a dialun ndɔn yɛ.

23A laalanndo vanaa velu Moise-a ven ndu le paangon mún yáá o violɔn ndɔɔ kɔɔli ni. Siòòŋii bii nda a tɔŋ masaa ndóò handu-o le, kani naŋɔɔ pila cɛlɛkpɔɔ ndóò naŋ ni.

24Moise ndóò laalan Hala, lelan telen o sul-lo, mó kɛɛ le vannda ndu veeloo aa po masaa Esipte-o. 25Mó hɛli le sangaa sɔlaa nda vanaa Hala-a latulu, hiovɔɔ kɔlkɛndɛ yɔŋ vɔɔndo coo, o co le telen bingi-o pɛɛn. 26Mó ca maa sangaa sɔlaa le Krista co fisa a bolofaa Esipte. Kani vɔ̀ngɔ́ va ndu laci-o caando va cɔu ni.

27A laalanndo, mí Moise faŋan Esipte, siòòŋii bii ndu le kɔl tambɛi masaa le. Mó sim yili, vanáà ca ko aa Hala vana ci loo o va cɔu ni. 28A laalanndo, mó tosa kafo-hiavaa-coo, mó dimul vannda le koovan suiyo o kèéden lacɛiyon coo. O kon mɛlɛkanɔ piɔ́mndo dii poaa tasea Israɛlla le.

29A laalanndo Israɛlla taŋ mɛmma ihɛlma makpɛ̀ndɛ̀an o lɛŋnde vesɛilen nin ni, kɛ Esiptea tɔɔndanndo le tolɔɔ, má miisuu o mɛnndan nin.

30Israɛlla ndáà laalan Hala. O kon ndáà balɔɔ Yeriko palɛi ndii ŋɔmmɛw, mí kpaki kobio komba. 31A laalanndo, Rahab cua suundaa sɔla piɔ́mndo latulu nda vanaa simul Hala-a le, kani mó yiya suansuaŋaa Israɛlla ɲɛkɛndɛi.

32Vɛɛ ya dimi yɛ vɛlɛ a hee? I nɔ telen bɔɔ mì tɛɛsial niaa a Sedeɔn, Barak, Samsɔn, Yɛfte, David, Samiɛl a vanaa-tɛɛngaa-diom Hala-a o kɔɔ le. 33Laalanndo yɔŋ ni mí vanaa kan a nɔla masɛi, má tosa dɛnɛ sandaa, má sɔla ɲɛm Hala ndóò dimul nda-on, má kinda yàlàá sondolan. 34Má ɲumi kpaaya leyinndo, má hialun mɔɛi cɔwve, má deli a nààlan, má siangu. Telen lacɔwvo, má yɔŋnun vanaa dialun kalaa, má toaw vanaa cɔvaa va nda hinullo-a. 35Mí vanlaandua pum a ca vanvílɛ́yaa ndaa muungoo yoomu, má can fulaa o piɔ́mndo nin.

A saangiaa a pum saangiaa piɔ́mndo, kɛ a cɛl mì vana baŋa nda le, haliko mi ndáà sɔla yoomu hiow naŋɔɔ-o o piɔ́mndo kɔɔli. 36Má mam a tiŋ, má lɔaa nda, má baa a pum yɔlɔn, má vow nda o kaasoo. 37Má lo a pum viiyo a powtan háá má diw nda. A pum yɛ, má kialu nda tɛɛn a siiyo te kon te, má dii nda a mɔɛi cɔwve. A pum yɛ, a cɛn pɛ baa, a kɔɛ baa pilɔɔ a yáwla saa, te kon te yáwla cuinnda lekɔɔ. Mí pɛŋnde ɲɛ-ɲɛ fee le bii nda. A va nda sɔɔlɛmaa suiyo a nda saangiaa taw. 38O lɛŋnde veselɛilen nin a o pembon coo vannda ha ndáà kela ni, má kei luɛyɔɔ o powta kpovalan bɛngu a o buululan nin. Ndóò bɛnda bɛɛ mí vanaa kɛndɛa vaa lende ndáà hin o ceendo coo nanu le.

39Nda kpow, má sɔla seile kɛndɛlen le laalan ndaa, kɛ a sɔla ɲɛm Hala ndóò dimul nda-on te. 40Ksani Hala ndóò cii nin ɲɛm hiow naŋɔɔ le naa-on toosiaa. O yeema mi n kɔ sɔla mun latulu naa ndaa.

Currently Selected:

Hebreea 11: BKG

Highlight

Copy

Compare